Xitay qanun tarmaqliri' Uyghurlar ' dégen sözni tawar markisi süpitide ishlitishke yol qoydi

Xitay dölitining "tawar markisi qanuni" ning 10 - babida tawar markisi süpitide ishlitishke bolmaydighan bir qanche türni éniq belgiligen bolsimu, emma Uyghur élide tijaret qiliwatqan bir qisim karxanilar bir qanche yildin biri Uyghurlarning izzet-hörmiti, exlaq we ghururini ipadileydighan birqisim tarixi, medeniy we jughrapiyiwi nam-atalghularni namuwapiq shekilde tawar markisi süpitide ishlitip, Uyghurlarning qattiq naraziliqini qozghighan we bezi dewalarni sot orunlirigha élip chiqqan idi.
Muxbirimiz yalqun
2009.01.06
Uyghurlar-markisi-305 "Qarasheher idris süt mehsulatliri shirkiti" ning "uyghurlar" we "miras" markiliri tizimgha aldurulghan matériyallarning süretlik körünüshi.
Bu marka süretlirini oqurmenler muxbirimizgha teminligen.

Yéqinqi tor uchurliridin melum bolushiche, "qarasheher idris süt mehsulatliri shirkiti" "Uyghurlar" ,"miras" namidiki tawar markilirini xitay qanun tarmaqlirigha muweppeqiyetlik royxetke aldurup, yene bir qétim Uyghurlarning qanuni jehettin qoghdilishqa tigishlik bolghan heq -hoquqlirini depsende qilghan.

Xitay "tawar markisi qanuni" ning 10 - maddisining 6 ‏- we 8 ‏- tarmaqlirida "milli kemsitish xaraktéridiki, ijtima'iy exlaqqa we bashqilargha yaman tesir béridighan söz, atalghu we belgilerni tawar markisi süpitide ishlitishke bolmaydu," dep belgilen'gen bolup, bu tarmaqlar soda sana'et memuri bashqurush idarisi teripidin tüzüp tarqitilghan "tawar markilirini tekshürüp békitishning ölchimi" heqqidiki belgilimide téximu éniq yéship chüshendürülgen.

Bu belgilimide, tawar markisini teshkil qilidighan yéziq we shekil her bir milletning namigha oxshisa yaki oxshapraq qalsa we shu milletni xunükleshturidighan yaki pes köridighan halet shekillense, bundaq tawar markisini milli kemsitish xaraktéridiki tawar markisi, dep békitishke bolidu, bundaq tawar markiliri "tawar markisi qanuni" buyiche bir terep qilinsa bolidu, dep körsitilgen hem misal süpitide " indi'an " dégen millet namini tawar markisi süpitide ishlitilishke bolmaydighanliqi eskertilgen.

Tawar markisigha da'ir bilimlerdin xewiri bar bezi Uyghur ziyaliylirining bildürüshiche, "Uyghur" sözi bashqilar teripidin ijat qilin'ghan yéngi söz bolmastin , belki tarixtin buyan qollinilip kéliwatqan Uyghur millitining étnik nami bolup, uni xalighanche mehsulatlargha tawar markisi süpitide ishlitish milletning izzitige tégidighan qanuni mesile hésablinidiken. Xitay qanun organlirining öz qanunida cheklen'gen bu mezmunlarni yene qanun buyiche royxetke élip ishlitishke yol qoyushi Uyghurlarning nam ‏- izzitige astirittin zerbe bérishni meqset qilidiken.

"Uyghurlar" we "miras " namidiki bu tawar markilirini iltimas qilghuchi qarasheher idris süt mehsulatliri shirkitining xojayini ma shinlin isimlik tunggan bolup, u özining bir yürüsh
Uyghurlar-markisi1-305
"Qarasheher idris süt mehsulatliri shirkiti" ning "uyghurlar" we "miras" markiliri tizimgha aldurulghan matériyallarning süretlik körünüshi.
Bu marka süretlirini oqurmenler muxbirimizgha teminligen.
Süt we hesel mehsulatlirini mushu tawar markisi bilen bazargha salghan. Uyghur xéridarlar bu ishtin xewer tapqandin kiyin bu ehwallarni munasiwetlik orunlargha melum qilghan bolsimu , emma héchkimning kari bolmighan.

Bu ishning qanuni yolliridin xewiri bar bir qisim Uyghur ziyaliyliri sotqa erz sunup naraziliqlirini ipadileshni layiq körgen bolsimu , Uyghurlargha asanla siyasiy qalpaq keydürüshke adetlen'gen xitay hökümitining siyasi böhtanigha qélishtin qorqqan.

Bu heqte özining hesritini ipadiligen bir Uyghur ziyaliysi mundaq deydu: " xitayning tawar markisigha munasiwetlik tor betliride, xitay ziyaliylirining yaponiye karxanisi teripidin royxetke aldurghan "sen gu'ang" namidiki tawar markisigha we en'gliye alü'ito xoldingis shirkiti en'ge aldurghan "junggoda yasalmighan" namidiki tawar markisigha qarshi élip barghan milletchilik xahishini alghan munaziriliri tolup yétiptu. Ular, bu tawar markiliri xitay millitini kemsitish mezmunlirini öz ichige alghan dep qarighan. Ejiba xitay ziyaliyliri öz millitining ghururi heqqide pikir bayan qilsa qanunluq bolidiken-yu , némishqa biz Uyghur millitining ghururi heqqide pikir bayan qilsaq qanunluq bolmaydiken?"

Soda-sana'et memuri bashqurush idarisining tor betliridiki uchurlargha qarighanda , bu xildiki kemsitish yalghuz Uyghurning béshigha kelgen külpet bolmastin , belki xitay kontrolliqida yashawatqan bashqa milletlermu duch kéliwatqan éghir mesililerning biri iken.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.