Уйғур паалийәтчилири 'шинҗаң хизмәт йиғини' һәққидә тохталди

Хитай мәркизи һөкүмити тәрипидин бейҗиңда ечилған "шинҗаң хизмәт йиғини" ниң ечилғанлиқи мәлум. Хәвәрләргә қариғанда, мәзкур йиғинда уйғур елиниң иқтисадини илгири сүрүш пикри оттуриға қоюлған.
Мухбиримиз миһрибан
2010-05-20
Елхәт
Пикир
Share
Принт
Сүрәт, хитай мәркизи һөкүмити тәрипидин бейҗиңда ечилған "шинҗаң хизмәт йиғини" йиғин мәйданидин бир көрүнүш.
Сүрәт, хитай мәркизи һөкүмити тәрипидин бейҗиңда ечилған "шинҗаң хизмәт йиғини" йиғин мәйданидин бир көрүнүш.
www.xinjiang.gov.cn Дин елинди.

Чәтәлләрдики уйғур паалийәтчилири мәзкур йиғин һәққидә өз пикирлирини оттуриға қоюп, пәқәт иқтисадни тәрәққий қилдуруш биләнла уйғур елидики мәсилини негизидин һәл қилғили болмайдиғанлиқини илгири сүрүшти.
 
Хитай мәркизи һөкүмити"5 - июл үрүмчи" вәқәсидин кейин, бултур 12 - айда баянат берип, бу йил 5 - ай мәзгилидә, "шинҗаң хизмәт йиғини" ечилидиғанлиқини җакарлиған иди. Һалбуки, хитай даирилири йиғин аяғлашқандин кейин, бейҗиңда 17 - майдин 19 - майғичә "шинҗаң хизмәт йиғини"ни ечилғанлиқини хәвәр қилди.

Шинхуа ахбаратида хәвәр қилинишичә, бу қетим ечилған "шинҗаң хизмәт йиғини" уйғур аптоном райони қурулғандин буян, мәркизи һөкүмәт тәрипидин тунҗи қетим ечилған мәхсус йиғин икән. Бу қетимлиқ йиғинда, хитай һөкүмити илгири үзлүксиз тәкитлинип келиватқан "ғәрбни ечиш истратегийсини әмәлгә ашурушта, районниң муқимлиқини сақлаш, 3 хил күчләрниң райондики бөлгүнчилик қилмишлириға зәрбә бериш" шоаридин пәрқлиқ һалда, "уйғур аптоном районида узун муддәтлик әминликкә капаләтлик қилиш үчүн, районниң иқтисадини йүксәлдүрүш" шоари оттуриға қоюлған. Йиғинда йәнә, райондики 12 вилайәт, област, 82 шәһәр, наһийә вә "ишләпчиқириш - қурулуш" армийисиниң 12 девизийисигә қарита, 19 өлкә -шәһәр "нишанлиқ ярдәм бериш" тәшәббуси музакирә қилинған.

Зияритимизни қобул қилған дуня уйғур қурултийи баянатчиси дилшат ришит әпәнди, "шинҗаң хизмәт йиғини"ниң мәқсити һәққидә тохтилип, бу йиғинниң әмәлийәттә хитай һөкүмитиниң мәнпәәти нуқтисидин ечилғанлиқини, бу йиғинниң уйғурлар мәнпәәти үчүн ечилмиғанлиқини билдүрди.

Дуня уйғур қурултийи ички ишлар мудири илшат әпәнди, хитай мәркизи һөкүмитиниң бу йиғинни ечишқа мәҗбур болушидики сәвәбләр һәққидә тохтилип, бултур 5 - июл уйғур елидә партлиған наразилиқ һәрикитиниң муһим сәвәбләрдин бири икәнликини илгири сүрди.

Дилшат ришит әпәнди йиғинда оттуриға қоюлған "районниң иқтисадини тәрәққий қилдуруш, нишанлиқ ярдәм бериш" тәшәббусиға нисбәтән өз қаришини оттуриға қойди. У сөзидә уйғурларниң сиясий һоқуқлириға игә болмай туруп, иқтисадий тәрәққият һоқуқлириға еришәлмәйдиғанлиқини илгири сүрүп, хитайни алдамчилиқ сиясити йүргүзүватқанлиқи билән әйиблиди.

Илшат әпәнди, йиғин ечилиштин илгири хитай мәркизи һөкүмитиниң йиғинда музакирә қилинидиған мәсилиләрни ташқи дунядин пинһан тутуши, шундақла йиғинға уйғурларниң һәқиқий әһвалини обдан билидиған, тәтқиқатчи илһам тохтиға охшаш уйғур вәкиллириниң қатнаштурулмиғанлиқи һәққидә өз қаришини оттуриға қойди. У сөзидә хитай даирилири бундақ йиғинни ечишта хитай һөкүмитиниң мәнпәәтини чиқиш қилғини үчүн, бу земинниң игилири болған уйғурларниң садасини аңлашни халимайдиғанлиқини илгири сүрди.

Илшат әпәнди бу қетимлиқ йиғинда оттуриға қоюлған, "уйғур аптоном районида узун муддәтлик әминликкә капаләтлик қилиш үчүн, районниң иқтисадини йүксәлдүрүш" тәшәббусиға нисбәтән өз қаришини ипадилиди. У сөзидә, нөвәттә хитай һөкүмитиниң районда узундин бери йүргүзүп келиватқан бастуруш сияситиниң хитайниң райондики мустәмликә сияситигә еғир зәрбә болғанлиқини һес қилғанлиқиниму қошумчә қилди.

Илшат әпәнди йәнә, йиғинда оттуриға қоюлған райондики 12 област вилайәт, 82 наһийә шәһәр һәм "ишләпчиқириш - қурулуш" армийисиниң 12 девизийисигә қарита, 19 өлкә - шәһәр "нишанлиқ ярдәм бериш" һәм "қәшқәрни ғәрбтики шенҗен қилип қуруп чиқиш" тәшәббуси һәққидә тохтилип, буниң хитай һөкүмитиниң райондики уйғурлар зич олтурақлашқан җайларни хитай өлкилиридики шәһәрләрдин пәрқсиз һаләткә кәлтүрүп, районға техиму көп көчмән йөткәш, райондики уйғур нопусини шалаңлаштуруш, уйғур миллитини ассимилятсийә қилип йоқитип, ахирқи һесабта бу қетимлиқ йиғинда оттуриға қойған, "районида узун муддәтлик әминликкә капаләтлик қилиш" нишанини һәқиқий әмәлгә ашуруш икәнликини илгири сүрди.

Нөвәттә хитай һөкүмитиниң бу йиғиндин кейин уйғур аптоном райониға қаратқан миллий сияситидә қандақ өзгириш болуши, һәм районға йеңидин бәлгиләнгән әмәлдар җаң чүншйәнниң районда сақлиниватқан мәсилиләрни қандақ бир тәрәп қилиши қатарлиқ мәсилиләр, райондики уйғур хәлқи вә хәлқара җәмийәт көзитиватқан муһим нуқтилардин болуп кәлмәктә.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикирләр (0)
Share
Толуқ бәт