Хоҗали вәқәси мунасивити билән әнқәрәдә намайиш өткүзүлди

Түркийиниң әң чоң аммиви тәшкилатлиридин бири болған кадирлар уюшмиси уюштурған бу намайишқа әзәрбәйҗанлиқлар, түркләр, ирақлиқ түркмән, қирим татарлири вә уйғурлардин болуп көп санда киши қатнашти.
Ихтиярий мухбиримиз әркин тарим
2012.02.27
Share on WhatsApp
Share on WhatsApp
sinan-ogan-xojali-namayish-305.jpg Хоҗали қәтлиами мунасивити билән әнқәрәдә өткүзүлгән намайишқа қатнашқан парламент әзаси синан оганниң қолида көк байрақ вә әзәрбәйҗан байриқи. 2012-Йили феврал, түркийә.
RFA/Erkin Tarim

1992-Йили, әзәрбәйҗанниң юқири қарабағ районидики хоҗали шәһиридә йүзбәргән қирғинчилиқ вәқәсиниң 20 йиллиқи мунасивити билән әнқәрәдики абди ипәкчи бағчиси билән бирләшкән дөләтләр тәшкилатиниң әнқәрәдики бинаси алдида намайиш өткүзүлди. Намайишни түркийиниң әң чоң аммиви тәшкилатлиридин бири болған кадирлар уюшмиси уюштурған болуп, намайишқа әзәрбәйҗанлиқлар, түркләр, ирақлиқ түркмән, қирим татарлири вә уйғурлардин болуп көп санда киши қатнашти. Булардин башқа парламент әзаси др. Синан оган, әзәрбәйҗанниң түркийидә турушлуқ әлчихана хадимлири вә бәзи сиясий партийә рәһбәрлиридин болуп көп санда киши қатнашти. Уйғурларға вакалитән әнқәрәдә паалийәт елип бериватқан шәрқий түркистан мәдәнийәт вә һәмкарлиқ җәмийити шөбиси мәсули хәйруллаһ әфәндигил әпәнди башчилиқидики бир гуруппа уйғур қатнашти.

xojali-namayish-uyghurlar-385.jpg
Хоҗали қәтлиаминиң 20 йиллиқи мунасивити билән әнқәрәдики абди йипәкчи бағчиси билән бирләшкән дөләтләр тәшкилатиниң әнқәрәдики бинаси алдида намайиш өткүзүлди. 2012-Йили феврал, түркийә.
RFA/Erkin Tarim

Намайишта кадирлар уюшмисиниң муавин башлиқи фаһрәттин йоқуш әпәнди сөз қилди. У алди билән хоҗали қәтлиами һәққидә тохтилип, әрмәнистан қораллиқ күчлириниң 1991-йили 10-айдин етибарән қоршап туруватқан хоҗали йезисиға, 1992-йили 2-айниң 26-күни киргәнликини, буниңдин 20 йил бурун йүз бәргән бу вәқәдә пәқәтла бир күн ичидә 63 бовақ, 106 аял, 70 яшанған әрләрдин болуп 613 кишиниң өлтүрүлгәнликини, 487 кишиниң еғир яридар болғанлиқини, 1275 кишиниң гөрүгә елинғанлиқини ейтти.

У сөзиниң давамида, сипрустики түркләргә елип берилған қәтлиамларни, гретсийә һөкүмитиниң ғәрбий тиракядики түркләргә елип бериватқан бесим сияситини, иран һөкүмитиниң ирандики түркий хәлқләргә, хитайниң шәрқий түркистандики уйғурларға елип бериватқан бесим сияситини һәргиз унтумайдиғанлиқи вә унуттурмайдиғанлиқини, буниң үчүн бу намайишни елип бериватқанлиқини тәкитлиди.

Намайиш җәрянида микрофонимизни парламент әзаси др. Синан оган әпәндигә узаттуқ. У өзи парламент әзаси болғандин кейин хоҗали мәсилиси тоғрисида түркийә парламентида қарар мақулланғанлиқини баян қилип мундақ деди:
“хоҗали қирғинчилиқи түрк дунясида мәйданға кәлгән әң чоң қирғинчилиқтин бири. Әпсуски 20 йилдин бери түркийидә бу қирғинчилиқ һәққидә қарар мақулланмиди. Һәр йили бу һәқтә йиғинлар чақираттуқ әмма муһим бир қарар мақуллиталайдиған күчимиз йоқ иди. Мән бу йил парламент әзаси болуп сайланғандин кейин, түркийә парламентиниң ташқи сиясәт комитетида бу һәқтә бир қарар мақуллаттуқ. 2-Айниң 28-күни парламенттики омумий йиғинда мән йәнә бу мәсилини күнтәртипкә елип келип қарар мақуллитишқа тиришимән.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.