23 - Март хотән аяллар намайиши: тутқунлардин бири һамилдар аял

23 ‏ - Март хотән аяллар намайишида тутқун қилинғанларниң әһвали һәққидә бүгүн йәни 21 ‏ - април күни һөкүмәт даирилиридин йәнә бир рәт әһвал игилидуқ. Бүгүнки игилишимиздә тутқунлардин бириниң һамилдар аял икәнлики, ай ‏ - күни йеқинлишип қалған болғачқа сорақ җәрянида җиддийлишип һушидин кәткәнлики ашкариланди.
Мухбиримиз шөһрәт һошур хәвири
2008-04-21
Share
Хотән айаллири Хотән айаллири. Сүрәт Youtube тин елинди. Source: Youtube
Youtube.com
 Бир мәсул хадимниң билдүрүшичә, һамилдар аял шәһәрлик аяллар бирләшмисиниң арилишиши билән шу күни сорақханидин шәһәрлик дохтурханиға елип берилған. Дохтурлар, һамилиниң баш сүйиниң меңип кәткәнликини вә әһвалниң хәтәрликликини билдүргән. Буниң билән һамилдар тутқун вилайәтлик дохтурханиға йөткәлгән. Әмма һамилдарниң униңдин кейинки әһвали мәлум әмәс.

Сақчи идариси: " биздә қийин - қистақ йоқ"

18 ‏ - Април йәни җүмә күни түркийидики шәрқи түркистан маарип җәмийити билән саадәт партийисиниң яшлар комитети хотәндики аял тутқунларни қоюп беришни тәләп қилип, истанбулдики хитай консулханиси алдида намайиш өткүзгәндин кейин, биз бу намайиштики тәләпләргә қарита хотән шәһәрлик сақчи идарисиниң пикрини соридуқ. Сақчи тәрәп тутқунларниң әһвалида әндишилинәрлик әһвал йоқлуқини қопаллиқ билән билдүрди.

Биз арқидин хотән вилайәтлик тәшвиқат идарисиға телефон қилип, тутқунларниң нөвәттики әһвалини соридуқ; мәсул хадим мәлум қилишқа тегишлик учурларниң һөкүмәт торида елан қилинғанлиқини, қалған мәлуматларни ашкарилашқа болмайдиғанлиқини вә мәхпийликини билдүрди.

Шәһәрлик һөкүмәттики йәнә бир мәсул хадим, вәқә йүз бәргәндин кейин һөкүмәтниң тәлим ‏ - тәрбийә хизмитини күчәйткәнликини вә вәқә йүз бәргән күни сорақxoten-ayalliri2-200.jpg Җәрянида һушидин кәткән бир һамилдар аялни өзлириниң дохтурханиға елип барғанлиқини билдүрди.

Һамилдар аял еғир хәтәргә дуч кәлгән, әмма ақивити мәлум әмәс

Бу мәсул хадим, вәқә сәзгүр мәсилә болғини үчүн, һамилдарниң кейинки әһвали һәққидә учур алалмиғанлиқини, бу учурларни сораш һоқуқи һәм йоқлуқини билдүрди.

Биз һамилдар тутқунниң вилайәтлик дохтурханиға йөткәлгәндин кейинки әһвалини игиләш үчүн, вилайәтлик аяллар бирләшмисигә телефон қилдуқ. Мәсул хадим бу һәқтә мәлумат берәлмәйдиғанлиқини билдүрди.
 
Хотән шәһириниң йәрлик һөкүмити аяллар намайишиға қатнашқан ғоллуқ унсурларни тутуп туруватқанлиқини баянатида етирап қилған болсиму, тутқунларниң сани вә әһвали һәққидики мәлуматни йошуруп кәлмәктә. Бизниң әйни чағдики игилишимиздә сақчи тармақлириға йеқин орунлар тутқунлар саниниң 600 киши икәнликини ашкарилиған иди.

Бизгә бүгүн мәлум болғини булардин пәқәт бириниң 23 ‏ - март күнидики әһвали болуп, униң һазирқи әһвали йәнила сир һаләттә турмақта. Һамилдар аялларда көрүлидиған баш сүйи меңип кетиш әһвалиниң тәсири һәққидә америкида яшаватқан уйғур дохтур меһриниса ханим мәлумат берип: " һамилдар аялда баш сүйи меңип кәткән әһвалда ана - бала һәр иккисиниң һаяти хәтәр астида болиду," деди.

Мана бу, намайишқа қатнашқан әмәс, сода иши билән намайиш әтрапида болуп қалған бир уйғур һамилдар аял тутқунниң әһвалидур.
 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт