Xu jintawning ' intérnét ehli bilen biwaste sözleshkenliki' heqqidiki inkaslar

Roytérs agéntliqining béyjingdin xewer qilishiche, xitay re'isi xu jintaw 6 ‏ - ayning 20 ‏ - küni intérnét arqiliq tordashlar biwaste sözliship, sorighan su'allirigha jawab bergen. Xitay kommunist partiyisining orgini 'xelq géziti' bu heqte élan qilghan maqaliside, re'is xu jintaw 221 milyon tor ehli bilen biwaste sözliship, 20 minut ichide soralghan su'allargha jawab berdi, xelqning awazini anglap, pikrini élishta munewwer ölge yaratti, dep bayan qilghan.
Muxbirimiz weli xewiri
2008-06-23
Share

'Rusiye xewer agéntliqi', xongkongdiki 'xitay xewer tori', 'makaw géziti' qatarliq uchur wastilirimu bu heqte obzor élan qilip, bu yéngi bir ewlad rehberning obrazi, intérnét junggoda peyda qilghan özgirishning emeliy pakiti, bu néme dégen ochuq - yuruqluq, rehbirimizning buningda qilghan sözlirini chuqum yaxshi anglash kérek, emdi junggo uchurliri pütün dunyada rawan tarqilidu, dep medhiye yaghdurdi.

'Xelq tori' üch yüz so'aldin üchni talliwalghan

B b s ning bayan qilishiche, xitayning'xelq tori' xu jintawning tor ehli bilen körüshüp, ularning su'allirigha jawab bergen körünüshini neq meydandin 5 minut körsetken. 'Xelq tori' ning widi'o qanal riyasetchisi tor ehli xu jintawgha qoyghan 300 so'aldin 3 ni talliwalghan.

Xewerde bayan qilinishiche xu jintaw tor ehlining su'allirigha jawab bérip 'xizmet aldirash bolghanliqi üchün, her küni intérnéttin paydilinalmaymen, emma purset chiqsila intérnétke kirip turimen'. Torgha kirgende dölet xewerliri we xelq'ara xewerlerni oquymen, tor ehli we dostlar qiziqiwatqan mesililerni we ularning bu heqtiki köz qarashlirini, partiyimizning we dölitimizning xizmitige qarita teklip bérishni xalaymen' dégen.

Xu jintawni xelqning pikirlirini intérnét arqiliq anglap derdige derman bolidighan ademmu?

Xewerde bayan qilinishiche, bu weqedin kéyin, xelq'arada xu jintawgha qarita téximu köp emeliy su'allar qoyuldi. Aldi bilen 'xelq'ara awan'gart géziti' bu heqte élan qilghan obzorida, intérnétni teqip astigha élip, dölette démokratik tüzüm tiklesh heqqide intérnétte erkin mulahize élan qilghan yaki muwapiq teklip - telep otturigha qoyghan kishilerni tutup türmige tashlawatqan xu jintawni xelqning teklip we pikirlirini intérnét arqiliq anglap, ularning derdige derman bolidighan adem, dep teswirleshning özi bir ghelite ish, dep bayan qilin'ghan.

Xu jintaw tor yazghuchilirining türmige tashliniwatqanliqini bilmeydu emes

Amérika awazining bayan qilishiche, péshqedem intérnét yazghuchisi tyen chi ependi obzorida, xu jintawning'tor ehlining pikirini anglashni xalaymen' dégini yaxshi ish bolsimu, emma kommunist partiyining we döletning birdin ‏ - bir bashliqi bolup turuwatqan xu jintaw intérnét torlirining qatmu - qat nazaret astigha éliniwatqanliqini, otturigha qoyulghan sezgür mesililerning chekliniwatqanliqini, tor betliride erkinlik we démokratiye heqqidiki mulahiziler chiqqan haman taqilip kéliwatqanliqini, tor yazghuchilirining türmige tashliniwatqanliqini bilmeydu emes. Bu nuqtidin éytqanda, xu jintawning dégen gepliri semimiy emes, dep körsetken.

Hökümet xiyanetchi emeldarlarni pash qilghan pikirlerni hemmidin bek chekleydu

Tyen chi ependining éytishiche, xitayda téléwiziye, radi'o, gézit, zhornallarning hemmisini hökümet kontrol qilidu. U xelqning minglighan - tümenligen tor betlirige tosaq qoyuwalghan. Hökümetning intérnét saqchiliri hemmila bette kéche - kündüz köz - qulaq bolup turidu. Xelqning pikrini, bolupmu xiyanetchi kommunist emeldarlirini pash qilghan pikirlerni xalighanche qirqip tashlaydu. Mushundaq qiliwatqanlarning rehbiri bolup turuwatqan xu jintawning intérnét heqqide dégen sözlirini ras gep dégili bolmaydu.
 
Sendungda xiyanetchi emeldarlargha chétilidighan 1 milyon 420 ming yüenlik inawetlik qerz délosi heqqide ikki yil erz qilip, sot mehkimilirining hel qilmay kéchiktürüshige uchrap kéliwatqan, bu heqte hetta xu jintawgha intérnét arqiliq teklip yézipmu anglitalmay kéliwatqan bir tijaretchining éytishiche, xu jintawning intérnét heqqide dégen bu gepliri pütünley aldamchiliq.

Tor ehli kommunist partiye özi sayliwalghan 'xelq wekili' emes

6 ‏ - Ayning 23 ‏ - küni erkin asiya radi'osi arqiliq obzor élan qilghan pu jzhchang ependining bayan qilishiche, intérnét hazirqidek téz tereqqiy qiliwatqan bu peytte, xu jintaw torgha kirip muhim söz qiptu. Xelqning chüshinishiche, 'rehberlerning muhim sözliri' déyilgen geplerning hemmisi bimene gepler, hökümet uyushturghan körünüshlerning hemmisi aldamchiliq.

Uning qarishiche, intérnét tori pütün dunyada hemme adem teng - barawer bolup pikir bayan qilidighan chong meydan. U semimiyetsizlikni qobul qilmaydu. Xu jintaw shuni bilishi kérekki, intérnét tori 'xelq géziti'ning muhakime munbiri emes yaki xu jintawla sözleydighan xelq sariyi emes . Tor ehli kommunist partiye özi sayliwalghan 'xelq wekili' yaki merkizi komitét ezaliri emes yaki kommunist rehberliri néme dése uninggha xushamet qilip turidighan ghalchilar emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet