Yaponiyining 'sazanami' namliq pachaqlighuch paraxoti xitay tupriqigha qedem basqanda qarshi élindi

Yaponiyining gherbiy xéroshima wilayitige tewe kure arili (küre arilini bundin ilgiri xitay hökümiti junggoning zémini dep kelgen idi) din kelgen 4 ming 650 tonniliq 'sazanami' namliq herbiy paraxoti, bügün 6 ‏ - ayning 24 ‏ - küni, xitay tupriqigha qedem basti.
Muxbirimiz weli xewiri
2008-06-24
Share

 Bu yaponiye herbiy qisimlirining ikkinchi dunya urushi ayaqlashqandin buyan tunji qétim xitay tupriqigha qedem basqanliqi bolup hésablinidu. Bu yaponiye paraxoti, pilan buyiche, xitayni besh kün ziyaret qilidu. Buningdin burun, sichüende apet yüz bergende, yaponiyining apetke uchrighan xelqqe yardem béridighan eshyalirini derhal neq meydan'gha yetküzüp bérish üchün herbiy ayropilan qollinishni xitay hökümiti ret qilghan idi.

'Sazanami' sichüende apetke uchrighan xelqqe yardem béridighan eshya élip keldi

B b s ning bayan qilishiche, yaponiye özini qoghdash etritining 'sazanami' belgilik pachaqlighuchisi bilen kelgen 240 neper déngiz jengchisi, sichüende apetke uchrighan xelqqe yardem béridighan eshyadin 300 dane ediyal we 2600 kishilik teyyar yémeklik we dora qatarliq jiddiy kéreklik eshya élip kelgen.

Fransiye agéntliqining bayan qilishiche, xitay tashqi ishlar minsitirliqining bayanatchisi lyu jenchaw bu qétim yaponiyining 'sazami' belgilik herbiy paraxotining xitayni ziyaret qilishi bultur 11 ‏ - ayda xitayning 'shénjén' belgilik bashqurulidighan bombigha taqabil turidighan herbiy paraxoti yaponiyini ziyaret qilghanliqigha qilin'ghan jawaben ziyaret, shunglashqa buninggha qarita héchqandaq ammiwiy ghezep qozghalmaydu, dep chüshendürgen.

Ikki millet otturisida chüshenche we öz - ara ishinish peyda bolushi mumkin

Yaponiyide chiqidighan 'sankéy géziti'de bayan qilinishiche, yaponiye mudapi'e ministirliqining bayanatchisi takashi sekiné yaponiye herbiy paraxotining xitayni ziyaret qilishi bultur xu jintaw yaponiyini ziyaret qilghanda muqimlan'ghan idi. Bu ziyaretning meqsiti yaponiye bilen xitay munasiwitini yaxshilashtin ibaret.

Gerche yapon - xitay munasiwitining yaxshilinishining undaq téz bolushini tesewwur qilghili bolmisimu, emma 'sazanami' xitaygha kirgendin kéyin ikki millet otturisida chüshenche we öz ‏ - ara ishinish peyda bolushi mumkin, dégen.

Yaponiyining özini qoghdash etriti sherqiy témorda we iraqta yaxshi obraz yaratqan idi

Amérika awazining bayan qilishiche, xitayning déngiz armiye général mayuri yang yi xelqni yaponiyining herbiy paraxotining yapon bayriqi ésip xitay tupriqigha qedem basqanliqini toghra chüshinishke chaqirghan. U sözide, tarixta yaponiyining tajawuzi gerche xitaygha éghir ziyan keltürgen bolsimu, u beribir tarixta ötken bir weqe bolup qaldi.

Yéqinqi tarixqa qaraydighan bolsaq, yaponiyining özini qoghdash etritining sherqiy témorda we iraqta élip barghan pa'aliyiti xelqqe yaxshi tesir qaldurdi, u özining intizamgha ri'aye qilidighan, edep we qa'idini bilidighan, bashqa döletke hürmet qilidighan herbiy qisimliq obrazini yaratti, dégen.

'Xelq géziti' éytqandek zor qalaymiqanchiliq yüz bermidi

Yerlik xelqning fransiye agéntliqigha éytip bérishiche, xitay da'iriliri deslepte yerlik orunlargha chiqarghan uqturushida, yapon paraxoti kelgende, 'agahlandurush belgisi' ésilishi lazimliqini tapilighan iken.

Xitayning 'xelq géziti'mu yaponiyining herbiy paraxoti junggo ziminigha qedem bassa, xelq ichide jiddiy qarshiliq yüz bérishi, hetta u zor qalaymiqanchiliqqa aylinishi mumkin, dep yerlik da'irilerni agahlandurghan idi.

Xewerde bayan qilinishiche, emeliyette, yaponiyining özini qoghdash etritining 'sazanami' namliq pachaqlighuchi paraxoti xitayning gu'angdungdiki jenjyang portigha kirgende, xitayning aq kiyimlik déngiz armiye eskerliri sep tüzüp qarshi alghan. Gerche yolning ikki teripige yaponiyining dölet bayriqi qadalghan bolsimu, yerlik xelqte, belki 'xelq géziti' éytqanning tetürische ish bolghan, héchqandaq qarshiliq hésyat yaki alamet körülmigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet