Yaponiyide "xitay kommunist partiyisi teripidin öltürülgen kishiler" namliq kitab neshr qilindi

Ghulja weqesining 14 yilliq xatire küni yéqinlishiwatqan künimizde, yaponiyining nopuzluq neshriyatliridin biri bolghan shyawgakkan neshriyati teripidin ataqliq zhurnalist we yazghuchi masaru soma ependi yazghan "xitay kommunist partiyisi teripidin öltürülgen kishiler" namliq kitab 239 bet, 9 babliq, qattiq muqawiliq qilip neshr qilin'ghan.

Mezkur kitabning aptori masaru soma ependi 1957-yili yaponiyide tughulghan, tokyo chet'el tili uniwérsitétining xitay tili fakultétini püttürgendin kéyin, amérikining jorj washin'gton uniwérsitéti we amérika xarward uniwérsitétlirida oqughan. Kéyin yaponiyidiki dangliq milletchi gézitlerdin biri bolghan sankéyi shinbun gézitide yaponiye ‏- xitay munasiwiti heqqidiki köpligen maqalisi élan qilin'ghan.

Uningdin bashqa, aptor eyni chaghda sankéy shinbun gézitining xongkongdiki tarmaq shöbisining mes'uli bolup xizmet ötigen. Aptor yézip neshr qildurghan "3 milyonluq xitay armiyisi we kéler qétimliq jeng" namliq esiri bilen "xarward uniwérsitéti oqughuchilargha yaponlarni mundaq ögitidu" namliq esiri 2001-yilliq yaponiyining meshhur eserler edebiyat mukapatigha érishken.

Aptorning yéqinda neshrdin chiqqan "xitay kommunistliri teripidin öltürülgen kishiler" namliq esiri yapon oqurmenlerning zor qiziqishini qozghighan muhim eserlerdin biri hésablinidiken.

Biz bu kitab heqqide téximu tepsiliy melumat élish üchün yaponiye kagoshima xelq'ara uniwérsitéti mutexessisi doktor haji qutluq qadiri ependi bilen téléfon söhbiti élip barduq.