Хитайда тарқитиливатқан японға қарши қутратқу

Хитай билән японийә оттурисида йүз бәргән арал маҗирасида, японийә хитай капитанини қоюп бәрди, лекин әпу сорашни рәт қилди. Хитай японийиниң 4 адиминиң3 ни қоюп бәрди, йәнә бирини қоюп бәрмиди, хитай японийигә сийрәк топа (йәршарида кәм учрайдиған йәр минераллири) експорт қилишни әслигә кәлтүрди, әмма рәсмийәтләрни қийинлаштурди.
Мухбиримиз вәли
2010-10-04
Share
Xitaygha-qarshi-Yaponluqlar-namayishi-305 Сүрәт, йапонлуқларниң йеқиндин бери елип барған хитайға қарши намайишлиридин көрүнүшләр.
RFA Photo / Сүрәтни чивлоң ишлигән.

Демәк биринчи басқучлуқ маҗирада ким йәңгәнлики вә ким йеңилгәнлики мәлум әмәс. Һазир һәр японийидә хитайдин нәпрәтлинидиған адәм сани көпийиватиду, хитайда болса, японға қарши нәпрәт қозғайдиған қутратқу тарқитиливатиду.

Йеқиндин буян хитайда, америкидики харвард университетида постдоктор болған, әнглийидики оксфорд университетида постдоктор болған, һазир шаңхәйдики хуйчуән ширкәт башқуруш мәслиһәт орниниң башлиқи болуп туруватқан, японийә һава қатниши," филипис", "кодак", "моторола", хитай електронлуқ учур - алақә ширкити қатарлиқ чоң ширкәтләргә мулазимәт қилған, хитайдики әң талантлиқ тәрғибатчи дәп тәсвирләнгән йүшивей исимлик бир шәхсниң, японға қарши қутратқулуқ нутқи интернет арқилиқ тарқиливатиду. Буни, худди тәйвәндә туруватқан мустәқил тәтқиқатчи, әркин асия радиосиниң обзорчиси лин бавхуа әпәнди тәһлил қилғандәк, һазир хитайда японға қарши нәпрәт қозғашни мәқсәт қилған қутратқуларниң тепик вәкили дәп аташ мумкин. Хитайчә тор гезитләрдә, һазир бундақ қутратқуларниң текистлири барла әмәс, бәлки елхәт арқилиқ тарқиливатиду, униң һәтта MP - 3 нусхилири бар икән.

'Әмди хитай дәрһал японға қарши урушқа тәйярланмиса, хитайлар өзиниң хан милләтликини йоқитип қойиду'

юқирида нами көрситилгән әрбабниң японға қарши нәпрәт қозғашни мәқсәт қилған қутратқуси мундақ дәп башлиниду: мән хитайда оқуғучиларға чиқарған имтиһан соаллириниң ичидә, "җаву уруши" дегән немә, бу урушта қандақ келишим имзаланған? японийигә қанчилик көмүш төләм бәргән? дегән соалларниң барлиқини көрдүм. Әмма японийигә берип көзәтсәм, японийә билән хитай йүз йилда бир қетим уруш қилиду, 19‏ - әсирдә йүз бәргән чиң сулалиси - японийә урушини хитайлар җаву уруши дәйду, бу урушта хитайлар йүз милйон сәр күмүш төләм бәргән, 20‏ - әсирдә йүз бәргән японийә - хитай урушини хитайлар сәккиз йиллиқ японийигә қарши уруш дәйду, дегәнләрни японийидә оқуғучилар аллиқачан ядқа билидикән. Бәлки 21‏ - әсирдә йүз беридиған уруш қачан болиду? ким йеңиду? ким йеңилиду? ким қайси җәһәттә үстүнлүккә игә? дегән соалларғиму, японийә оқуғучилири аллиқачан җаваб тепип, инчикә тәһлил қилип бопту. Әмди хитай дәрһал японға қарши урушқа тәйярланмиса, хитайлар өзиниң хан милләтликини йоқитип қойиду.

'Мушу әсирдә йүз беридиған хитай - японийә уруши 2015‏ - йилидин 2020‏ - йилиғичә партлайду'

Хитайдики йүшивей исимлик бу әрбабниң нутқида ейтилишичә, бу әсирдики хитай - японийә уруши 2015‏ - йилидин 2020‏ - йилиғичә партлайду. Униң тәсвирлишичә, тәйвән хитайниң қолиға өткәндин кейинла, японийиниң дунядин импорт қилған йеқилғуларни тошуйдиған деңиз йоли тақилип кетидикән. японийә өзиниң молокко араллири арқилиқ, җәнубий деңиз, тәйвән боғузи вә шәрқи деңиздин өтидиған қатнаш йолини қоғдаш үчүн, келоң билән гавшоңни муһасиригә алмақтин өзгә чарә йоқ икән. Бу чағда хитай деңиз армийиси японийигә қарши урушқа атлинидикән.

'Хитайға қарши уруш қилишниң 4 чоң сәвәби'

Йүшивей исимлик бу әрбаб хитай чоқум японийә билән уруш қилмиса болмайдиғанлиқиниң 4 чоң сәвәбини оттуриға қойған, униң баян қилишичә, японийә аллиқачан хитай билән уруш қилишқа тәйярлинип болди. Биринчидин, көмүрни йеқилғу қилмайдиған японийә, хитайниң шиҗаҗуаң, датоң, тәйюән шәһәрлиридин чиқидиған көмүрни импорт қилиду. японийә бу көмүрни немигә сәрп қиливатқанлиқини һечким билмәйду. Биз байқидуқки, японлар бу көмүрләрни семонт билән муқимлап, өзиниң деңиз қирғақлириға чөкүрүп сақлашқа башлиғили 30 йилдин ашти. японлар бу йеқилғу записини хитай билән уруш қилғанда қезип чиқирип ишләтмәкчи.

Иккинчидин, сүний һәмраһ арқилиқ көзәтсәң, японийә пүтүнләй йешил көрүниду, чүнки японла земинида өскән орманни кәсмәйду. 110 Милйон японниң 3 вахлиқ тамиқида қоллинидиған чокини хитайдин яғач импорт қилип ясайду. японлар уни ишлитип болғандин кейин қайтидин йиғип, униңдин қәғәз ясап хитайға сатиду. Хитай коммунист партийисиниң 'хәлқ гезити' японийиликләрниң түкүрүки арилашқан шу қәғәздә бесилиду.

Үчинчидин, йәр шарида кәм учрайдиған йәр минераллирини японийигә әрзан баһада сетип бай болған хитай байвәччилири, һәтта өйидики телевизорларниң екраниниң ашу сийрәк топида ясалғанлиқини һәргиз билмәйду. Бу калва хитай байвәччилири йәнә, әгәр сийрәк топини японийигә сетишни тохтатса, хитайниң нурғун санаити дәрһал ақсап қалидиғанлиқиниму билмәйду. Әмәлийәттә һазир хитайниң иқтисадий хәтәр ичидә.
 
Төтинчидин, мән йүннәнгә барсам, йирақ сәһралардики мәктәпләрдә қоллиниватқан үстәл, орундуқларниң, биркимгә бир тал чокиниму бикарға бәрмәйдиған японлар тәрипидин 'ианә' қилинғанлиқини көрдүм. Пүтүнләй хиянәтчиликкә берилип кетип, маарипқа мәбләғ салмиған хитай әмәлдарлириға шу оқуғучилар нәпрәтләнмәсму? уруш болса, улар японға қарши турарму? хитай һазир өзини қоғдайдиған әвладлардин айриливатиду.

Тохтимай уруш мәшиқи қиливатқан японларға хитай қандақ тәң келиду?

Йүшивей исимлик бу әрбабниң ейтишичә, японлар өзлирини 'биз икки пай оқ тегип өлмигән бөрә' дегинини аңлидиңму? қачанла болмисун 'япон - хитай достлуқи' дегән байрақни көтүрүветидиғанлиқини көрүватқансән? японлар аллиқачан тәйярлинип болди. Хитай хәлқтики қайси аңға тайинип уруш сәпәрвәрлики қилиду? японийигә қарап бақ, әскәрлирини дуняниң қәйиридә уруш мәшиқи қилидиған пурсәт болса, шу йәрдә мәшиқ қилдуруватиду. Парс қолтуқи урушида йүк тошуғучи қисимларниң көпинчиси япон иди. Афғанистандиму америка қисимлириға ярдәмлишиватқанларниң көпинчиси япон. Йеқинда пакистанда азрақ вәқә чиқиведи, шуни биртәрәп қилидиғанғиму япон кирди. Бундақ тохтимай уруш мәшиқи қиливатқан японларға хитай қандақ тәң келиду? шу қәдәр көп мәбләғ билән йетиливатқан япон әвлатлириға, хитай әвладлириниң әқлий сапаси тәң келәләмду? японийә өзиниң һәрбий қисимлирини 'қоғдиниш әтрити' дәп атап гәпни кичик қилған билән, әмәлийәттә униң деңиз армийисиниң сани һазир дуня бойичә америкидин қалса иккинчи орунда туриду.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт