Yaponiyidiki namayishta ay yultuzluq kökbayraq lepildidi

26 ‏ - April küni yaponiyige yétip kelgen meshel, namayishchilarning arqimu - arqa hujumigha uchridi.

 Murasim dawamida  béyjing olimpikini qollighuchi xitay namayishchilar bilen qarshi turghuchi namayishchilar arisida yene urush chiqti.  Bu künki namayishqa, ilham mexmut bashchiliqidiki bir türküm Uyghur we Uyghur dostliri qatnashti.

Namayishqa bir türküm Uyghur we Uyghur dostliri qatnashti

Mesh'el uzutush pa'aliyiti nagano sheherlik hökümetning aldidin bashlinip wakasato baghchisida axirlashqan. Jem'iy 18 kilométirliq musapide dawamlashqan. Mesh'el j r nagano istansisigha kelgende namayishtiki terepler arisida urush chiqqan. 4 Neper xitay namayishchi yarilan'ghan. Mesh'elge qarshi namayishchilardin 5 nepiri qolgha élin'ghan. Namayishqa qatnashqan Uyghur we Uyghur dostlirining sani 50 ke yéqin bolup, namayishtiki ay - yultuzluq kökbayraq, yapon metbu'atining alahide diqqitini tartqan.
 
Gerche yaponluqlarning sherqi türkistan mesilisige köngül bölüshi we qollishi yéngi ehwal bolmisimu, emma yaponiyide Uyghur siyasiy pa'aliyitining Uyghurlar  teripidin ashkara sehnige chiqishi yéngi bir yüzlinish. Ilham mexmut aldinqi ayda tokyodiki sakura téléwiziyiside sherqi türkistan mesilisini tonushturush bilen ashkara heriketke ötken idi. Shuningdin kéyin u köpligen yaponluqlarning qizghin qollishigha  érishken.

Mesh'el murasimigha tunji zerbe ibadetxanidin

Ilham mexmut,  aldimizdiki 1 ‏ - may küni tokyodiki sakura téléwiziyiside yene bir qétim programmigha qatnashmaqchi.  Programma xu jintawning yaponiye ziyariti bilen alaqidar bolup, bu programmida ilham mexmut yérim sa'et söz qilidu. U sözide sherqi türkistanning yéqinqi tarixi we hazirqi ehwali heqqide melumat béridu.

Béyjing olimpikining mesh'el  murasimigha tunji zerbe  zenkoji  ibadetxanisidin  kelgen.  Yaponiyidiki   tarixiy we sayahet orni bolghan  zenkiji  ibadetxanisi, eslide, mesh'el murasimining bashlinish nuqtisi qilip békitilgen. Emma ibadetxana rahibliri, xitayning tibettiki basturush heriketlirige qarita naraziliq meydanini ipadilesh üchün, murasimning ibadetxana aldidin bashlinishigha ruxset  bermigen.

Murasim rehberliri murasim bashlinishning axirqi minutlirida amalsiz nagano sheherlik hökümet aldini bashlinish nuqtisi qilip békitken.