Yaponiye Uyghur jem'iyiti xoten we qeshqer weqelirining heqiqiy ehwalini yaponiyiliklerge anglatti

Yaponiye Uyghur jem'iyiti xoten hem qeshqer weqelirining yüz bérish sewebliri hem Uyghurlar weziyiti heqqide teshwiq wereqiliri tarqitip, yaponiyiliklerge weqelerning héqiqi ehwalini anglatti.
Muxbirimiz méhriban
2011.08.18
ilham-mexmut-yapon-305.jpg Ilham mexmut ependi yaponiyede teshwiqat wereqilirini tarqitip yaponiyiliklerge Uyghur mesilisini tonutti. 2011-Yili 17-awghust
RFA

Dunyaning herqaysi döletliride bolghandek, yaponiyidimu xoten hem qeshqer weqesining héqiqi ehwalini anglitish pa'aliyiti élip bérildi. Yaponiye Uyghur jem'iyitining mes'uli ilham mexmut ependi radi'omiz ziyaritini qobul qilip, bu hepte yaponiyide ötküzülgen, 18-iyul xoten saqchixanigha hujum qilish weqesi hem 30-, 31-iyul künliri qeshqerde yüz bergen xitay saqchiliri hem puqralirigha hujum qilish weqesi heqqide élip bérilghan teshwiqat wereqilirini tarqitish pa'aliyiti we bu pa'aliyetning netijiliri heqqide toxtaldi.

Ilham mexmut ependi yaponiyide bu qétim élip bérilghan teshwiqat wereqilirini tarqitish pa'aliyitining yillardikidin netijilik bolghanliqini bildürüp, yaponiyide Uyghur mesilisige köngül bölidighan yaponiyiliklerning barghanche köpiyiwatqanliqini ilgiri sürdi.


Ilham mexmut ependining bildürüshiche, yéqinqi birnechche yildin buyan, yaponiye Uyghur jem'iyiti uyushturghan pa'aliyetlerge yaponiyidiki ammiwi teshkilatlar we Uyghur mesilisige köngül bölidighan yaponlar özlükidin kélip qatnishidighan hem yardemlishidighan keypiyat shekillen'gen.

Ilham mexmut ependi öz bayanida nöwette yaponiyiliklerde xitayning hökümet metbu'atlirida élan qilin'ghan teshwiqat xaraktéridiki xewerlerge ishenmeslik keypiyatining barghanche küchiyiwatqanliqini ilgiri sürdi. Ilham mexmut ependi bu heqte toxtilip, yaponiyiliklerning nöwette Uyghurlar weziyiti heqqidiki uchurlarni erkin asiya radi'osi qatarliq chet'el metbu'atlirining xewerliridin igileshke yüzlen'genliki üchün, yaponiye Uyghur jem'iyitining bu xil xewerlerni yapon tiligha terjime qilip, yaponiye Uyghur jem'iyitining tor békiti arqiliq yaponiyiliklerge anglitiwatqanliqini bildürdi.

Ilham mexmut ependi yaponiyide Uyghur mesilisining tonulushigha egiship, yaponiyidiki hakimiyet béshidiki siyasiy partiyilerning Uyghurlarning xitayda uchrawatqan herxil siyasiy, ijtima'iy bésimlirini tonup yetkenlikini ilgiri sürüp, yaponiyide oquwatqan hem xizmet qiliwatqan shundaqla sherqiy jenubiy asiya dölitige chiqqan Uyghurlarning, eger özige xitay hökümiti teripidin kélidighan tehditni ispatlisila Uyghurlarning yaponiyide siyasiy panahliq élish imkaniyitining hazirlan'ghanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.