Tokyoda Uyghur, tibet, mongghullar birlikte xitaygha qarshi namayish élip bardi

Xitay xelq jumhuriyiti qurulghandin buyanqi 63 yildin béri, xitay kompartiyisining Uyghurlar, mongghullar, tibetlikler üstidin yürgüzüp kéliwatqan milliy qirghinchiliqini eyiblesh we pash qilish meqsitide, yaponiyidiki Uyghurlar, mongghullar, tibetler we insanperwer yaponiyilikler tokyoda jem bolup, chong kölemlik namayish élip bardi.
Ixtiyari muxbirimiz qutluq
2012-09-29
Share
yaponiye-namayish-uyghur-tibet-mungghul-305.png Tokyodiki Uyghur, tibet, mongghullar birlikte xitaygha qarshi namayishtin bir körünüsh
RFA/Qutluq


Bu qétimqi namayishni mongghuliye erkin ittipaq partiyisi, ottura - asiya tetqiqat orni, jenubiy mongghuliye insan heqlirini qoghdash birliki, jenubiy mongghuliyige yardem bérish qurultiyi, "Yaponiye algha" teshkilatining memliketlik heriket komitéti teywen tetqiqat munbiri, yaponiye Uyghur jem'iyiti, we tibet mesilisini muzakire qilish uyushmisidin ibaret ammiwi teshkilatlar birliship orunlashturdi.

Namayish tokyo shehirining merkizi shinjuku rayonidiki kashiwagi baghchisida chüshtin kéyin sa'et 2:30 da bashlandi. Namayishchilar kochigha yürüsh qilishtin burun, orunlashturghuchi orunlarning mes'ulliridin da'ichin, turmuhammet hashim, mizushima, nagayama, kobayashi qatarliq ependiler sözge chiqip, xitaylarning yat milletlerge qiliwatqan tajawuzchiliqlirini qattiq eyiblidi. Namayishchilar tokyoning eng awat kochilirida Uyghur, tibet, mongghul bayraqlirini lepilditip xitayni eyibleydighan sho'arlarni towlap yürüsh qilip, sheher ahalisining diqqitini tartti.

Sa'et 3:30 da xitay bash elchixanisi aldida namayishchilar kötürenggü roh bilen sho'ar towlap özlirining naraziliq bildürüsh xétini xitay konsulxanisining derwazidiki xet sanduqigha sélip qoydi.

Bu qétimqi namayishqa jem'iy üch yüzdin artuq kishi qatnashqan. Biz namayish heqqide éniq melumat élish üchün, dunya Uyghur qurultiyining tetqiqat merkizining mu'awin re'isi, ottura - asiya tetqiqat ornining mes'uli doktor turmuhemmet hashim we Uyghurlarning yéqin dosti shira'ishi ependim we shundaqla tibetke yardem komitétining re'isi kobayashi ependiler bilen téléfon söhbiti élip barduq.

Doktor turmuhemmet hashim namayish heqqide toxtilip mundaq dédi:

Uyghurlarning yéqin dosti shira'ishi ependim bügünki namayish heqqide özining tesiratini bayan qilip mundaq dédi:

Bügünki tokyoda biz Uyghur, tibet, mongghul we yaponiyilikler birlikte nahayiti daghdughiliq namayish élip barduq. Namayishta Uyghur, tibet, mongghullarning bayriqi lepildep otturigha chiqti. Namayishqa Uyghur, tibet, mongghullarni qollaydighan kishilermu birlikte namayishqa qatnashti. Bu namayish tokyodiki shinjikudiki eng awat yéride ötküzüldi. We yapon xelqige yaxshi bir teshwiqat boldi. Men bügünki namayishni nahayiti yaxshi boldi dep oylaymen. Deydu.

Tibetke yardem bérish komitétining re'isi kobayashi ependim bu qétimqi namayishqa bolghan özining köz qarashliri bayan qilip mundaq dédi:

Men uzun yildin béri tibetke yardem bérip kelgen bir budda dining rahibi bolimen. Yaponiyide Uyghur, tibet, mongghul mesilisini awwal tibet mesilisini bilgendin kéyin yapon xelqi andin sherqiy türkistandiki Uyghurlarning mesilisini bildi. We Uyghurlargha köngül bölüshke bashlidi. Bolupmu xitay hökümitining sherqiy türkistanda élip barghan 46 qétimliq atom bombisi siniqigha yapon xelqi tolimu échinidu. Hazir yaponiyide Uyghur, tibet mongghul mesilisige köngül bölüsh we yardem bérish herikiti nahayiti ilgirilimekte. Deydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet