Японийә уйғур җәмийити бейҗиң олимпикиға қарши намайиш өткүзди

Икки һәптиниң алдида қурулғанлиқини елан қилған японийә уйғур җәмийити, түнүгүн хитайниң токйо әлчиханиси алдида , бейҗиң олимпикиға қарши намайиш өткүзгән. Намайишқа инсан һәқлири паалийәтчилири, ахбаратчилар вә бир қисим парламент әзалири болуп 150 тәк киши қатнашқан.
Мухбиримиз шөһрәт һошур хәвири
2008-06-25
Share

 Намайишчилар чаршәнбә күни саәт 11 әтрапида токйо шәһириниң мәркизи бағчисиға топланған; лозункилирида, хитайниң олимпик өткүзүш салаһийити йоқлуқини баян қилған намайишчилар,саәт 12 дә бағчидин хитай әлчиханисиға қарап йүрүш қилған . Йүрүш җәрянида икки нәпәр уйғур намайишчи, қоллириға койза , бойниға тахтай есилған көрүнүштә меңип , уйғур вәзийитидики җиддийликни билдүргән.

Намайишчилар хитай әлчиханиси алдиға кәлгәндә, японийә уйғур җәмийитиниң башлиқи илһам махмут намайишниң баянатини оқуп өткән. Илһам махмут баянатида,асаслиқ хитайниң бу нөвәт уйғур хәлқиниң ирадисигә хилап һалда, олимпик мәшилини уйғур районида айландурғанлиқини тәнқид қилған . У баянатида йәнә , хитайни уйғур райониниң вәзийити һәққидә дуняға сахта мәлумат беришни тохтитишқа; олимпик тәйярлиқи сәвәблик қолға елинғанларни қоюп беришкә чақирған. Намайишта икки нәпәр парламент әзасиму сөз қилип, хитайниң олимпикни тапшурувалған чеғида дуняға бәргән вәдисидә турмиғанлиқини тәнқид қилған. Илһам махмут япон хәлқиғә хитап қилип, уйғур мәсилисиниң хитайниң ички иши әмәс , бәлки хәлқаралиқ мәсилә икәнликини, японийиниң уйғурлар дуч келиватқан бастуруш һәрикәтлиригә тамашибин болуп қарап турмаслиқи керәкликини, японийиниң асияниң күчлүк вә демократик бир дөлити болуш салаһийити билән уйғур мәсилисигә арилишиши керәкликини билдүргән.

Бу қетимқи намайиш японийә уйғур җәмийитиниң тунҗи паалийити һесаблиниду. Җәмийәт башлиқи илһам махмут хитайға қарши сиясий паалийәтлирини өткән йилниң ахирида башлиған вә һазирға қәдәр японийиниң радио вә телевизийә қаналлирида бир қанчә қетим программиға қатнишип, уйғур мәсилисини японийә җәмийитигә тонуштурған иди. Илһам махмутниң бу паалийити қисқиғина вақит ичидә бир түркүм япон җамаитиниң қизғин қоллишиға еришкән вә у паалийитини техиму мунтизим елип бериш үчүн японийә уйғур җәмийитини тәшкиллигән иди. Униң билдүрүшичә, бу қетимқи намайишқа қетилған японлуқларниң бир қисми уйғур мәсилисини йеқинқи айлардин бери ахбарат васитиси арқилиқ тониғанлар, йәнә бирқисми болса, уйғур районини бурун зиярәт қилған вә уйғурларниң вәзийитини өз көзи билән көрүп кәлгәнләр.

Илһам махмут зияритимизни қобул қилғанда, японийидә шәрқи түркистан мәсилисини тонуштурушниң әһмийити үстидә тохталди. Униң билдүрүшичә, нөвәттә шәрқи деңизниң икки дөләт арисидики талаш - тартишлиқ районида байқалған нефитлик , запас миқдариниң көплики буйичә дуняниң 4 ‏ - чоң нефитлики. Арисида бу қәдәр чоң мәнпәәт тоқунуши болған икки дөләтниң мунасивитиниң кәлгүси тәрәққиятиниң парлақ болуши еһтималдин узақ. Униң үстигә японийә асияниң бирдин ‏ - бир күчлүк вә демократик дөлити. Илһам махмут сөз ахирида уйғур мәсилиси үчүн мана мушундақ әвзәлликкә игә бир дөләттә яшаш, бу дөләттә яшаватқан уйғурларға тәбиий һалда алаһидә бир мәсулийәтни йүкләйду дәп әскәртти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт