Talantliq yash yazghuchi hüseyin tash wapat boldi

Uning eserliri Uyghur oqurmenlirining bolupmu Uyghur yash oqurmenlirining söyüp oqushigha sazawer bolghan bolup, uning eserlirige baha bergüchiler "uning proza eserliri Uyghur edebiyatida tigishke bolmaydu dep qarilip kiliwatqan Uyghur rohiyitining nazuk qatlamlirigha bösüp kirip, ipadilesh qiyin bolghan nazuk tuyghularni chirayliq shekiller bilen ipadilep bergen " dep teripleshken idi.

Uning "yilan yilliq qiz"," hélimning hammisi", "aqqu", "ajirishish xitabnamisi", "yirkinish", " chingqi chüshtiki muhebbet" qatarliq powist, hékayiliri uning edebiy ijadiyitige wekillik qilidighan we uning edebiyattiki özige xas idiyiwiy köz qarishini ipadilep biridighan eserliri bolup, u bu eserliride Uyghur prozichiliqida dawamliship kiliwatqan en'eniwiy ijadiyet uslobini buzup tashlap, insan pisixkisi'idiki nazuk qatlamlargha yushurun'ghan, emma éytishqa jur'et qillalmaydighan xeterlik rayonlargha bösüp kirip, insanning ichki dunyasida zahir bolidighan sirlarni ashkarilashqa jur'et qilghan idi. U yash edip we oqurmenler arisida talantliq we jur'etlik yash yazghuchi dep teriplinishtin sirt, insani pezilet jehettimu özining xushchaqchaq, chiqishqaq mijezi bilen hörmetke sazawer idi.

Uning Uyghur edebiyatida kamdin - kam uchraydighan pisxik analiz timisidiki bir qisim eserliri, pütkili on yillarche bolghan romani we bir qisim neziriyiwiy maqaliliri xitay hökümitining teshwiqat idarisi teripidin qattiq kontrol qilin'ghan neshriyat, tehrir bölümler teripidin soghaq mu'amilige uchrap, oqurmenler bilen yüz körüshelmey ishkaplirida bésilip qalghan idi.

U bügün arimizdin waqitsiz ayrildi, u téxi yash idi. Uyghur rayonidiki éghir muhit bolghinish, Uyghur jem'iyitide yü biriwatqan éghir ijitima'iy mesi'ililer, Uyghur ziyaliylirigha kiliwatqan éytip tügetküsiz rohiy bésim, jismaniy charshash, jem'iyettiki tengsiz, adaletsiz mu'amililer uning qénigha zeher bolup quyuldi. U wijdanliq, heq - adalet köz qarishi éniq yazghuchi idi.

Hüseyin tash 1966 - yili 12 - ayning 22 - küni qeshqer toqquzaq nahiye bulaq suda tughulghan. 1985 - Yili qeshqer pidagogika inistitutining edebiyat fakoltitigha oqushqa kirgen. U mektepte oquwatqan chaghlardimu tirishchan, talantliq oqughuchilarning biri bolup, fakoltit oqughuchilar uyushmisining gholluq xadimlirining biri idi. 1989 - Yili oqush püttürüp ürümchi birinchi awghust polat - tümür shirikitige qarashliq orta mektepke teqsim qilin'ghan, 1994 - yili polat - tümür gézitige yütkilip, taki hayatining axirghiche shu yerde tehrir, bash tehrir bolup ishligen. U talantliq yazghuchi bolupla qalmay yene, iqtidarliq qorqmas tehrir idi, u bashqa tehrir bölümliri ishlitishke jür'et qilalmighan nurghun eserlerni öz gézitide ilan qilip, oqurmenlerning alqishigha sazawer bolghan idi. Mesilen "erkinlikte ölüsh" hékayisi buning tipik bir misalidur.

Uning ölümi yéngi zaman Uyghur edebiyati üchün zor yoqitish boldi. Uning ölümi Uyghur élide qatmu - qat meniwiy zulum asitida yashawatqan Uyghur ziyaliylirining tipik paji'esidur. Bügünki künde Uyghur élide her xil rak we yürek kiselliri bilen ölüp kitish Uyghur ziyaliyliri duch kiliwatqan éghir bir aqiwettur.