Xitaydiki tehditlik atalghu-yawa kepter
2011.05.11

Xelq'ara kechürüm teshkilati shwétsiye shöbisining orunlashturushi bilen stokholimdiki énxédé kutupxanisida 9-maydin 12-mayghiche türmidiki yazghuchilar, muxbirlar, insan heqliri küreshchiliri we ayallar hoquqini qoghdighuchilar témisida oqurmenlerge muhakime yighini uyushturushni bashlighan idi. Pa'aliyetning birinchi küni türmidiki yazghuchi nurmuhemmet yasin'gha béghishlan'ghan bolup, uning “Yawa kepter” namliq hékayisi xelq'ara kechürüm teshkilati shwétsiye shöbisi teripidin shiwét tiligha terjime qilin'ghan.
Pa'aliyetning béshida xelq'ara kechürüm teshkilati teripidin powér poyint programmisida ishlen'gen Uyghurlargha munasiwetlik höjjet körsitildi. Höjjette Uyghurlargha da'ir muhim nuqtilar qisqiche tonushturulghandin sirt, Uyghurlar duch kéliwatqan siyasiy bésimlar, medeniyet jehettiki assimilyatsiye tehditi, xitay hökümiti tekitlewatqan “Xitayda peqet bir millet bar, u bolsimu jungxu'a milliti” dégendek bimene, emma xeterlik teshwiqatning mahiyiti qatarliq muhim mezmunlar eks etken.
Kéyin kechürüm teshkilatidiki anna teripidin nurmuhemmet yasin heqqide uchur bérildi we uning “Yawa kepter” namliq hékayisining shwédche tékisti oqup ötüldi. U nurmuhemmet yasin heqqide toxtalghanda, türme shara'itining ziyade nachar bolush sewebidin hazir nurmuhemmet yasinning salametlik ehwalining nacharliqini we u mushu alte yil jeryanida a'ilisidikiler bilen peqet bir qétimla yüz körüshüsh pursitige érisheligenlikini tekitlep ötti.
U mundaq deydu: burun bu hékayining shwédche terjimisi bolmighanliqi üchün shiwét xelqi bu hékaye heqqide köp uchurgha ige emes idi, emdi uni küchep teshwiq qilishqa tirishimiz.