Yawropadiki mongghul aktipliri amistérdamda namayish qildi

Mergen isimlik mongghul charwichining xitay teripidin öltürülgenlikige qarita shilin'ghol nahiyiside qozghalghan naraziliq namayishi, xitay saqchi-armiyeliri teripidin qanliq basturush xewpige duch kéliwatqan bügünki künde, yawropada yashawatqan mongghul aktipliri gollandiyining amistérdam shehiridiki dam meydanida toplandi.

30-May sa'et 12 de qollirida bayraq we lozunkilarni kötürüwalghan mongghul namayishchilar türlük mezmunlarda sho'arlarni towlap, xelq'araliq teshkilatlar we organlargha xitab qilip, ularni bigunah mongghul xelqining qirghin qilinishigha yol qoymasliqqa chaqirdi.

RFA/Pidaiy

Bu munasiwet bilen ziyaritimizni qobul qilghan mongghul pa'aliyetchiliri yétekchisi tingchingchu ependi meqsitini ipadilep: mongghul yaylaqlirini qoghdash yolida qurban bolghan qehrimanimizning xun dewasi bilen qozghalghan shilin'ghol namayishi xeterlik peytte turmaqta. Shu sewebtin yawropadiki mongghul xelq partiyisining bashliqi bolush süpitim bilen, yawropadiki dostane teshkilatlirimizning hemrahliqida pa'aliyitimizni amistérdamgha merkezleshtürduq. Bizge medet bérip yéqindin qollap kelgen Uyghur we tibet qatarliq teqdirdashlirimizgha chin könglümdin rehmet éytimen, dédi.

Bu qétimqi pa'aliyetke xitay, tibet we Uyghur qatarliq milletlerning aktiplirimu qatnashqan bolup, bu milletlerning birleshme namayishi zulum astida ingrawatqan mezlumlarning xitay mustemlikisige we diktatorliqigha qarshi atlan'ghan ortaq meqsitini ipadiligen.

Pa'aliyet ishtirakchiliridin uzundin biri aktip pa'aliyet qilip kéliwatqan gheyretchan rozi we bextiyar nasir qatarliq ependilermu öz chüshenchilirini bayan qildi.