Яврупа парламентида 'хитайдики демократийиниң 60 йиллиқи' намлиқ хәлқаралиқ илмий муһакимә йиғини өткүзүлди

Хитай һөкүмити 10 - айниң 1 - күни дөләт қурулғанлиқиниң 60 йиллиқини, уйғур вәтинидә болса, "шиняң уйғур аптоном райони" қурулғанлиқиниң 54 йиллиқини тәбрикләш мурасими өткүзмәкчи боливатқан бир чағда, яврупа бирлики буниңға қарши бир күн бурун, йәни 9 - айниң 30 - күни яврупа парламентида "хитайдики демократийиниң 60 йиллиқи" намлиқ хәлқаралиқ илмий муһакимә йиғини өткүзүп, 60 йилдин буян хитай коммунист һөкүмитиниң хитай, шәрқий түркистан вә тибәттә елип барған инсан һәқлири дәпсәндичиликини әйиблигән.
Мухбиримиз әкрәм
2009.10.01
Share on WhatsApp
Share on WhatsApp
Rabiye-xanim-yawropa-Libo-Roucek-ependi-305.jpg Сүрәттә, рабийә ханим вә д у қ рәһбәрлири йаврупа парламентиниң муваин рәси либор роуҗәк билән биргә.
RFA Photo / Ekrem

Бу йиғинға яврупа парламентниң муавин рәиси идвард әпәнди риясәтчилик қилған. Йиғинға яврупа бирликиниң рәһбәрлири, мәшһур сиясәтчиләр, хәлқара мутәхәссисләр, кишилик һоқуқ тәшкилатлириниң вәкиллири, уйғурлар, тибәтликләр вә фалунгоңчиларниң вәкиллири болуп 150 тин артуқ киши қатнашқан.

Бу йиғинға уйғурларға вакалитән д у қ баш катипи долқун әйса әпәнди тәклипкә бинаән қатнишип, шәрқий түркистанниң омуми вәзийити тоғрулуқ әтраплиқ доклат тәқдим қилиш пурситигә еришкән.

Долқун әйса әпәнди хитайниң бу байрам күнини уйғурларниң "матәм күни" дәп қарайдиғанлиқини вә уйғур вәтинидә аптоном район қурулғили 54 йил болған болсиму, уйғур хәлқиниң бу һоқуқтин қилчә бәһриман болалмиғанлиқини, уйғурларниң демократик һәрикәтлириниң изчил қанлиқ рәвиштә бастурулуп кәлгәнликини тилға елиш билән биргә, 5 - июл қанлиқ қирғинчилиқидин кәң мәлумат бәргән.

Йиғинда йәнә яврупа парламентиниң парламент әзалиридин томас.Ман, ива ханим, грам ватсун қатарлиқ кишиләр уйғурлар, тибәтликләр вә фалунгоңчилар һәққидә доклат тәқдим қилған. Далай ламаниң яврупа бирликидики вәкили пашиваңҗи, фалунгоңчиларниң вәкили манюән қатарлиқларму хитай һөкүмитиниң 60 йилдин бери елип барған сияситини әйибләп доклатлар тәқдим қилған.

Доклат тәқдим қилиш ахирлашқандин кейин, йиғин иштиракчилири уйғурлар, тибәтликләр вә фалүнгоңчилар тоғрулуқ соал сорап, хитайдики омуми вәзийәт тоғрулуқ ичкириләп мәлуматлар игилигән.

Долқун әйса әпәнди йәнә һәр саһә хәлқара мухлисларниң зиярәтлири қобул қилип, хитайниң сиясәтлирини әйиблигән вә дуня җамаәтчиликиниң уйғурларниң нөвәттики паҗиәлик тәқдиригә көңүл бөлүш мәҗбурийити барлиқини тәкитлигән.

Д у қ баш катипи долқун әйса әпәнди йәнә, хитай дөләт байримидин бир күн бурун чақирилған хитайға қарши бу йиғинниң әһмийити тоғрулуқ тохталди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт