Явропа шәрқий түркистан маарип җәмийитиниң хизмәтлири давам қилмақта

Голландийидә қурулған “явропа шәрқий түркистан маарип җәмийити” 2011-йили 1-айниң 1-күни голландийиниң һарлим шәһиридә, йиллардин бири давам қиливатқан айлиқ сөһбитини елип барди.

Бу қетимқи сөһбәт адәттин ташқири бир қизғинлиқ ичидә өткүзүлгән болуп, түркийидики “ шәрқий түркистан маарип вә һәмкарлиқ җәмийити” рәһбири абдулһәкимхан мәхсумниң тәсирлик нутқи иштиракчиларни һаяҗанға салди. Абдулһәкимхан мәхсумһаҗимниң иттипақлиқ, һәмкарлиқ, пидакарлиқ, тәқвалиқ, мәсулийәтчанлиқ, һошярлиқ, тәдбирлик болуш һәққидики кәң даирилик пикирлири һәммәйләнни қайил қилди. Гәрчә икки саәттин артуқ давам қилған болсиму наһайити қисқа билингән бу сөһбәт, аңлиғучиларға нисбәтән қиммәтлик пурсәт болуп қалди.

RFA/Arslan

Сөһбәт иштиракчисидин бири бу һәқтә инкасини билдүрүп: "устазимиз абдулһәким мәхсумһаҗимниң муһим тәвсийилирини аңлап наһайити һаяҗанландим. Вәтән дәвасини қилиш үчүн шәрқий түркистанлиқ һәрқайси тәшкилат вә шәхсләрниң бирлик-баравәрлик вә һәмкарлиқ асасида бирләшсәк, бу ишни бир башқа елип чиққили болидиғанлиқидин ибарәт бир һәқиқәтни тонуп йәттим." Деди.

“ шәрқий түркистан маарип вә һәмкарлиқ җәмийити” ниң икки әзиз меһмини шветсийидә ечилған “шималий явропа ислам бирлики” ниң йиллиқ муһакимә  йиғиниға тәклип қилинған болуп, дуняниң һәрқайси җайлиридин кәлгән мусулман қериндашларға шәрқий түркистан вә уйғурларға алақидар көп тәрәплимә мәлумат бәргән вә наһайити яхши тәсир қалдурған. Улар қайтиш пурситидә явропадики қериндашлирини зиярәт қилиш нийити билән голландийигиму кәлгән һәм “явропа шәрқий түркистан маарип җәмийити” бу қетимқи айлиқ сөһбитигә меһман сүпитидә қатнашқан.