Yawropa sherqiy türkistan ma'arip jem'iyitining xizmetliri dawam qilmaqta

Gollandiyide qurulghan “Yawropa sherqiy türkistan ma'arip jem'iyiti” 2011-yili 1-ayning 1-küni gollandiyining harlim shehiride, yillardin biri dawam qiliwatqan ayliq söhbitini élip bardi.

Bu qétimqi söhbet adettin tashqiri bir qizghinliq ichide ötküzülgen bolup, türkiyidiki “ Sherqiy türkistan ma'arip we hemkarliq jem'iyiti” rehbiri abdulhekimxan mexsumning tesirlik nutqi ishtirakchilarni hayajan'gha saldi. Abdulhekimxan mexsumhajimning ittipaqliq, hemkarliq, pidakarliq, teqwaliq, mes'uliyetchanliq, hoshyarliq, tedbirlik bolush heqqidiki keng da'irilik pikirliri hemmeylenni qayil qildi. Gerche ikki sa'ettin artuq dawam qilghan bolsimu nahayiti qisqa bilin'gen bu söhbet, anglighuchilargha nisbeten qimmetlik purset bolup qaldi.

RFA/Arslan

Söhbet ishtirakchisidin biri bu heqte inkasini bildürüp: "ustazimiz abdulhekim mexsumhajimning muhim tewsiyilirini anglap nahayiti hayajanlandim. Weten dewasini qilish üchün sherqiy türkistanliq herqaysi teshkilat we shexslerning birlik-barawerlik we hemkarliq asasida birleshsek, bu ishni bir bashqa élip chiqqili bolidighanliqidin ibaret bir heqiqetni tonup yettim." Dédi.

“ Sherqiy türkistan ma'arip we hemkarliq jem'iyiti” ning ikki eziz méhmini shwétsiyide échilghan “Shimaliy yawropa islam birliki” ning yilliq muhakime  yighinigha teklip qilin'ghan bolup, dunyaning herqaysi jayliridin kelgen musulman qérindashlargha sherqiy türkistan we Uyghurlargha alaqidar köp tereplime melumat bergen we nahayiti yaxshi tesir qaldurghan. Ular qaytish pursitide yawropadiki qérindashlirini ziyaret qilish niyiti bilen gollandiyigimu kelgen hem “Yawropa sherqiy türkistan ma'arip jem'iyiti” bu qétimqi ayliq söhbitige méhman süpitide qatnashqan.