D u q rehberliri alahide yighin chaqirip pa'aliyet pilanini özgertti

Dunya Uyghur qurultiyi re'isi rabiye qadir bashchiliqidiki dunya Uyghur qurultiyi rehberliri 1-ayning 20-künidin 2-ayning 4-künigiche gollandiye, bélgiye, fransiye, shwétsiye, norwégiye, finlandiye we gérmaniye qatarliq 7 döletke ziyaret élip bérip nahayiti muhim pa'aliyetlerni élip barghan idi.

Bu pa'aliyet jeryanida dunya Uyghur qurultiyi re'isi rabiye qadir xanim, mu'awin re'isi séyit tümtürk ependi, mu'awin re'isi esqer jan, dunya Uyghur qurultiyi bash katipi dolqun eysa, teshwiqat merkizi mes'uli ferhat memet, bash teptish nurmemet rozi'axun we dunya Uyghur qurultiyining yawropa parlaméntidiki wekili memet toxti qatarliq kishiler 1-ayning 26- küni bélgiyide alahide yighin chaqirip dunya Uyghur qurultiyining buningdin kéyinki pilanini tüzüp chiqqan.

RFA/Erkin Tarim

Biz bu yighin we d u q rehberlirining yawropadiki 7 dölette élip barghan ziyariti heqqide xulase pikirlirini élish üchün d u q rehberliri bilen söhbet élip barduq.

Dunya Uyghur qurultiyining yawropa parlaméntidiki wekili memet toxti radyomizgha qilghan sözide, d u q rehberlirining bu qétimqi ziyariti d u q ning yawropa parlaméntigha wekil teyinligendin kéyinki tunji ziyariti bolup, yawropa parlaméntidiki aliy derijilik emeldarlarning ikkisining d u q hey'itini qobul qilghanliqini, yawropa parlaméntida qeshqer toghrisida chaqirilghan ilmiy muhakime yighinidin kéyin yawropa parlaméntida qeshqerni qoghdap qélish qarari maqullinish aldida turghanliqini éytti.

D u q mu'awin re'isi séyit tümtürk ependi bolsa, d u q rehberliri bélgiyide ötküzgen aliy rehberler yighinida dunya Uyghur qurultiyining xizmet pilanigha bezi özgertishlerni kirgüzgenlikini éytti. U radyomizgha qilghan sözide duq bundin kéyinki pa'aliyetlirini amérika bilen yawropani merkez qilghan halda asiya, ottura sherq döletlirigimu yéyishni qarar qilghanliqini bildürdi.