Abdul'ehet hajim yawropa ziyariti heqqidiki tesiratlirini bayan qildi

Ularning bu qétimliq ziyariti heqqidiki tesiratliri we gollandiyidiki ziyaretliri heqqide mezkur jem'iyetning bash katipi abdul'ehed hajimni ziyaret qilduq.

U, bu qétimliq ziyaretliride ularni hayajan'gha salghan ishlardin shwétsiyide échilghan shimaliy yawropa islam birliki yighinida sherqiy türkistanning ehwali teswirlen'gen filim qoyulup tesir peyda qilishi, finlandiyidiki Uyghurlarning 400 kwadrat métirliq bir orunni ijarige élip, xizmetlirini tertiplishi we gollandiyidiki Uyghurlarningmu muqim we musteqil bir yer hazirlap, ewlad terbiyisi üchün hémmet qilishliridek tilgha élip ötüshke tégishlik xushxewerlerge shahit bolghanliqidin söyün'genlikini bildürdi.

RFA/Pidaiy

U yene so'allirimizgha jawab bérip: shimaliy yawropa islam birliki yighinigha qatniship qolgha keltürgen netijiliri heqqide toxtaldi. Uning bildürüshiche, mezkur yighin'gha ishtirak qilish jeryanida, nurghun teshkilatlarning wekilliri we meshhurlar öz ‏- ara uchriship, ular arisida qoyuq munasiwet peyda bolushqa bashlighan.

U yene yillardin biri anglighan-körgenliri asasida asiya we yawropadiki muhajir Uyghurlarning teqdiri heqqidiki sélishturma közitishlirini anglatti.

Uning texmin qilishiche؛ xitaylar yawropa tupraqliridiki iqtisadi sahelerge tesir qilalisimu, yawropadiki insan heqlirining éghir salmaqni igilishi seweblik, asiya memliketliridiki muhajir Uyghurlar duch kéliwatqan xeterlik qismetlerning yawropa tupraqlirigha qol sozup kélish mumkinchiliki bir qeder uzaq we yenggil bolidiken.

Axirida, sherqiy türkistan ma'arip we hemkarliq jem'iyitining bash katipi abdul'ehet hajim bilen ötküzgen söhbitimizning söz témisi gollandiyige merkezleshti. U gollandiyidiki siyasiy panahlan'ghuchi Uyghurlarning teqdiri heqqidiki köz qarashlirini izahlap, panahliq ishlirining tesliship kétishide panahliq tiligüchi Uyghurlarning semimiyiti we sewiyisining muhim orunda turidighanliqini bildürdi.