Yaxshiliq we dunyaning chayanliri

- Bir yaxshiliq söyer danishmen adem déngiz boyida olturup, allah ta'alaning déngizdiki we etraptiki güzel sen'etlirini we qudretlirini tepekkur qiliwatatti. Shu arida bir chayan ömilep kélip déngizgha chüshüp kétidu we suning éqishining tetürige özini qutquzush üchün qattiq kücheydu, emma sudin chiqishni béjirelmeydu. Bu waqitta héliqi adem chayan'gha ich aghritidu, uni sudin qutquzushqa bel baghlaydu we qolini sozup chayanni qutquzup qélish üchün tutqinida, uning qolini chéqiwalidu, adem chayanni tashliwétip qolini tartiwalidu. Birer minut ötmestin ademning közi yene chayan'gha chüshidu, köngli yene birdinla érip kétip uni qutquzghusi kélidu - de, qolini chayan'gha sozup uni tutqinida chayan yene uning qolini chéqiwalidu. Yene uni tashliwétip qolini tartiwalidu, bu qétim qoli bek aghriydu. Üchinchi qétim yene chayanni qutquzush üchün temshelginide, yénida olturghan bir yash uninggha “Siz qandaq ibret almaydighan ademsiz? ikki qétim qolingizni chéqiwalghan chayanni yene qutquzimen dep özingizge ziyan yetküzemsiz?” deydu. Emma danishmen uning sözige psent qilmay yene chayan'gha qolini sozidu we axiri uni sudin qutquzup chiqip déngiz boyigha qoyup béridu.

Uningdin kéyin danishmen kishi héliqi yashning yénigha bérip uning mürisini tutup turup: “Ey oghlum! chayanning xaraktéri chéqish, méning xaraktérim söyüsh we yardem qilish tursa, men qandaqmu xaraktérimni uning xaraktrigha boysundurimen” deydu. Siz nurghun kishilerge yaxshiliq qilip ulardin yamanliqtin bashqini körmigen bolishingiz mumkin. Bu ehwal sizni insanlargha yaxshiliq qilishtin tosup qalalamdu? yaq. Yaxshiliq qilish ésillikning alamitidur. Birawning pezilitini étirap qilish, yaxshiliq qilghuchigha rehmet éytish adimiylikning alamiti bolup, qelbning süzüklükidin dérek béridu. Bir - birige yaxshiliq qilish, qolidin kelgen yardemni sunush we yaxshiliq qilghuchining yaxshiliqini qayturush arqiliq insanlar arisidiki muhebbet - dostluq we yéqinliq ashidu. Yaxshiliq qilishning chéki yoq. Yaxshiliq cheksiz, minnetsiz we ikkilinishsiz qilinidighan pezilettur.

Qandaq qilghanda özingizni yaxshiliqqa adetlendüreleysiz?

Maqalide yene mundaq dep yézilghan:

- Insan yaxshiliq qilish yolida bezi qiyinchiliqlargha, tosqunlargha uchrap turidu. Mesilen: sizning yaxshiliqingizni we yardimingizni körgen insanlardin sizge yamanliq kelgende, eger siz küchlük iman'gha, mustehkem iradige we sewr - taqetke ige bolmisingiz, bir andila yaxshiliq qilishtin sowup qélishingiz, hetta waz kéchishingiz mumkin. Chünki, insanlardin ash bergen qazanni chéqip tashlaydighan tuz koz, nan bergen qolni chishleydighan it méjez ademlermu az emes.

Yaxshiliqni dawam qidurushqa yardemchi bolidighan amillar

Maqalide yaxshiliqni dawam qildurushqa yardemchi bolidighan amillar heqqide töwendikiche yézilghan:

1. Sizning bashqilargha yaxshiliq qilishingizni yaratquchining emri dep bilishingiz lazim. Chünki yaratquchi hemmige yaxshiliq qilghuchi we bizlernimu yaxshiliqqa buyrighan zat. Qur'an kerimde “Allah sanga yaxshiliq qilghandek senmu bashqilargha yaxshiliq qilghin”, “Yaxshiliqning mukapati peqet yaxshiliq bolidu” dep kelgen. Her kimge yaxshiliq qilish allah ta'alaning emri bolghan iken, bash üstige dep bu emrni orundishingiz sizning imaningizning teqezzasidur.

2. Yaratquchining sizge ata qilghan ata - ihsanliri, németliri we yaxshiliqliri bilen sizning bashqilargha qilghan yaxshiliqliringizni sélishturup körüng. Bu waqitta sizge yaratquchi teripidin qiliniwatqan yaxshiliqlarning qanchilik köp we chongluqini, sizning bashqilargha qilghanliringizning héchnerse emeslikini hés qilalaysiz shundaqla sizning bashqilargha qilghanliringizmu uning yardimi we hidayiti bilen bolghanliq étibari bilen uning yaxshiliqi hésablinidu.

3. Qur'an kerimdiki yaxshiliqqa buyrighan ayetler bilen peyghember eleyhisslamning bu heqtiki hedislirining menisini bilip, tilingizgha hemishe jari qildurung. Shundaq qilsingiz, özingizde sizni hemishe yaxshiliqqa ündep turidighan türtkini hasil qilisiz.

4. Qandaqla bir yaxshiliqning mukapati chong bolidighanliqini estin chiqarmasliq. Bundaq qilish elwette yaxshiliqni köp qilishqa türtke bolidu. Allah ta'alaning yaxshiliq qilghuchilargha qilghan wedilirini eske élish yaxshiliqqa türtke bolidu.

Insanlargha yaxshiliq qilghuchilar bu dunyada uning paydisini choqum köridu. Yaxshiliq qilidighan ademlerning yüzi yoruq, gépi ötkür, shan - shewkiti yuqiri bolidu. Mundaq ademni herkim hörmetleydu we söyidu.