Или һөкүмәт даирилириниң яйлақ екологийисини яхшилаш уқтурушида, хитай көмүркан ширкәтлириниң бузғунчилиқи тилға елинмиди

Или областлиқ һөкүмәт даирилири 2011-йили 16-июн уқтуруш чиқирип, област тәвәсидики яйлақ екологийисини яхшилаш үчүн, чарва беқиш чәклинидиған яйлақ көлиминиң кеңәйгәнликини уқтурди.
Мухбиримиз меһрибан
2011.06.23
charwa-meydani-305.jpg Уйғур елидики яйлақ. 2008-Йили 15-июн.
AFP

Уйғур аптоном район даирилири бу йил әтияз мәзгилидә уйғур аптоном райони даирисидики бир қисим яйлақларда мал беқиш чәклинидиғанлиқини уқтурғандин кейин, уйғур елиниң һәрқайси җайлирида бу уқтуруш әмәлийләштүрүлүшкә башлиған. 4-Айдин башлап или областидики һәрқайси наһийиләрму айрим-айрим уқтуруш чиқирип, бундин кейинки 5 йил ичидә или тәвәсидики бир қисим яйлақларда чарва беқишниң чәклинидиғанлиқини уқтурған иди.

Или областлиқ һөкүмәт өткән һәптә йеңидин уқтуруш чиқирип, или областиға қарашлиқ 51милйон 292 миң 600 мо даиридики яйлақтин 4 милйон 400 миң мо даиридики яйлақта чарва беқиш чәклинидиғанлиқини уқтурди. Уқтурушта нарат яйлиқи, моңғулкүрә яйлиқи, тоғрису яйлиқи қатарлиқ җайлардики яйлақ һәм тағ районлирида бу йилдин башлап чарва беқиш чәклинидиған орман көлиминиң әслидики 25% тин 35%ke кеңәйтилидиғанлиқини, мал беқиш чәклинидиған отлақ көлиминиң әслидики 30% даиридин 70% даиригә кеңәйтилидиғанлиқи оттуриға қоюлди. Уқтурушта йәнә чарва беқиш чәкләнгән яйлақларда чарвичиларға һәр йили һәрбир мо йәр үчүн 50 йүән хәлқ пули әтрапида төләм берилидиғанлиқини, или областиниң яйлақ екологийисини яхшилаш үчүн 617 милйон 940 миң йүән хәлқ пули мәбләғ аҗратқанлиқини билдүрди.

Или областлиқ һөкүмәтниң уқтурушида яйлақ екологийисини яхшилашта районда чарва беқиш сәвәблик бузғунчилиққа учраватқан яйлақларни қоғдаш мәсилиси оттуриға қоюлған. Әмма, бултур ечилған “шинҗаң хизмәт йиғини” дин кейин, райондики мол көмүр записини ечиш үчүн, или областиниң ғулҗа наһийиси, моңғулкүрә наһийиси, нилқа һәм күнәс қатарлиқ наһийиләргә йеңидин йәрлишип, деһқан чарвичиларниң терилғу йәр һәм яйлақлирини мәҗбури игиливалған хитай ширкәтлири тәрипидин зади қанчилик яйлақ вә терилғу йәрниң бузғунчилиққа учриғанлиқи һәққидә һечқандақ мәлумат берилмигән.

Радиомиз зияритини қобул қилған или уйғурлири болса, икки йилдин буян или тәвәсигә сирттин кәлгән хитай ширкәтлириниң йәрлик һөкүмәтниң янтаяқ болушиға тайинип, или районидики деһқан-чарвичиларниң зор көләмдики терилғу йәр һәм яйлақларни әрзан баһада сетивелип, бу йәрләрдә көмүр кан қатарлиқ түрлүк кан қурулушлири елип берип, деһқанларниң тирикчилик мәнбәсини үзүвәткәндин сирт, нурғунлиған терилғу йәр һәм яйлақларни вәйран қилип, райондики су мәнбәлирини булғап, или райониниң екологийилик муһитиға еғир тәсир йәткүзгәнликини инкас қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.