Йәкән базиридики бир түркүм аһалиләр, хитай даирилири билән ғәвғалишип икки бинани чеқилиштин тосуп қалди
Мухбиримиз шөһрәт һошур
2012.04.13
2012.04.13

ngm.nationalgeographic.com Дин елинди.
Мәлум болушичә, түнүгүн йәни 12 - април күни йәкән базарлиқ өй чиқиш әтрити мәзкур икки бинаниң әтрапиға йип тартип, бинани чеқишқа һәрикәт қилған. Буниң билән сәйчи кәнтидики 100дин артуқ киши бина әтрапиға топлинип, өй чеқиш әтрити вә даириләр билән ғәвғалашқан вә топа иттириш машинисиниң алдини тосуп қаршилиқ көрсәткән. Ғәвға күчәйгәндә, вәқәниң ақивитидин әндишә қилған хитай даирилири ахири аһалиләрниң ирадисигә бойсунушқа мәҗбур болған вә өй чеқиш әтритини вақтинчә қайтуруп әкәткән.
Һөрмәтлик радио аңлиғучилар, түнүгүн йәни 4 - айниң 12 - күни, йәкән наһийә базириниң сәйчи кәнтидики аһалиләр вә базарлиқ һөкүмәт даирилири арисида ғәвға йүз бәргән. Ғәвға чүштин кейин саәт 4 тин 7гә қәдәр 3 саәт давам қилған.
Мәлум болушичә, вәқәниң сәвәби мундақ. Сәйчи кәнти 1984 - йили йәр тәқсим қилғанда, һәр бир аилидин 2 пуңдин йәр қисип қелип, җәмий 132 мо йәрни колликтипниң мүлки қилип бекиткән вә бу йәрдин қилинған киримни аһалиләргә тәң тәқсим қилишқа келишкән. Келишим бойичә, бу колликтипкә тәвә йәрниң 16молуқ бир парчисиға бир меһманхана вә вә бир хизмәт бинаси салған вә кирим қилишқа башлиған. Йәкәндә йәр баһаси өрлигәндин кейин, даириләр бу икки бинани бир хитай ширкитигә сетивәткән. Әмма сетишта, бурунқи келишимгә путунләй хилап һалда, аһалиләрниң мақуллиқиниму алмиған, аһалиләргә һечқандақ һәқму бәрмигән.
Түнүгүн сәйчи кәнтниң аһалилири қаттиқ бир мәйдан қаршилиқ көрсәткәндин кейин, наһийә рәһбәрлири вәқәгә дәрһал арилашқан, вәқәниң ақивитидин қорққан наһийә рәһбәрлири базарлиқ һөкүмәт әмәлдарлирини ишни чоңайтмаслиққа агаһландурған. Сақчи вә өй чаққучиларни мәйдандин тарқитивәткән.
Һөрмәтлик радио аңлиғучилар, гәрчә сәйчи кәнтиниң аһалилири түнүгүнки қаршилиқлирида қисмән нәтиҗә қазанған болсиму, әмма, икки тәрәп арисидики мәсилә йәни бу икки бинаниң пулини қандақ вә қанчиликтин тәхсим қилиш мәсилиси техи һәл болмиған.