Йәмән рәиси ели абдулла салиһ сақлиқи әслигә кәлгәндин кейин йәмәнгә қайтмақчи

Өткән җүмә күни йәмән рәиси ели абдулла салиһниң қараргаһи йәмәнлик намайишчилар тәрипидин топқа тутулғанда, рәис салиһ ярилинип, сәуди әрәбистан пайтәхти риядқа кәлтүрүлгән иди.
Ихтиярий мухбиримиз өмәрҗан
2011.06.07
yemen-namayish-salih-305.jpg Йәмән намайишчилири рәиси ели абдулла салиһниң сәудидин қайтип келишигә қаршилиқ билдүрүп намайиш қилмақта. 2011-Йили 6-июн.
AFP

Хәвәрләргә асасланғанда, йәмән рәиси салиһ 2011-йили3-июн җүмә кечиси қараргаһида йүз бәргән бомбардиманда, еғир дәриҗидә яриланған, йүзи вә боюнлири көйүп кәткән. Һазир ели абдулла салиһ сәуди әрәбистанида давалиниватмақта икән. Тән сақлиқи әслигә кәлгәндин кейин, йәнә йәмәнгә қайтидикән.

Йәмән рәиси өзи колиған ориға өзи чүшти

Қатарниң “әл җәзирә” телевизийә қанилиниң хәвиригә асасланғанда, йәмән рәиси ели абдулла салиһ йәмәндики һөкүмәткә қарши инқилабчиларниң бирдин-бир қоллиғучиси вә мәшһур әһмәр қәбилисиниң ақсақили садиқ әһмәрниң өйини бомбардиман қилған иди. Мәзкур бомбардиманда садиқ әһмәрни өлтүрүш пиланланған болсиму, қәбилә башлиқи бу һуҗумда сақ қалған вә ели абдулла салиһниң қараргаһиниму шундақ бомбардиман қилип, ибрәтлик интиқам алидиғанлиқини сөзлигән. Раст дегәндәк, аридин бир һәптиму өтмәстин, йәмән рәиси ели абдулла салиһниң қараргаһи бомбардиман қилинип, рәистин башлап хели көп мәсуллар яриланған, буларниң ичидә өлгәнләрму бар икән. Әһмәр қәбилисиниң ақсақили шу күни баянат елан қилип, бомбардиманниң мәсуллуқини үстигә алған.

Йәмәндин кәлгән бүгүнки хәвәрдә, ели абдулла салиһниң муавини дөләт ишлирини башқурмақта, әһмәр қәбилисидин өлтүрүлгән үч адәм сәвәблик мәзкур қәбилә билән һөкүмәт тәрәпниң уруш тохтитиш сүлһиси бузулғандәк көрүнмәктә икән. Чүнки садиқ әһмәргә көрә, һөкүмәт даирилириниң униң адәмлирини өлтүргәнлики сүлһини бузғанлиқиниң сигнали икән.

Йәмәнликләр рәис салиһни халимайду

Қатарниң “әл җәзирә” телевизийә қанилиниң йәмәндики мухбири әһмәд шәләфи 2011-йили7-июн сәйшәнбә күни йәмән пайтәхти сана шәһиридин бәргән баянатида мундақ деди: “йәмән рәиси һуҗумға учриғандин кейин, йәмәндики намайишчилар һәр тәрәптә хушаллиқ тәнтәниси қилған иди. Бүгүн рәис салиһниң сәуди әрәбистанидики давалиниши ахирлашқандин кейин, йәмәнгә қайтидиғанлиқи һәққидики хәвәр тарқилиши билән намайишчилар йәмән рәисиниң йәмәнгә қайтишиға қарши милйон кишилик намайишқа чиқишқа тәйярланмақта.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.