Қәшқәр шәһиридики йеңи мәһәллә-нурбағму чеқилмақчи

Хитай һөкүмити қәшқәр шәһиридики қәдимий кочиларни чаққанда йәр тәврәшкә чидамлиқ өй селип бериш шоари билән иш елип барған иди.
Мухбиримиз шөһрәт һошур
2011-03-16
Share
qeshqer-cheqilish-asrash-305.jpg Билгинидә қәшқәр қәдимий шәһәр һәққидә илмий муһакимә йиғини өткүзүлди. 2011-Йили 25-январ.
RFA

Мәлум болушичә, нөвәттә чеқиш пиланланған мәһәллиләрдин бири нурбағ болуп, нурбағ қәшқәрдики йеңидин бәрпа болған мәһәлләрдин бири; бу мәһәллидики өй-имарәтләрниң йәр тәврәшкә бәрдашлиқ берәлмәслик мәсилиси мәвҗут әмәс. Шуңа нурбағ дики аһалиләр нурбағдин көчүшни рәт қилмақта. Даириләр болса аһалиләрни нурбағдин көчүшкә зорлимақта.

Аңлиғиниңлар, қәшқәр шәһиридики чеқилиши пиланланған нурбағ мәһәллисиниң тәсвири. Нурбағдики аһалиләр бу мәһәллини йеқинқи 20йил ичидә бәрпа қилған. Мәһәллидә, 400 әтрапида аилә, 2000 әтрапида нопус мәвҗут. Хитай һөкүмити бу мәһәллини чеқип, орниға қәвәтлик бина салидиғанлиқини, өйи чеқилған аилиләргә бу бинадин өй беридиғанлиқини билдүргән. Әмма аһалиләр болса, өйлириниң чеқилишиға қарши.

Нөвәттә аһалиләр, мәһәллисиниң миллий қияпитиниң бузуветилишидин башқа, қәвәтлик бинада олтурушниң чиқимлиридинму әндишә қилмақта. Чүнки мәһәллидики кишиләрниң көпинчиси ушшақ тиҗарәтчи. Аһалиләрниң инкаслиридин мәлум болушичә, қәшқәрдә нопусниң тез көпийиши, мал баһасиниң өрләп кетиши, қәшқәрдики уйғурларниң турмушидики қийинчилиқларни еғирлаштурмақта. Күндилик турмушини аран дегәндә қамдап кетиватқан бу кишиләр, мәһәллисигә селинидиған егиз биналарниң өзлиригә яхшилиқ елип келидиғанлиқиға ишәнмәслик билән бирликтә; көчмән еқинидинму әндишә қилмақта.

Нөвәттә даириләр бу мәһәллидики аһалиләргә бәзидә қаттиқ тәдбирләрни қоллинип, өйлиридин көчүшкә мәҗбурлимақта. Мәһәллә ақсақаллири мәзкур пиланға наразилиқ билдүрүп алақидар органларға барған. Даириләр буларниң бәзилиригә көпрәк пул бериш, бәзилирини болса тәһдит селиш арқилиқ, шикайәт қилиштин ваз кәчтүргән. Әмма аһалиләрниң көпинчиси көчүшни рәт қилиш позитсийисидә чиң турмақта.

Даириләр икки айниң алдида мәһәллидә өлчәш вә тизимлаш хизмити елип барған, 4-айниң оттурилири мәхсус йиғин ечип, аһалиләрни көчүшкә йәнә бир қетим буйруқ чүшүрмәкчи. Бәзи аһалиләр, уйғур райониниң партком секретари җаң чүншйәнниң бейҗиңда икки йиғин давамида қилған сөзлиридин үмидләнгән. Булар җаң чүшйәнгә әһвални мәлум қилип, мәһәллисиниң чеқилишиниң алдини алмақчи.

 Нурбағ мәһәллисиниң чеқилиши, хитай мәркизи һөкүмитиниң қәшқәрни кичик шенҗенға айландуруш пиланиниң бир қисми, әмма җәмийәттә тарқалған гәпләр арисида, мәзкур пилан, хитай өй-земин содигәрлири билән қәшқәрдики йәрлик даириләр арисидики йәң ичи бир содиниң нәтиҗиси. Бу хил гумандикиләрниң қаришичә, нурбағ мәһәллиси шаңхәйдики бир өй-земин ширкитигә сетиветилгән; ширкәт болса йәрлик даириләргә бир йүрүш һәқсиз өй беришкә вәдә бәргән. Һазирғичә бу сөзләрниң тоғрилиқини испатлайдиған пакитлар мәвҗут әмәс. Әмма, хитай әмәлдарлириниң чириклик вәзийити мәзкур қарашниң тоғрилиқ еһтималиға ишәндүрүватқан амиллардин биридур.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт