Türkiyide sherqiy türkistan fondining yéngi rehberlik hey'iti saylap chiqildi

Türkiye sherqiy türkistan fondining yéngi re'isi ilghar alptekin. 2011-Yili 11-féwral. Türkiye.

Sherqiy türkistan fondi 1978-yili Uyghurlarning lidiri merhum eysa yüsüp aliptékin teripidin qurulghan. 1986-Yili sherqiy türkistan fondining re'islikige dem élishqa chiqqan général memet riza békin saylan'ghan. 2010-Yili 2-ayning 16-küni général memet riza békin wapat bolghandin kéyin, hamut göktürk ependi waqitliq sherqiy türkistan fondining re'islik wezipisini ötep kelmekte idi.

2-Ayning 5-küni türkiye jumhuriyiti wexpiler qanuni boyiche sherqiy türkistan wexpining hayatta bolghan qurghuchi ezaliridin rasim jinisli, mustafa qochaq, memet niyaz turfani, muniridin elemdar, ayqut edibali, férit edibali we sherqiy türkistan fondining tunji bashqurush hey'iti ezaliridin erkin aliptékin, ilghar aliptékin we arslan alptékinler istanbulda yighin chaqirip, yéngi rehberlik hey'itini saylap chiqti.

RFA/Erkin Tarim

Yighin'gha qatnashqan qurghuchi ezalirining köpining awaz bérishi bilen ilghar aliptékin sherqiy türkistan fondining re'islikige, eser saqa türkistanli xanim mu'awin re'islikke, babur xatip'oghlu bash katipliqqa saylandi. Bulardin bashqa sabiq d u q re'isi erkin aliptékin, arslan aliptékin, xeyrunnisa elemdar, enqere hajette uniwérsitéti oqutquchisi doktor erkin ekrem, enqere uniwérsitéti til we tarix jughrapiye fakultéti oqutquchisi doktor erkin emet qatarliq kishiler sherqiy türkistan fondining bashqurush hey'iti ezaliqigha saylandi. Sherqiy türkistan fondi rehberliri 2-ayning 11-küni istanbulda murasim bilen wezipe tapshuruwalmaqchi.

Ilghar aliptékin ependi 1970-yili türkiye awi'atsiye shirkitide xizmet bashlighan. U 2003-yili dem élishqa chiqquche bolghan 33 yil jeryanida türkiye awi'atsiye shirkitining se'udi erebistanning jidde shehiride, jenubiy afriqida, qirghizistanning bishkek shehiride we yaponiyining tokyo shehiride turushluq ish béjirish ishxanilirining mudiri bolup ishligen. Hazir türkiyining samsun shehiride yashimaqta.

U radi'omizgha qilghan sözide 33 yil türkiye üchün xizmet qilghanliqini, buningdin kéyinki hayatida pütün küchi bilen sherqiy türkistan üchün xizmet qilidighanliqini éytti.