Хитай ширкәтлири йәкән деһқанлириниң йәрлирини игилимәктә

Йәрлирини әрзан баһада сетишқа мәҗбур қилинған деһқанларниң наразилиқи барғанчә күчәйгән. Мәлум болушичә, йәрлиридин айрилип қалған нәччә онлиған деһқан, өткән айда йәкән наһийилик һөкүмәт үстидин әрз қилиш үчүн бейҗиңға кәткән.

Йәкән уйғур сәидийә дөлитиниң пайтәхти болуп, уйғур елиниң ғәрбий җәнубий қисмиға җайлашқан. Йәкән наһийисидә 7 базар, 22 йеза болуп, омумий йәр көлими 7960 квадрат километир келиду. 2003-Йилдики нопуси 620 миң 791 нәпәр болуп уйғур елидики әң чоң наһийиләрниң бири.

Йеқиндин буян йәкәндин игилигән учурлиримиздин мәлум болушичә, йәкән наһийилик һөкүмәт икки йилдин буян, һалқима тәрәққият райони қуруш баһанисидә, йәкән деһқанлириниң йәрлирини хитай өлкилиридин шаңхәй, шәндуң қатарлиқ җайлардин кәлгән хитай ширкәтлиригә әрзан баһада сетип беришкә башлиған.

Йәкән наһийисидин зияритимизни қобул қилған бир уйғурниң билдүрүшичә, бултурдин буян йәкәнниң там өстәң йезиси, качуң ачал базири, орда өстәң кәнти, җайкейәк кәнти қатарлиқ җайлардин нәччә миң мо йәр хитайниң шаңхәй шәһиридин келип йәкәнгә орунлашқан хитай ширкәтлиригә әрзан баһада сетип беришкә мәҗбурланған.

Бу кишиниң билдүрүшичә, йәкән наһийилик һөкүмәт деһқанларниң йәрлирини шу йәрниң базар баһасидин көп төвән баһада хитай ширкәтлиригә сетип беришкә мәҗбурлиғини үчүн, деһқанларниң наразилиқи келип чиққан. Бу кишиниң баян қилишичә, өткән айда нәччә он деһқан йәкән наһийилик һөкүмәт үстидин әрз қилиш үчүн бейҗиңға кәткән.

Йәкән наһийилик һөкүмәт тор бетидин мәлум болушичә, йәкән наһийилик һөкүмәт бу йил йәкән наһийисидики 7 йезиға 46 милйон790 миң йүән мәбләғ селип, зор көләмлик заманиви деһқанчилиқ мәйдани бәрпа қилишни пиланлиған. Хәвәрдә йәнә 2011-йил 2-айниң ахириға қәдәр бу деһқанчилиқ мәйдани үчүн 20 милйон йүән мәбләғ сәрп қилинғанлиқи, әслидики 680 парник ремонт қилинип, йери мунбәт, сүйи әлвәк болған йәкәнниң тәңритағниң җәнубидики әң чоң көктат вә мевә ишләпчиқириш орниға айландурулидиғанлиқи баян қилинған. Әмма хәвәрдә бу деһқанчилиқ мәйдани қурулуши үчүн кетидиған йәр көлими һәққидә ениқ мәлумат берилмигән.

Радиомиз йеқинқи икки йилдин буян уйғур елидин игилигән учурлардин мәлум болушичә, уйғур елиниң һәрқайси наһийилиридә уйғур деһқанлириниң йәрлири йәрлик һөкүмәт даирилириниң мәҗбурлиши билән, уйғур елигә йәрлишиватқан хитай ширкәтлири тәрипидин түрлүк баһаниләр билән игиливелинғанлиқи үчүн, йәрлик уйғурларниң наразилиқи барғанчә ешип бармақта икән.