Xitay shirketliri yeken déhqanlirining yerlirini igilimekte

Yekendiki Uyghurlarning radi'omizgha inkas qilishiche, bulturdin bashlap yeken déhqanlirining yerliri her xil namlar bilen xitay ölkiliridin kelgen shirketler teripidin igiliwélinishqa bashlighan.
Muxbirimiz méhriban
2011.04.29
Share on WhatsApp
Share on WhatsApp
dehqan-305.jpg Uyghur élidiki déhqanlar.
RFA

Yerlirini erzan bahada sétishqa mejbur qilin'ghan déhqanlarning naraziliqi barghanche kücheygen. Melum bolushiche, yerliridin ayrilip qalghan nechche onlighan déhqan, ötken ayda yeken nahiyilik hökümet üstidin erz qilish üchün béyjinggha ketken.

Yeken Uyghur se'idiye dölitining paytexti bolup, Uyghur élining gherbiy jenubiy qismigha jaylashqan. Yeken nahiyiside 7 bazar, 22 yéza bolup, omumiy yer kölimi 7960 kwadrat kilométir kélidu. 2003-Yildiki nopusi 620 ming 791 neper bolup Uyghur élidiki eng chong nahiyilerning biri.

Yéqindin buyan yekendin igiligen uchurlirimizdin melum bolushiche, yeken nahiyilik hökümet ikki yildin buyan, halqima tereqqiyat rayoni qurush bahaniside, yeken déhqanlirining yerlirini xitay ölkiliridin shangxey, shendung qatarliq jaylardin kelgen xitay shirketlirige erzan bahada sétip bérishke bashlighan.

Yeken nahiyisidin ziyaritimizni qobul qilghan bir Uyghurning bildürüshiche, bulturdin buyan yekenning tam östeng yézisi, kachung achal baziri, orda östeng kenti, jaykéyek kenti qatarliq jaylardin nechche ming mo yer xitayning shangxey shehiridin kélip yeken'ge orunlashqan xitay shirketlirige erzan bahada sétip bérishke mejburlan'ghan.

Bu kishining bildürüshiche, yeken nahiyilik hökümet déhqanlarning yerlirini shu yerning bazar bahasidin köp töwen bahada xitay shirketlirige sétip bérishke mejburlighini üchün, déhqanlarning naraziliqi kélip chiqqan. Bu kishining bayan qilishiche, ötken ayda nechche on déhqan yeken nahiyilik hökümet üstidin erz qilish üchün béyjinggha ketken.

Yeken nahiyilik hökümet tor bétidin melum bolushiche, yeken nahiyilik hökümet bu yil yeken nahiyisidiki 7 yézigha 46 milyon790 ming yüen meblegh sélip, zor kölemlik zamaniwi déhqanchiliq meydani berpa qilishni pilanlighan. Xewerde yene 2011-yil 2-ayning axirigha qeder bu déhqanchiliq meydani üchün 20 milyon yüen meblegh serp qilin'ghanliqi, eslidiki 680 parnik rémont qilinip, yéri munbet, süyi elwek bolghan yekenning tengritaghning jenubidiki eng chong köktat we méwe ishlepchiqirish ornigha aylandurulidighanliqi bayan qilin'ghan. Emma xewerde bu déhqanchiliq meydani qurulushi üchün kétidighan yer kölimi heqqide éniq melumat bérilmigen.

Radi'omiz yéqinqi ikki yildin buyan Uyghur élidin igiligen uchurlardin melum bolushiche, Uyghur élining herqaysi nahiyiliride Uyghur déhqanlirining yerliri yerlik hökümet da'irilirining mejburlishi bilen, Uyghur élige yerlishiwatqan xitay shirketliri teripidin türlük bahaniler bilen igiliwélin'ghanliqi üchün, yerlik Uyghurlarning naraziliqi barghanche éship barmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.