Sabiq mu'awin re'is yüsüp eysani wezipisidin qaldurushqa seweb dep qariliwatqan 49-nomurluq mexpiy höjjet ashkarilandi

Amma arisida tarqalghan gep-sözlerde bolsa, yüsüp eysaning ürümchide yüz bergen chong bir milliy heqsizliq mesiliside Uyghurlar terepte turghanliqi, yeni mezkur mesile heqqide mexsus muzakire yighini échip, mesilini hel qilish heqqide höjjet chiqarghanliqi؛ shuningdin kéyin xitay hökümitining uninggha guman bilen qarap wezipisidin élip tashlighanliqi bayan qilinip kelmekte idi. Yéqinda bir radi'o anglighuchimiz yüsüp eysaning wezipisidin élip tashlinishigha seweb boldi dep qariliwatqan ene ashu höjjetning tepsiliy mezmuni heqqide melumat berdi.

1994-Yili, ürümchide dollar tijariti bilen shughulliniwatqan muhemmet seypidin isimlik bir tijaretchi, dungbéyliq wu yawping isimlik bir aldamchi teripidin pichaq sélip öltürülidu. Wu yawping neq jinayet meydanida tutulup türmige tashlinidu we 1995-yili ölümge höküm qilinidu, biraq höküm ijra qilinishtin awwal qatil türmidin qéchip kétidu. Ziyankeshlikke uchrighan a'ile bu naheqchilikke berdashliq bérelmeydu.

Bu weqe Uyghur jem'iyitide küchlük ghulghula peyda qilidu, ölgüchining akisining nale-peryadi ablet abduréshittin, isma'il emetke qeder barliq Uyghur rehberlerning quliqigha yétip baridu. Emma, ulardin quruq hésdashliqtin bashqa chare tépilmaydu. Axiri, mu'awin re'is yüsüp eysa weqege qol tiqidu we töwendiki idarilerning mes'ullirini yighin'gha chaqiridu.

Yüsüp eysa yighinni xulasilep, mesilini téz bir terep qilish heqqide höjjet chiqiridu.

Höjjette, qatilni tépip jazalashtin bashqa, ziyankeshlikke uchrighuchining iqtisadiy ziyinini tölep bérish, a'ile-tawabatlirining turmushini kapaletke ige qilish buyrulidu.

Mesilining daghdughisini kéngeytiwetmeslik, milletler ara munasiwetni jiddiyleshtürüwetmeslik üchün, höjjet mexpiy dep békitilidu we alaqidar organlarning hemmisige ewetilidu.

Gerche, mezkur höjjettiki qararlar, xitayning qanunlirigha tamamen uyghun bolsimu, mezkur höjjet ijra qilinmaydu. Buning sewebi qatilning arqa tiriki aptonom rayonluq hökümettin küchlükmu we yaki aptonom rayonluq hökümet Uyghur rehberlerning öz milliti terepte turup qarar chiqirishini körüp adetlenmigenliki üchünmu? bu hazirghiche sir halette. Emma, téximu sirliq bolghini yüsüp eysaning ene ashu höjjetni chiqirip bir yildin kéyinla wezipisidin qaldurulushidur.

Yüsüp eysaning mezkur höjjet seweblik wezipisidin élip tashlan'ghanliqi, peqet amma arisidiki bir perezdur. Biraq, xitay hökümitining, öz millitining menpe'iti üchün söz qilidighan Uyghur kadirlarni hakimiyet béshigha yéqin keltürmeslik en'enisi yuqiriqi perezning toghriliq éhtimalliqini küchlendürmekte.