Uyghurlar we zakat perzi

Youtube.com Din élinghan bu sürette, dua qilish körsitilgen.

Uyghurlar zakattin ibaret mushu perz sayisida kembeghellerge yardem qolini sozushni diniy we insaniy mejburiyet dep tonuydu we uninggha zor ehmiyet béridu.

Zakat - musulmanlargha namazdin kéyinla buyrulghan perz we muhim ijtima'iy ibadettur. Qur'an kerimde: "namazni ada qilinglar, zakatni béringlar, özünglar üchün qilghan qandaqla yaxshi emelinglar bolsa, allah ta'alaning dergahida uning sawabini tapisiler" dep körsetken.

Zakat perzi heqqide köprek melumatqa ige bolush ümidi bilen se'udi erebistanining medine munewwere shehiride turushluq abdul'eziz hajimgha bir qanche so'al bilen muraji'et qilduq.

Abdul'eziz hajim bilen söhbet

Abdul'eziz hajim zakat bérish ölchimi we miqdari heqqide toxtulup mundaq dédi: "musulmanchiliq qa'idisi boyiche, özi we pütün a'ile éhtiyajidin tashqiri 85 gram altun kelgüdek pul - méli bolghan kishining yilda bir qétim zakat ayrishi perizdur. Altun, kümüsh, xelq puli, tijaret méli qatarliqlardin bulargha ige bolghan'gha toluq bir yil tolishi sherti bilen %2.5 I zakatqa bérilidu. Emma ashliq, méwe we sey - köktatlardin % 10ni zakatqa bérilidu. Bu öshre - xiraj dep atilidu. Öshre - xirajni hosul alghan waqtida ada qilinidu."

Zakat bérishning omumgha bolghan paydisi köp

Abdul'eziz hajim zakat bérishning jem'iyet kishilirige bolghan paydisi heqqide toxtilip mundaq dédi: "zakat -- bir - biri bilen yardemlishidighan, bir - birini söyidighan adaletlik shepqetlik bir jem'iyetni qurup chiqishning eng aldinqi amilidur. Chünki, zakat baylarning wasitisi bilen jem'iyettiki péqirlarning halini yaxshilighanliqi sewebi bilen péqirlarning küngülliridiki baylargha qarita öchmenlik, düshmenlik we körelmeslik tuyghulirini yéngip baylar bilen péqirlar otturisida öz'ara söygü we hemkarliqni peyda qilish we diniy qérindashliqni kücheytish arqiliq ularning bextlik hayat sürüshige képillik qilidighan bir ésil ibadettur."

 Zakat kembeghellerning heqqidur

Abdul'eziz hajimning éytishiche, musulmanlar zakatlirini qur'an kerimning munu ayitide körsitilgen mexsus kishilerge béridu. Zakatning kimlerge bérishke munasip ikenliki qur'an kerimde mundaq bayan qilin'ghan: "zakat peqet péqirlargha, miskinlerge ( yeni turushqa jayimu yoq kishilerge), zakat xadimlirigha, köngüllirini islamgha mayil qilish közde tutulghanlargha, qullarni azat qilishqa, qerizdarlargha, allahning yoligha we ibn sebillerge( yeni pulidin ayrilip qalghan musapirlargha) bérilidu."

Zakat ishlepchiqirishqa tosqun emes

Abdul'eziz hajimning éytishiche, halal riziq tépish yolida ishlesh allah ta'ala buyrighan emellerning ichide eng ehmiyetlik we mötiwer ibadettur. Chünki allah ta'ala buyrighan zakat, hej, ilim tehsil qilish qatarliq iqtisad bilen qilinidighan ibadetlerdin bashqa perzlerni toluq ada qilish üchünmu insanning ten saqliqi we bedenning küch - quwwiti telep qilinidu. Melumki, ten saghlamliqini we bedenning quwwitini saqlash ishi kündilik kéreklik yémek - ichmeklerni teminleydighan iqtisadqa muhtaj. Iqtisad peqet ishlesh arqiliq qolgha kélidu. Ishlesh tereqqi qilishning aldinqi amili. Shungimu qur'an kerim pul - mal tépish üchün ishleshni allahning pezlini telep qilishtin ibaret bolghan ibadet da'irisidin sanap mundaq dégen: "namaz oqulup bolghanda zémin'ge tarqilip (öz meshghulatinglar bilen bolup) allahning pezlini telep qilinglar."

Yuqiridiki awaz ulinishidin, bu heqtiki melumatimizning tepsilatini anglaysiler.