Шәрқ гезитиниң мақалиси: бу, җуңхуа миллити әң ипласлашқан вақит
2011.04.20
Түнүгүн хоңкоңда чиқидиған “шәрқ гезити” дә, “бу, җуңхуа миллити әң ипласлашқан вақит” дегән мавзуда бир обзор елан қилинди. Бу обзорда баян қилинишичә, хитай содигәрлири яғач зәмбуруғини формалинға чилап хәлққә сатти, санаәт тузини аш тузи дәп хәлққә сатти, йилан белиққа туғут чәкләш дориси йегүзүп хәлққә сатти. Зәһәрлик сүт парашоки, уруқ гөш, юнда ериқидики яғ, рәңлик мома... Дегәнләрни алий сүпәтлик мәһсулат дәп махтап сатти.
“бу, җуңхуа миллити әң ипласлашқан вақит” дегән обзорда баян қилинишичә, җуңхуа миллитиниң йәр-земин байлири сүпәтсиз қурулуш материяллирида өй селип, баһасини өрлитип хәлққә сатти. Кан хоҗайинлириға ишчиларниң һаяти керәк әмәс, мәһсулатла керәк болди. Бурун кесәлни давалап адәмни қутқузушни биринчи орунға қойидиған дохтурханилар һазир, намратларниң пули билән җенини тәң алидиған қушханиларға айланди.
“бу, җуңхуа миллити әң ипласлашқан вақит” дегән обзорда баян қилинишичә, инсан роһиниң инженери дәп атилип кәлгән муәллим һазир, хәлқниң пәрзәнтлирини яман йолға башлайдиған җуңхуа езитқусиға айланди. Балилар бағчисида, ата-аниси муәллимгә соға тәқдим қилмиған балиға қизил гүл тақимайду. Башланғуч мәктәпләрдә, ата-аниси муәллимгә соға тәқдим қилмиған балини очуқ тәнқид қилип, ғурурини сундуруп қойиду. Оттура мәктәпләрдә, ата-аниси муәллимгә соға тәқдим қилмиған балиниң алий мәктәп имтиһанидин өтүши қейин болиду.
“бу, җуңхуа миллити әң ипласлашқан вақит” дегән обзорда баян қилинишичә, җуңхуа миллитиниң шәһәр аһалилири һазир йол сорисаң сөйүнчә берәмсән дәйду. Улар һазир шәһванийларни һәргиз мәсхирә қилмайду, бәлки намратларни мәсхирә қилиду. Җуңхуа җәмийитидә һазир ким аҗиз болса шуниңға нәйзә санҗийдиған, башқиларниң пәрзәнтлирини оғрилап келип, янчуқчилиқ қилишқа салидиған, халиса сетиветидиған, һеч болмиғанда униң бәдән әзалирини сетип хәҗләйдиған бәдәвиләр көпийип қалди.
“бу, җуңхуа миллити әң ипласлашқан вақит” дегән обзорда баян қилинишичә, җуңхуа миллитиниң һазирқи тамака ширкәтлири, адәмләр роһи һалитини тәңшәш үчүн қоллинидиған тамакини, адәмләрдә сақаймас кесәл пәйда қилидиған васитигә айландурувалди. Сағламлиқни асраш тармақлири болса,чәтәлләрдин гормон сетивелип, униңға зәһәр қетип, сахта елан билән махтап, баһасини өрлитип сетип, адәмләрдики вақитсиз өлүмни көпәйтивәтти.
“бу, җуңхуа миллити әң ипласлашқан вақит” дегән обзорда баян қилинишичә, җуңхуа дегән земиндики җуңхуа дегән милләт көңүл ачидиған сорунлар һазир, адәмләрниң мәниви турмушини бейитидиған әмәс, бәлки адәмләрни пул үчүн һәммә немисини сатқузиветидиған, әдәп- әхлақ дегән сөз мәсхирә қилинидиған сорунға айланди.
“бу, җуңхуа миллити әң ипласлашқан вақит” дегән обзорда баян қилинишичә, җуңхуа земинидики дора вә дора завутидәк сахта саһә дуняниң башқа йеридә тепилмайду. Чәтәлләрдә доригәрлик бойичә доктор унвани алалмиған кишигә дора ишләш кинишкиси бәрмәйду. Әмма хитайда дориға назарәт қилиш идарисиниң җин фамилилик бир башлиқила, бир йилда бир нәччә онмиң хил йеңи дорини ишләшкә имза қоюп пул тапти. Кинишкисиз дора завутлири, адәттә, даң чиқарған дохтурларға сөйүнчә берип қоюпла дора ишләвериду.
“бу, җуңхуа миллити әң ипласлашқан вақит” дегән обзорда баян қилинишичә, һазир җуңхуа земиндики җуңхуа дегән милләттин, мәркәздин тартип җәмийәткичә ахтуруп чиқса, сәмимий, алийҗанаб адәмни тепиш қейин. Җуңхуа әмәлдарлири һоқуқини пулға айландуруш билән алдираш, улар сәһнидә әдәп-әхлақ, қанун дәп сөзләйду, әмма сәһнидин чүшкәндин кейин, уларниң пүтүн мәшғулати әйши-ишрәт, һели-микри вә башқа бәт қилиқ. Растини ейтқанда, формалинға чиланған яғач зәмбуруғи, санаәт тузи қетиветилгән аш тузи, зәһәрлик сүт парашоки, уруқ гөш, юнда ериқидики яғ, рәңлик мома... Дегәнләрни алий сүпәтлик мәһсулат дәп сатқан әң иплас, рәзил ишларниң һәммиси мушундақ җуңхуа әмәлдарлириниң рәһбәрликидә пәйда болған. Җуңхуа миллитигә башқа милләтләрни талан-тараҗ қилдуридиған рәзил сиясәтләрниму шулар түзгән. Һазир инсанийәттә әң рәзил, әң иплас дәп қарилидиған бундақ ишларни йошуруш мумкин болмиғанда, улар оттуриға чиқип йәнә адәмчә гәп қилишқа мәҗбур болди. Бу қетим вен җябав йәнә кимләрниду әйибләп, җәмийәттә әхлақ төвәнләп кәтти дәп вайсап қойди, әмма у йәнила мәсилини һәл қилишниң үнүмлүк тәдбирини һәргиз оттуриға қоймиди.