Sherqiy türkistan ölimalar birlikining iptarliq yighinida teshkilatlar ara hemkarliqni kücheytish tekitlendi

Sherqiy türkistan ölimalar birliki teripidin ötküzülgen iptar we yighin pa'aliyitidin körünüsh. 2024-Yili 26-mart, istanbul.

Sherqiy türkistan ölimalar birliki teripidin 26-mart küni istanbulda ölimalar, péshqedemler we teshkilat rehberliri üchün mexsus iptarliq yighin ötküzüldi.

Yighinda söz qilghan doktor alimjan bughda, muhajirettiki her sahediki Uyghurlarning öz ara hemkarliqni kücheytish üchün téximu tirishchanliq körsitishini tekitlidi: “Bu elwette bizning wezipimizdur, chünki u yerning igiliri biz, u yerdiki xelq bizning xelqimizdur. Buning üchün chet ellerdiki teshkilatlar, yurt aqsaqalliri, dini ölimalar, ziyaliylar téximu köp küch serp qilishqa toghra kélidu. Buni melum birer teshkilatqa yaki birer shexske artip qoyushqa bolmaydu. Biz allahning aldidimu bu mes'uliyettin qéchip qutulalmaymiz, hazirqi weziyette sherqiy türkistanning dewasi her bir sherqiy türkistanliqqa perzdur. Yeni islam dinining körsetmisi boyiche wetini munqer bolghan musulmanlarni, yeni biz Uyghurlarni zulumdin qutuldurush xuddi namaz oqush perz bolghan'gha oxshashla bu yolda élip baridighan ish-heriketlirimiz, pa'aliyetlirimiz perz eyindur. Shuning üchün her bir weten perzentining qolimizdin kélishiche heriket qilish mejburiyitimiz bar”.

RFA/Arslan

Doktor alimjan bughda sözide yene islam dunyasining ölimaliri her yighilishta pelestin mesilisi toghrisida söz qilsimu, emma sherqiy türkistan mesilisi toghrisida süküt qiliwatqanliqini tenqid qildi. U mundaq dédi: “Dunya musulman alimlar birlikining mes'ullirini öz ichige alghan chong diniy alimlar her yerde pelestin mesilisini tilgha alsimu, biraq sherqiy türkistan mesilisi toghrisida ulardin héchqandaq sada yoq. Ular amérika we yawropagha qarshi xitayni özlirige ittipaqdash qilishni oylaydu, xitayni arqigha alalmighan teqdirdimu uningdin medet tileydighan ehwal mewjut.”

RFA/Arslan

Sherqiy türkistan ölimalar birlikining mu'awin re'isi, shundaqla teshkilatlar ara munasiwet ishliri kométitining mes'uli sirajiddin ezizi ependi, Uyghur diyarining nöwette intayin éghir bir weziyette turuwatqanliqini bildürdi. U özining yéqinda Uyghur diyaridin kelgen bezi kishiler bilen sözleshkenlikini, ularning déyishiche, wetendiki kishilerning hetta bir tughqanliridin, yéqinliridin, tonushliridin, dostliridin, qoshniliridin qachidighan؛ bir-birige salammu qilmaydighan ehwal mewjut iken.

RFA/Arslan

Sirajiddin ezizi ependi, yéqinda istanbulda tutulghan xitay jasus gumandarlirining yette kishi ikenlikining ispatlan'ghanliqini, biraq xitayning türkiyede téxi tutulmighan jasuslirining buningdin téximu köp ikenlikini tekitlep ötti. U, buning üchün muhajirettiki teshkilatlar ara hemkarliqni kücheytip, düshmen'ge ortaq qarshi turush tedbirliri élish kéreklikini otturigha qoydi.

Yighinda söz qilghan jama'et erbabi abdulqadir yapchan mundaq dédi: “Her qandaq nersidin waz kéchishke bolidu, emma sherqiy türkistan dewasidin, bolupmu tupraq dewasidin waz kéchishke bolmaydu. Biz bu ré'alliqni tonup yétishimiz, xelqimiz özini dewaning ichide hés qilidighan, barliqini weten dewasigha béghishlaydighan bir haletni shekillendürüshimiz kérek”.

RFA/Arslan

Xelq'ara sherqiy türkistan teshkilatlar birlikining re'isi hidayetullah oghuzxan, muhajirettiki her bir sherqiy türkistanliqning qolidin kélidighan her qandaq imkaniyetliridin paydilinip, munqerz wetini we irqiy qirghinchiliqqa duch kéliwatqan xelqi üchün emeliy xizmet qilishni ümid qilidighanliqini bildürdi.