Dalay lama gérmaniye we shiwitsariyige qilmaqchi bolghan ziyaritini bikar qildi

Tibetlerning diniy we siyasiy dahisi dalay lama kéler ay gérmaniye we shiwitsariyige qilmaqchi bolghan ziyaritini bikar qilghan. Shenbe küni hindistanning daramsala shehiridiki dalay lamaning ishxanisi teripidin élan qilin'ghan bir bayanatta bildürülishiche, dalay lama gérmaniyige we shiwitsariyige qilmaqchi bolghan ziyaretlirini ten - salametlik mesilisi tüpeylidin bikar qilghan.
Muxbirimiz ömer qanat xewiri
2008-09-13
Share

 Bayanatta éytilishiche, gerche dalay lama ning ten salametliki asasen yaxshi bolsimu, lékin doxturlar uning bir qanche waqit dem élishini tewsiye qilghan. Köpchilikke melum bolghandek, dalay lama yéqinda ashqazan aghriqi sewebidin doxturxanida yétip chiqqan idi.

Dalay lama jüme küni, sürgündiki tibet teshkilatlirini 11‏ - yaki 12‏ - ayda hindistanning daramsala shehirige yighilip, tibetning kélechiki toghrisida muzakire élip bérishqa chaqirghan. Yighin'gha sürgündiki tibet rehberliri, ziyaliliri we tibet ammiwiy teshkilatliri qatnishidighan bolup, yighinda tibet milliy herikitining bundin kéyinki yönilishi heqqide muzakire élip bérilidiken.

Xitay hökümiti, bu yil mart éyida tibette xitay hakimiyitige qarshi qozghalghan isyandin kéyin, xelq'ara jama'et bolupmu gherb döletlirining bésimi netijiside, dalay lama ning wekilliri bilen qaytidin söhbet bashlighan idi. Gerche nurghun mulahizichiler xitay hökümitining béyjing olimpik tenheriket yighini harpisida xelq'ara ning bésimini peseytish üchünla dalay lama wekilliri bilen söhbet bashlighanliqini bayan qilghan bolsimu, dalay lama wekilliri xitay bilen söhbetning qaytidin bashlighanliqini bir ghelibe dep körsetken lékin ikki terep otturisida ötküzülgen axirqi söhbettin kéyin, dalay lama ning wekilliri bu söhbetlerning ünümlük bir netije béridighanliqigha guman bilen qaraydighanliqini ipadiligen. Yéqinda hetta dalay lama özimu xitay bilen élip bérilghan söhbetlerdin ömidsizlinishke bashlighanliqini eskertken idi.

Nurghunlighan tibet pa'aliyetchiliri bolupmu tibet yashlar teshkilati dalay lama ning tibetning musteqilliqi toghrisidiki qarashlirigha we xitaygha qaratqan yumshaq pozitsiyisige qarshi chiqmaqta.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet