Örkesh dölet: “Ukra'ina xelqining tiz pükmes jasariti Uyghurlarning örnek élishigha erziydu”
2023.06.08

Teywen parlaménti kishilik hoquq komitétining bash katipi örkesh dölet ependi teywen kishilik hoquq komitétigha wakaliten 29-maydin 4-iyun'ghiche urush oti téxi tinjimighan ukra'inada ziyarette bolghan. Uning éytishiche, ukra'inaning her terepliride her küni dégüdek miltiq étilghan we bomba partlighan awazlar anglinip turidiken. Hetta u ukra'ina paytexti kéywgha yétip kelgen küni özi orunlashqan méhmanxanigha anche uzaq bolmighan jaygha rusiye armiyesi atqan bir bomba chüshken iken.
U urush oti qaplighan ukra'inada ötküzgen bir hepte jeryanida ukra'ina xelqining urushqa tutqan pozitsiyesi heqqide toxtilip munularni bayan qildi: “Ukra'ina xelqi urush bashlan'ghan kündin tartip qéchishni emes, belki tajawuzchilargha qarshi urush qilishni tallashtek qehrimanliq jasaritini körsetken. Shunga pütün dunya ukra'inani qollidi, yardem qildi. Uyghurlarning weziyiti elwette ukra'inaliqlargha oxshimaydu. Shundaqtimu eger Uyghurlar qirghinchiliqqa we basturushqa bash egmesliktek jasaritini körsiteleydighan bolsila, men dunyaning herqaysi jayliridin her türlük yardemning kélidighanliqigha ishinimen!”
Rusiye armiyesi ötken yili 24-féwral küni ukra'inagha zor kölemlik herbiy tajawuzchiliq urushi qozghighan idi. Amérika bashchiliqidiki gherb döletliri buninggha derhal inkas qayturup, rusiyening tajawuzchiliqni qattiq eyiblidi. Pütün dunya xelqi tinchliqni telep qiliwatqan bügünki künde, xitay we iran qatarliq mustebit döletler rusiyeni wastiliq halda qollap keldi.
“Muhapizetchi” gézitining 18-maydiki xewiride éytilishiche, ukra'ina tashqiy ishlar ministiri dimitro kuléba (Dmytro Kuleba) rusiye-ukra'ina urushini ayaghlashturush heqqide élip bérilghan söhbette éniq ipade bildürüp, “Ukra'ina kukum-talqan bolup ketsimu, rusiyege zémin késip bérish bedilige kelgen tinchliqni xalimaydu, bu bizning özgermes meydanimiz” dégen.
Yoqiriqi ulinishtin muxbirimiz nur'imanning örkesh dölet ependi bilen ötküzgen söhbétining tepsilatini anglighaysiler.