Тор һуҗуми сәвәблик кечиктүрүлгән уйғурлар һәққидики гуваһлиқ бериш йиғини келәр һәптә белгийә парламентида өткүзүлиду

Ихтиярий мухбиримиз уйғурай
2021.05.06
Share on WhatsApp
Share on WhatsApp
Тор һуҗуми сәвәблик кечиктүрүлгән уйғурлар һәққидики гуваһлиқ бериш йиғини келәр һәптә белгийә парламентида өткүзүлиду Лагер шаһитлиридин қәлбинур сидиқ белгийә парламентида өткүзүлмәкчи болған гуваһлиқ бериш йиғиниға қатнишиштин илгири мухбирлар билән. 2021-Йили 4-май, белгийә.
RFA/Uyghur'ay

Һазир голландийәдә яшаватқан лагер шаһидлиридин қәлбинур сидиқ белгийә уйғур җәмийитиниң тәклипи билән белгийә парламентида өткүзүлмәкчи болған хитайниң уйғур дияридики җаза лагерлири тоғрисида гуваһлиқ бериш йиғиниға қатнишиш үчүн барған. Һалбуки, туюқсиз йүз бәргән тор хаккерлириниң һуҗуми сәвәблик тор кесилип, бу паалийәт әмәлдин қалған вә келәр һәптидә өткүзүлидиған болған.

4-Май күни белгийә һөкүмәт торини тәминлигүчи ширкәт кәң даирилик DDoS (тарқақ шәкиллик тор мулазимитини рәт қилиш) һуҗумиға учриғанлиқи сәвәблик хитайниң уйғурлар үстидин йүргүзиватқан сиясәтлирини “ирқий қирғинчилиқ” дәп бекитиш тоғрилиқ өткүзүлмәкчи болған гуваһлиқ бериш йиғини, шундақла башқа барлиқ йиғинларниң бикар қилинғанлиқи хәвәр қилинған.

“фудзилла” торида бу тоғрилиқ елан қилинған бир парчә хәвәрдә көрситилишичә, бу қетимлиқ хаккерлиқ һуҗуминиң арқисида хитайниң қоли барлиқидәк гуман оттуриға чиққан.

Голландийәдә турушлуқ лагер шаһидлиридин қәлбинур сидиқ ханим зияритимизни қобул қилип, бу нөвәт белгийәдики тор һуҗуми сәвәблик әмәлдин қалған паалийәт һәққидә радийомизға бир қисим мәлуматларни йәткүзди.

Лагер шаһиди қәлбинур сидиқ ханим әслидә хитайниң уйғур диярида қурған лагерида мәҗбурий оқутқучилиқ қилған булуп, у өзиниң уйғур елида көргән-аңлиғанлирини, лагерлардики уйғурларға системилиқ йүргүзүлүватқан қийин-қистақларни һәмдә лагердики ичкий әһвалларни хәлқиар җамаәткә ашкарилиған иди.

Униң бу гуваһлиқлири хәлқара таратқуларда күчлүк инкас қозғиған болуп, хитай һөкүмитиниң уйғур елидики инсанийәткә қарши җинайәтлири вә ирқий қирғинчилиқлирини җәзимләштүрүштә муһим рол ойниған иди.

Қәлбинур сидиқ ханимниң билдүрүшичә, гәрчә 4-май белгийә парламентида өткүзүлмәкчи болған гуваһлиқ бериш йиғини тор һуҗуми сәвәблик әмәлдин қалған болсиму, әмма бу паалийәт келәр һәптә қайтидин өткүзүлидикән.

Белгийә парламентида өткүзүлмәкчи болған бу паалийәтни орунлаштурушта белгийәдә яшаватқан яш түрк паалийәтчилиридин әсма гүнму күч чиқарған икән. У бу һәқтә елан қиған тор баянатида, шу күни қәлбинур ханимни көрүш пурситигә игә болғанлиқини, қәлбниур сидиқниң наһайти көчлүк бираял икәнликигә болған қайиллиқини билдүргән.

У баянатида “бүгүнкидәк муһим бир паалийәт болидиған күндә туюқсиз кәлгән тор һуҗумиға учраш адәмни һәқиқәтәнму һәйран қалдуриду. Буниңға һәтта ишәнгили болмайду, лекин һечқиси йоқ, бу бир ахирлишиш әмәс, бәлки бир башлиништур” дәп язған. У баянатида өзиниң уйғурлар билән бир сәптә болғанлқидин пәхирлиндиғанлиқини ейтқан.

Билгийә уйғур җәмийити өзиниң тор бетигә елан қилған баянтида көрситишичә, 4-май күнидики уйғурлар тоғрисида гуваһлиқ бериш йиғинини белгийә парламенти ташқий ишлар комтети орунлаштурған болуп, бу йиғинға дуня уйғур қурултийи билән белгийә ‍уйғур җәмийити узундин бери тәйярлиқ қилған икән.

Белгийә уйғур җәмийити өзиниң баянтидамундақ дәп язған: “йиғин әмәлдин қалғандин кийин һәрқайси партийә рәһбәрлири йенимизға килип өзлирииниң әпсусланғанлиқини ейтти. Қәлбинур ханимниң вақит чиқирип берюсселға кәлгәнликигә рәһмәт ейтти, шундақла бу қетимлиқ йиғинниң әмәлдин қалғанлиқи үчүн әпу сориди.”

Қәлбинур ханимниң ейтишичә, фирансийә а х т телевизийәси қәлбинур ханимни белгийә парламентида зиярәт қилған. У франсийә телевезийәсигә өзиниң хитай лагерлирида көргән-билгәнлирилирини аңлатқан.

Америка һөкүмити 19-январ күни хитай һөкүмитиниң уйғурларға йүргүзиватқан бастуруш сияситини “ирқий қирғинчилиқ” дәп елан қилғандин кейин, канада, голландийә, әнгилийә парламетлири арқа-арқидин йиғин өткүзүп, хитайниң уйғурларға елип бериватқан “ирқий қирғинчилиқи” ни етирап қалған. Уйғурлар һәққидики қанун лайһәлири йеңи зилландийә парламетидиму тонуштурулған иди. Мушунда бир пәйттә белгийә парламентиниң уйғурлар һәққидә гуваһлиқ йиғини чақириши һәр саһәниң диққитини қозғимақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.