Qeshqer xelq ishliri idarisi xadimi: milletler ara toy qilishqa a'it uchurlar dölet mexpiyetlikige yatidu

Muxbirimiz shöhret hoshur
2020-08-07
Share
toylishish-toy-xet.jpg Bir Uyghur ayal bilen uning xitay érining toy xétini tutup turghan körünüshi.
AFP

Yéqinda ijtima'iy axbaratlarda milletler ara toy qilish chaqiriq qilin'ghan bir bir Uyghurche élan tarqaldi. Bir hökümet orginigha a'it ikenliki melum bolghan bu élanda 100 neper kélin'ge éhtiyaji barliqi bayan qilin'ghan. Bir Uyghur qizi bilen bir xitay erkekning toy murasimi körsitilgen bu élan, kespiy sewiyediki bir diktor teripidin oqup ötülgen. Muxbirimizning bu heqte élip barghan éniqlashliri dawamida qeshqer sheherlik xelq ishliri idarisi xadimi 100 kélin pilanigha a'it uchurlarning dölet mexpiyetliki yatidighanliqini bayan qilish arqiliq, mezkur élanning qeshqer tewelikide chiqirilghanliqini delillidi.

Milletler ara toy qilishqa chaqiriq qilin'ghan we 100 neper kélin'ge éhtiyaji barliqi bayan qilin'ghan mezkur élan mexsus kespiy sewiyediki bir diktor teripidin oqup ötülgen. Élanda bu uchurni qolum-qoshnilargha yetküzüsh we etrapidikilerni milletler ara toy qilishqa righbetlendürüsh ashkara teshebbus qilin'ghan. Emma élanning hökümetning qaysi orgini we qaysi bir shirketke tewe ikenliki bayan qilinmighan. Tordiki inkaslarda mezkur élanda qaldurulghan téléfon nomurining qeshqerge a'it ikenliki ilgiri sürülgen. Biz mezkur élanni tarqatqan organni éniqlash üchün, qaldurulghan téléfon nomurigha téléfon qilduq. Bu téléfon köpinche hallarda meshghulluqi sewebidin élinmighandin kéyin qeshqer wilayetlik xelq ishliri idarisige téléfon qilduq. Biz mezkur élanning qaysi organ yaki shirketke a'it ikenlikini sorighinimizda, bu xadim, özlirining toy qilghanlarni tizimlashqa mes'ul ikenliki, teshwiqat ishliri bilen alaqisi yoqluqini bildürdi. Biz uningdin, mezkur élan chiqqandin kéyin, jem'iyette qandaq tesir peyda qilghanliqi, yeni qiziqish qozghighan-qozghimighanliqini sorighinimizda, u, bu so'alghimu udul jawab bérishtin özini qachurdi. U özining kespiy ishlargha mes'ul ikenliki, toy xéti alghuchilarni tizimlaydighanliqini bildürüp, bu heqte éniq jawab bérishke salahiyetlik emeslikini bildürdi. Emma u bashtin axir, 100 kélin chaqiriqi heqqide bir élanning chiqqanliqini inkar qilmidi. Biz arqidin qeshqer boyiche qanchilik kishining milletler ‘ara toy qilghanliqi heqqidiki statistikiliq melumatlarni bilmekchi ikenlikimizni bayan qilghinimizda, u bu so'alimizni özi bilen bir ishxanida ishlewatqan bölüm mes'uligha yetküzdi. Bu xadim shu mes'ulning jawabi boyiche milletler ara toy qilghanlar heqqidiki sanliq melumatlarning dölet mexpiyetlikige yatidighanliqini ashkara bayan qildi.

Ilgiriki éniqlashlirimiz dawamidimu, qeshqerning misha yézisida xizmet qiliwatqan bir xadim, özlirining Uyghur yashlirini xitaylar bilen toy qilishqa righbetlendürüwatqanliqini ashkarilighanidi. Uning déyishiche, töwen'ge chüshken kadirlar milletler ittipaqliqi tamiqi nami astida ziyapet sorunliri tüzüp xitay we Uyghur yashlirining, jümlidin Uyghur qizliri bilen xitay erkeklirining öz'ara uchrishish we tonushush pursitini yaritip bergen. Emma anglighuchilirimiz yetküzgen bir inkasta, bu türdiki xizmetlerning xotende qanliq bir weqege sehne bolghanliqi melum qilin'ghan؛ yeni séstra qizning özige öylenmekchi bolghan xitay erkekni séstra pichiqi bilen öltürgenliki melum qilin'ghan ؛ éniqlashlirimiz dawamida bu qanliq weqening bolghanliqi delillenmigen bolsimu, emma qaraqashning duwa yézisida bir toqunush yüz bergenliki tilgha élin'ghanidi.

Milletler ara toy qilishqa zorlash Uyghur rayonida köp qétimlap qanliq weqelerning kélip chiqishigha seweb bolghan؛ bulardin qumulda yüz bergen 1931-yilidiki shopul weqesi 1930‏-yillarda yartilighan sherqi türkistan milliy azadliq inqilabida qozghatquch weqelerdin biri bolup qalghanliqi tarixchilar teripidin étirap qilin'ghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet