Kériyediki bir xitay kadir: yurtdashlirimning Uyghur qizliri bilen öylinishige, köp sanliq a'ililerde erkek bolmasliqmu bir seweb

Muxbirimiz shöhret hoshur
2022.12.07
Share on WhatsApp
Share on WhatsApp
toylishish-xitay-uyghur-qiz-rehetsiz.jpg Xitayche kiyindürülgen Uyghur qizning xitay bilen orunlashturulghan toy murasimidiki rahetsiz we naraziliq chirayi.
Social Media

Xitay da'irilirining yéqinqi yillardin béri Uyghur rayonida milletler ara toy qilishni küchep teshwiq qiliwatqanliqi we teshwiqati kargha kelmigende mejburlash xaraktérliq tedbirlerni qolliniwatqanliqi köpligen pakitliri bilen otturigha chiqqanidi. Muxbirimizning bu heptidiki éniqlashliri dawamida, xoten kériyede xizmet qiliwatqan bir xitay kadir, Uyghur qiz-ayalliri bilen öylen'gen xitay köchmenlirining rayonda %20 din artuq nopusning yeni, yash erkekler nopusning köp qismining tutqun bolushidek siyasiy we ijtima'iy weziyettin paydilan'ghanliqini étirap qildi.

Xotenning kériye nahiyesige qarita élip barghan téléfon ziyaretlirimiz dawamida, bu nahiyening oytoghraq yéziliq hökümitide xizmet qiliwatqan bir xadim, özining yurti xénen ikenliki, 2 yil awwal xitayning sherqi shimal oniwérsitétini püttürgendin kéyin, 500 che yurtdishi bilen birlikte xoten'ge kelgenlikini bayan qildi. Bu xadim, “Aranglarda yerlik ahaliler bilen toy qilghanlar barmu?” dégen so'alimizgha jawaben “Bar, xéli jiq” dep jawab berdi. Biz uningdin Uyghurlar bilen toy qilghanlarning sanini sorighinimizda, u özi tonuydighanlar ichidinla, az dégende 30-40 che kishi barliqini tilgha aldi.

Biz ikki yil ilgiri bu heqte qeshqer peyziwattiki bir xizmet guruppisida ishlewatqan bir xadimni ziyaret qilghaniduq, uning bayanliridin xitay da'irilirining milletler ara toy qilishni yéqinqi yillarda téximu küchep teshebbus qilghanliqi we da'irilerning ikki millet yashlirini uchrashturidighan mexsus köngül échish sorunlirini teyyarlighanliqi ashkarilan'ghanidi.

Kériyediki mezkur xitay xadim, xitay da'irilirining milletler ara toy qilishni teshebbus qilghanliqi we emma zorlimighanliqini ilgiri sürgen bolsimu, u rayonda, %30-%20 nopusning, yeni erkekler nopusning asasliq qismining nöwette türmide ikenlikidek bir ré'alliqini inkar qilmidi؛ u yene bu ré'alliqning, Uyghur qizliri bilen öylenmekchi bolghan xitay köchmenlirige ongushluq bir shara'it hazirlap bergenlikinimu étirap qildi.

Ilgiriki yene bezi xewerlerde, bezi xitay köchmenlirining Uyghur qizlirigha qoyghan toy qilish telipi ret qilin'ghanda, mezkur qiz üstidin “Idiyeside siyasiy we diniy mesile bar” dep asasi qatlamdiki idare-organlargha erz sun'ghanliqi ashkarilan'ghanidi. Bu yilning béshida ijtima'iy taratqularda “100 Neper yashni milletler ara öylendürüsh heqqide mexsus bir élanmu tarqalghanidi.

Mezkur xadimning bayanliridin melum bolushiche, kériyede köpinche a'ililerde, er emgek küchi bolmighachqa, jem'iyetning asasi qismi, balilar, qizlar we yashan'ghanlar bolghachqa, a'ililer iqtisadiy jehettin éghir qiyinchiliqta qalghan we beziliri mohtajliq destidin xitay köchmenlirining öylinish telipini ret qilalmighan. Mezkur xadim yene yerlik ahaliler bilen toy qilghan xitay köchmenlirige heqsiz öy bérilidighanliqinimu ashkarilidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.