Amérika prézidénti tramp xitaygha charshenbe künidin bashlap 104 pirsent tamozhna béji qoyidighanliqini élan qildi

Amérika prézidénti donald tramp xitay hökümitining özining agahlandurushigha qarimay amérikagha 34 pirsent qayturma zerbe xaraktérlik tamozhna béji qoyghinigha qarshi xitaygha charshenbidin bashlap 104 pirsent tamozhna béji qoyidighanliqini élan qildi.

“CNN” téléwiziyesining seyshenbe bergen xewiride bildürülüshiche, aq saray bayanatchisi karolin liwit tramp hökümitining charshenbidin bashlap xitaydin kélidighan barliq import mehsulatlirigha 104 pirsent tamozhna béji qoyidighanliqini élan qilghan. Bayanatchi liwit sözide, “Amérikagha qarshi qayturma zerbe élan qilip amérika ishchilirini xorlash urunushidin yanmighan xitaygha oxshash döletler bir chong xataliq ötküzdi. Chünki prézidént trampning polattek umurtqisi bar. U sunmaydu” dégen.

Prézidént tramp deslepte féwralda xitay mehsulatlirigha 10 pirsent tamozhna béji qoyghan idi. U ötken ayda bu bajni ikki hesse östürdi. Prézidént tramp 2-april küni xitaygha 34 pirsent tamozhna béji qoyghan. Xitay hökümiti buninggha jawaben amérikagha qarshi 34 pirsent baj élan qilghandin kéyin, prézidént tramp düshenbe küni xitaygha yene 50 pirsent baj qoshup qoyghan idi.

Amérika prézidénti tramp xitaygha 50 pirsent baj qoyghandin kéyin, xitay hökümiti bu mesilini chirayliq söhbet bilen hel qilishning ornigha amérikani seyshenbe küni eyiblep, özining bu mesile üstide “Axirghiche jeng qilidighanliqini” jakarlighan idi. Netijide, prézidént trampning xitaygha 8-april chüshkiche bergen möhliti ötkendin kéyin, amérikaning xitaygha qoyghan 104 pirsent tamozhna béji charshenbidin bashlap resmiy küchke ige bolidighan boldi.

Amérika maliye ministiri skot bésént seyshenbe küni xitayning inkasini eyiblep, “Xitay bizge qarshi tamozhna béjini östürse bizge néme ziyini? biz ular bizge éksport qilghan mehsulatlirining beshtin birini éksport qilimiz. Shunga ularning utturghini utturghan” dégen. Ministir béséntning bildürüshiche, amérika prézidénti tramp bu ayning béshi 180 din artuq döletlerge oxshimighan shekilde tamozhna béji qoyghandin kéyin, 70 ke yéqin dölet aq saray bilen alaqiliship, amérika bilen bu mesilini söhbet arqiliq hel qilish yolini tallighan iken.

Yawro xewirining bildürüshiche, bu döletler yawropa birliki bolup, yawropa kéngishining prézidénti ursula won dér léyén düshenbe künidiki muxbirlarni kütüwélish yighinida yawropa birlikining amérika prézidénti bilen tamozhna béji mesilisi üstide söhbet élip bérishqa teyyar ikenlikini bildürgen. Prézidént won dér léyén sözide “Yawropa her zaman yaxshi sodilishishqa teyyar” dégen. Prézidént tramp yawropa birlikige 20 pirsent tamozhna béji qoyghan idi.