Уйғур дәвасиниң қоллиғучиси профессор тунҗәр гүләнсой аләмдин өтти

Ихтиярий мухбиримиз әркин тарим
2022.06.13
Share on WhatsApp
Share on WhatsApp
Уйғур дәвасиниң қоллиғучиси профессор тунҗәр гүләнсой аләмдин өтти Түркийәдә тонулған түрколог, язғучи вә уйғур дәвасиниң садиқ қоллиғучиси, пенсийәгә чиққан профессор тунҗәр гүләнсой әпәнди.
RFA/Erkin Tarim

Түркийәдә тонулған түрколог, язғучи вә уйғур дәвасиниң садиқ қоллиғучиси, пенсийәгә чиққан профессор тунҗәр гүләнсой әпәнди 6-айниң 11-күни әтигәндә әнқәрәдә аләмдин өтти.

Бу мунасивәт билән дуня уйғур қурултийи, түркийәдики шәрқий түркистан аммиви тәшкилатлири вә уйғур зиялийлири иҗтимаий таратқулар арқилиқ баянат елан қилип, өз тәзийәлирини билдүрди.

Д у қ рәиси долқун әйса әпәнди мәрһум тунҗәр гүләнсой әпәндиниң оттура мәктәптә оқуватқан вақтидин тартип уйғурларни қоллап кәлгән киши икәнликини, униң вапатиниң уйғурлар үчүн чоң йоқитиш икәнликини билдүрди

83 яшта аләмдин өткән профессор доктор тунҗәр гүләнсой әпәнди узун йил әнқәрә, фират вә манас университетлирида оқутқучилиқ қилғандин сирт қәйсәридики әрҗийәс университетида муавин мудирлиқ вәзиписиму өтигән. У, университетта оқуватқан йиллиридин тартип уйғур дәвасиға қизиқип кәлгән вә изчил көңүл бөлгән. У, түркийәниң ичи-сиртида өткүзүлгән һәр хил илмий муһакимә йиғинлириға қатнишип, уйғур тили вә тарихи мәсилилири һәққидә доклатларни бәргән, түркийәдики шәрқий түркистан аммиви тәшкилатлириниң паалийәтлиригә актип қатнишипла қалмай түркийәдики гезит вә журналларда уйғурлар тоғрисида көплигән мақалиләрни елан қилған.

6-Айниң 12-күни әнқәрәдики қаршияқа мәсчитидә мәрһумниң мейит намизи чүшүрүлгәндин кейин қаршияқа мазарлиқида дәпинә қилинди. Мәрһумниң дәпинә мурасимиға көп сандики оқутқучилар, у йетиштүргән түркологлар вә авам хәлқтин болуп көп санда киши қатнашти. Уйғурларға вакалитән дуня уйғур қурултийиниң мәслиһәтчиси, әгә университетиниң профессори алимҗан инайәт әпәнди иштирак қилди.

Мейит намизини чүшүрүшкә қатнашқан алимҗан инайәт әпәнди, мәрһум тунҗәр гүләнсой әпәндиниң даңлиқ бир түрколог икәнликини, һазирғичә 36 китаб, 293 илмий мақалә йезип нәшр қилдурғанлиқини, булардин сирт көп санда докторлуқ диссертатсийәсигә йетәкчилик қилғанлиқини тәкитлиди.

Алимҗан инайәт әпәнди тунҗәр гүләнсойниң уйғур дәвасиға қошқан төһписиниң зор икәнликини, вапатиға қәдәр уйғур тәтқиқати үчүнму зор төһпиләрни қошқанлиқини баян қилди.

Уйғур зиялийси һамутхан көктүрк әпәнди өзиниң тунҗәр гүләнсой әпәнди билән 1994-йилидин тартип тонушқанлиқини, мәрһумниң һаят вақтида уйғурларға көп ярдәм қилған киши икәнликини тилға алди.

Тунҗәр гуләнсой 1939-йили түркийәниң ушшақ вилайитидә дуняға кәлгән. Әнқәрә университетиниң тил вә тарих-җуғрапийә факултетини пүттүргәндин кейин, оқутқучи болуп ишлигән, 1972-йилидин2006-йили пенсийәгә чиққучә университетларда оқутқучилиқ қилған. У, һаятида 36 китаб язған болуп, буниң ичидә “түрк тилиниң етимологийәлик луғити”, “түрклогийә қолланмиси”, “түрк тили диялектлири” намлиқ китаблири муһим орунда туриду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.