100 Түрк адвокатниң шәрқий түркистандики кишилик һоқуқ дәпсәндичилики һәққидә б д т гә сунған хетигә җаваб кәлди

Ихтиярий мухбиримиз әркин тарим
2021-07-28
Share
100 Түрк адвокатниң шәрқий түркистандики кишилик һоқуқ дәпсәндичилики һәққидә б д т гә сунған хетигә җаваб кәлди "қанун вә пикир мунбири" мәсули адвокат фаруқ кәләштимур әпәнди 100 түрк адвокатниң мәзкур мунбәр намидин уйғурлар учраватқан зулумлар тоғрисида б д т кишилик һоқуқ кеңишигә бирләшмә әрз сунған мәзгилидә. 2020-Йили июн, түркийә.
RFA/Erkin Tarim

Өткән йили 26-июн күни түркийәниң һәрқайси вилайәтлиридики адвокатлар уюшмисиға әза 100 түрк адвокатниң "қанун вә пикир мунбири" намидин нөвәттә уйғурлар дуч келиватқан еғир зулумлар тоғрисида бирләшкән дөләтләр тәшкилати кишилик һоқуқ кеңишигә сунған бирләшмә әрзнамисигә җаваб кәлди.

"қанун вә пикир мунбири" мәсули адвокат фаруқ кәләштимур әпәндиниң билдүрүшичә, хәттә мәзкур әрзнаминиң 2022-йили 2-айниң 14-күнидин 18-күнигичә бирләшкән дөләтләр тәшкилатиниң җәнвәдә өткүзүлидиған 29-нөвәтлик йиғинида күнтәртипкә қоюлидиғанлиқи, йиғинға әрзнамини сунған 100 адвокатқа вакалитән "қанун вә пикир мунбири" мәсуллири қатнишидиғанлиқи билдүрүлгән.

Түркийәдики 100 түрк адвокатниң
Түркийәдики 100 түрк адвокатниң "қанун вә пикир мунбири" намидин уйғурлар дуч келиватқан еғир зулумлар тоғрисида б д т кишилик һоқуқ кеңишигә сунған бирләшмә әрзнамисигә кәлгән җаваб хәт. 2021-Йили июл.

Биз бу тоғрисида мәлумат игиләш үчүн буниңға башламчилиқ қиливатқан әнқәрә адвокатлар уюшмисиниң әзаси фаруқ кәләштимур әпәнди билән сөһбәт елип бардуқ. У, б д т кишилик һоқуқ кеңишидин кәлгән хәт тоғрисида мәлумат берип мундақ деди: "биз 2020-йили 6-айда 100 адвокат бирликтә шәрқий түркистандики кишилик һоқуқи дәпсәндичилики һәққидә бирләшкән дөләтләр тәшкилатиға әрзнамә сунғанидуқ. Бирләшкән дөләтләр тәшкилатиға тапшурған әрзнамидә уйғур, қазақ қатарлиқ түркий хәлқләр дучар болуватқан кишилик һоқуқ дәпсәндичиликлири 12 мадда һалида оттуриға қоюлған болуп, онлиған хәлқара тәшкилатларниң шәрқий түркистандики кишилик һоқуқ дәпсәндичиликлири тоғрисида тәйярлиған доклатлири испат сүпитидә бирликтә сунулғаниди. Бирләшкән дөләтләр тәшкилати кишилик һоқуқ кеңишидин бизгә бир парчә җаваб хети кәлди. Бу хәттә йезилғанға асасланғанда бизниң әрзнамимиз 2022-йили 2-айниң 14-күнидин 18-күнигичә бирләшкән дөләтләр тәшкилатида чақирилидиған 29-нөвәтлик йиғинда оттуриға қоюлидикән".

Адвокат фаруқ кәләштимур йәнә мундақ деди: "биз б д т гә сунған әрзнамимизниң 2-айниң 14-күнидин 18-күнигичә җәнвәдә ечилидиған йиғинда күн тәртипкә елип келинидиғанлиқи бизгә үмид болди. Биз ‹қанун вә пикир мунбири'ниң мәсуллири болуш сүпитимиз билән җәнвәгә берип бу йиғинға қатнашмақчимиз. Шундақла биз шәрқий түркистан дәвасини ахирғичә қоллаймиз".

Адвокат фаруқ кәләштимур әпәнди б д т гә шәрқий түркистандики кишилик һоқуқ дәпсәндичилики тоғрисида доклат сунуштики мәқсити һәққидә тохтилип мундақ деди: "мәқситимиз қериндашлиримиз учраватқан зулумни дуняға аңлитиш вә уларниң кишилик һәқ вә һоқуқлирини қоғдаш. Шәрқий түркистан мәсилиси түрк вә мусулман дунясиниң қаниған ярисидур. Шәрқий түркистан мәсилиси түрк дунясиниң мәсилисидур. Биз қанун билән шуғуллинидиған адвокатлар болуш сүпитимиз билән шәрқий түркистан мәсилисидә зиммимизгә чүшкән вәзипини ада қилишқа тиришимиз. Бу мәсилидә бизни изчил қоллаватқан кәсипдашлиримға рәһмәт ейтимән".

"қанун вә пикир мунбири" ниң тор бетидә бирләшкән дөләтләр тәшкилати кишилик һоқуқ кеңишигә сунулған бирләшмә әрзнаминиң алаһидиликиниң шәрқий түркистандики кишилик һоқуқ дәпсәндичиликлириниң хәлқара қанун бойичә оттуриға қоюлғанлиқи, 1948-йили мақулланған хәлқара кишилик һоқуқи хитабнамисидики әркинлик, бихәтәрлик һоқуқи, адил сотлиниш һоқуқи, шәхсий аиливи турмуш мәхпийәтлики, саяһәт әркинлики, яшаш, көпийиш һоқуқи қатарлиқ әқәллий һоқуқларниң һәммисиниң дегүдәк дәпсәндичиликкә учраватқанлиқиниң оттуриға қоюлғанлиқи көрситилгән.

100 Түрк адвокатниң б д т ға уйғурлар тоғрисида бирләшмә әрзнамә сунушиниң әһмийити немә?

Дуня уйғур қурултийи рәиси долқун әйса әпәнди буниң б д т дә уйғур мәсилисиниң көпләп күнтәртипкә келишидә түрткилик рол ойнайдиғанлиқини баян қилди.

Әнқәрәдики һаҗәттәпә университети оқутқучиси, истратегийә мутәхәссиси доктор әркин әкрәм әпәнди, буниң түркийәдә қануний йол билән шәрқий түркистан дәвасини елип беришта яхши бир башлиниш болғанлиқини баян қилди.

Доктор әркин әкрәм әпәнди бу әрзнаминиң җәнвәдә йиғинда оттуриға қоюлушиниң "үч басқучлуқ шәрқий түркистан истратегийәси" ниң иккинчи басқучи үчүн зор әһмийити барлиқини илгири сүрди.

Б д т кишилик һоқуқ кеңишигә зулумға учриған милләт яки шәхсләр әрз сунса болидикән, йәни кишилик һоқуқ дәпсәндичиликлирини көргән яки қолида бу һәқтә испати бар болған кишиләр яки гуруһлар әрз илтимаси суналайдикән. Түркийәдики адвокатлар тунҗи қетим бундақ бир әрзнамә сунған болуп, келәчәктә башқа саһә вә кәсипләрдики кишиләрниңму мундақ әрзләрни техиму көп сунуш еһтималлиқи бар икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт