100 Türk adwokatning sherqiy türkistandiki kishilik hoquq depsendichiliki heqqide b d t ge sun'ghan xétige jawab keldi

Ixtiyariy muxbirimiz erkin tarim
2021-07-28
Share
100 Türk adwokatning sherqiy türkistandiki kishilik hoquq depsendichiliki heqqide b d t ge sun'ghan xétige jawab keldi "Qanun we pikir munbiri" mes'uli adwokat faruq keleshtimur ependi 100 türk adwokatning mezkur munber namidin Uyghurlar uchrawatqan zulumlar toghrisida b d t kishilik hoquq kéngishige birleshme erz sun'ghan mezgilide. 2020-Yili iyun, türkiye.
RFA/Erkin Tarim

Ötken yili 26-iyun küni türkiyening herqaysi wilayetliridiki adwokatlar uyushmisigha eza 100 türk adwokatning "Qanun we pikir munbiri" namidin nöwette Uyghurlar duch kéliwatqan éghir zulumlar toghrisida birleshken döletler teshkilati kishilik hoquq kéngishige sun'ghan birleshme erznamisige jawab keldi.

"Qanun we pikir munbiri" mes'uli adwokat faruq keleshtimur ependining bildürüshiche, xette mezkur erznamining 2022-yili 2-ayning 14-künidin 18-künigiche birleshken döletler teshkilatining jenwede ötküzülidighan 29-nöwetlik yighinida küntertipke qoyulidighanliqi, yighin'gha erznamini sun'ghan 100 adwokatqa wakaliten "Qanun we pikir munbiri" mes'ulliri qatnishidighanliqi bildürülgen.

Türkiyediki 100 türk adwokatning
Türkiyediki 100 türk adwokatning "Qanun we pikir munbiri" namidin Uyghurlar duch kéliwatqan éghir zulumlar toghrisida b d t kishilik hoquq kéngishige sun'ghan birleshme erznamisige kelgen jawab xet. 2021-Yili iyul.

Biz bu toghrisida melumat igilesh üchün buninggha bashlamchiliq qiliwatqan enqere adwokatlar uyushmisining ezasi faruq keleshtimur ependi bilen söhbet élip barduq. U, b d t kishilik hoquq kéngishidin kelgen xet toghrisida melumat bérip mundaq dédi: "Biz 2020-yili 6-ayda 100 adwokat birlikte sherqiy türkistandiki kishilik hoquqi depsendichiliki heqqide birleshken döletler teshkilatigha erzname sun'ghaniduq. Birleshken döletler teshkilatigha tapshurghan erznamide Uyghur, qazaq qatarliq türkiy xelqler duchar boluwatqan kishilik hoquq depsendichilikliri 12 madda halida otturigha qoyulghan bolup, onlighan xelq'ara teshkilatlarning sherqiy türkistandiki kishilik hoquq depsendichilikliri toghrisida teyyarlighan doklatliri ispat süpitide birlikte sunulghanidi. Birleshken döletler teshkilati kishilik hoquq kéngishidin bizge bir parche jawab xéti keldi. Bu xette yézilghan'gha asaslan'ghanda bizning erznamimiz 2022-yili 2-ayning 14-künidin 18-künigiche birleshken döletler teshkilatida chaqirilidighan 29-nöwetlik yighinda otturigha qoyulidiken".

Adwokat faruq keleshtimur yene mundaq dédi: "Biz b d t ge sun'ghan erznamimizning 2-ayning 14-künidin 18-künigiche jenwede échilidighan yighinda kün tertipke élip kélinidighanliqi bizge ümid boldi. Biz 'qanun we pikir munbiri'ning mes'ulliri bolush süpitimiz bilen jenwege bérip bu yighin'gha qatnashmaqchimiz. Shundaqla biz sherqiy türkistan dewasini axirghiche qollaymiz".

Adwokat faruq keleshtimur ependi b d t ge sherqiy türkistandiki kishilik hoquq depsendichiliki toghrisida doklat sunushtiki meqsiti heqqide toxtilip mundaq dédi: "Meqsitimiz qérindashlirimiz uchrawatqan zulumni dunyagha anglitish we ularning kishilik heq we hoquqlirini qoghdash. Sherqiy türkistan mesilisi türk we musulman dunyasining qanighan yarisidur. Sherqiy türkistan mesilisi türk dunyasining mesilisidur. Biz qanun bilen shughullinidighan adwokatlar bolush süpitimiz bilen sherqiy türkistan mesiliside zimmimizge chüshken wezipini ada qilishqa tirishimiz. Bu mesilide bizni izchil qollawatqan kesipdashlirimgha rehmet éytimen".

"Qanun we pikir munbiri" ning tor bétide birleshken döletler teshkilati kishilik hoquq kéngishige sunulghan birleshme erznamining alahidilikining sherqiy türkistandiki kishilik hoquq depsendichiliklirining xelq'ara qanun boyiche otturigha qoyulghanliqi, 1948-yili maqullan'ghan xelq'ara kishilik hoquqi xitabnamisidiki erkinlik, bixeterlik hoquqi, adil sotlinish hoquqi, shexsiy a'iliwi turmush mexpiyetliki, sayahet erkinliki, yashash, köpiyish hoquqi qatarliq eqelliy hoquqlarning hemmisining dégüdek depsendichilikke uchrawatqanliqining otturigha qoyulghanliqi körsitilgen.

100 Türk adwokatning b d t gha Uyghurlar toghrisida birleshme erzname sunushining ehmiyiti néme?

Dunya Uyghur qurultiyi re'isi dolqun eysa ependi buning b d t de Uyghur mesilisining köplep küntertipke kélishide türtkilik rol oynaydighanliqini bayan qildi.

Enqerediki hajettepe uniwérsitéti oqutquchisi, istratégiye mutexessisi doktor erkin ekrem ependi, buning türkiyede qanuniy yol bilen sherqiy türkistan dewasini élip bérishta yaxshi bir bashlinish bolghanliqini bayan qildi.

Doktor erkin ekrem ependi bu erznamining jenwede yighinda otturigha qoyulushining "Üch basquchluq sherqiy türkistan istratégiyesi" ning ikkinchi basquchi üchün zor ehmiyiti barliqini ilgiri sürdi.

B d t kishilik hoquq kéngishige zulumgha uchrighan millet yaki shexsler erz sunsa bolidiken, yeni kishilik hoquq depsendichiliklirini körgen yaki qolida bu heqte ispati bar bolghan kishiler yaki guruhlar erz iltimasi sunalaydiken. Türkiyediki adwokatlar tunji qétim bundaq bir erzname sun'ghan bolup, kélechekte bashqa sahe we kesiplerdiki kishilerningmu mundaq erzlerni téximu köp sunush éhtimalliqi bar iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet