Washin'gitondiki türk féstiwalida “Uyghur körgezmisi” diqqet tartti

Muxbirimiz gülchéhre
2019.09.30
washington-turk-fetival-uyghur-1.jpg “Washin'gton türk féstiwali” da Uyghurlarning milliy medeniyitige a'it güzel sen'et buyumliri. 2019-Yili 29-séntebir, washin'gton.
RFA/Gülchéhre

Her hepte axiri oxshimaydighan féstiwallar ötküzülüp turidighan amérika paytexti washin'gtonda 29-séntebir, yeni yekshenbe ötküzülgen “Washin'gton türk féstiwali” bu güzel sheherning ijtima'iy hayatigha bayram tüsi qoshti.

Amérikadiki türkler 17 yildin buyan “Türk féstiwali” ötküzüsh arqiliq yüzligen körgezme üstel we chédirlarni qurup, türk medeniyet-sen'iti, yémek-ichmek we örüp-adetlirini oxshimighan shekil we usullarda namayan qilip kelmekte.

Bu yil 29-séntebir küni washin'gtondiki aqsaraygha yandash pénsilwaniye aylanmisida 12-kochidin 14-kochighiche bolghan da'irini qorshap türk féstiwaligha orun hazirlan'ghan. Bu bir künlük türk féstiwalgha 25 ming ziyaretchining qatnashqanliqi texmin qilinmaqta. Shu küni washin'gton türk féstiwali sayahetchilerning qiziq nuqtisigha aylan'ghan.

Washin'gtonda her yili ötküzülidighan türk féstiwalini amérikadiki türk jama'iti bilen bille bashqa barliq türkiy tilliq milletlermu xuddi özlirining bir bayram künidek tebriklep kelmekte.

Merkizi washin'gtondiki Uyghur kishilik hoquq qurulushi we washin'gtondiki pa'aliyetchan Uyghur yashlirining qizghin hemkarliqi bilen Uyghurlarmu bu nöwetlik türk féstiwalidin tunji qétim orun aldi. Ular féstiwal meydanidin 3 üstel orun élip, Uyghurlarning milliy medeniyitige a'it güzel sen'et buyumliri, chalghu eswabliri, en'eniwi kiyim-kéchekliri shundaqla Uyghur kishilik hoquq programmisi teyyarlighan Uyghurlarning nöwettiki weziyitige a'it teshwiqat waraqchilirini körgezme qilghan. Washin'gtondiki Uyghur réstoranliridin dolan réstorani yüz kishilik polo teyyarlap ziyaretchilerge dastixan achqan.

Uyghur kishilik hoquq programmisining diréktori ömer qanat ependi washin'gton türk féstiwaligha bu nöwet Uyghurlarningmu qatnashqanliqi, buning intayin ehmiyetlik bir pa'aliyet bolghanliqi heqqide ijtima'iy tartqularda melumat bergen.

Amérikadiki pa'aliyetchan yashlardin firqet jewdet washin'gton we uning etrapida yashaydighan Uyghur jama'itining pidakarliq bilen öz öyliridiki Uyghur medeniyitige a'it buyumlirini ayimay élip kélishi bilen téz arida türk féstiwalida mexsus bir Uyghur körgezme chédiri yasalghanliqini bildürdi. U bu pa'aliyet üchün bir künlük waqtini ajritip kelgen pida'iylarning ziyaretchilerge Uyghur medeniyiti bilen teng Uyghurlarning bügünki weziyitini tonushturghanliqini, Uyghur körgezmisining intayin ehmiyetlik bolghanliqini bayan qildi.

Kichik waqtida wetendin ayrilip ata-anisi bilen türkiyede bir mezgil yashighan, buningdin 20 yil awwal türkiyedin yene amérikigha köchüp kélip yashawatqan Uyghur pa'aliyetchi elfidar xanim özining yillardin buyan türk féstiwaligha qatniship kéliwatqanliqini, bu qétimqi Uyghur körgezme pa'aliyitide u türk we in'gliz tillirida tamashabinlargha Uyghurlar weziyitini anglatqanliqini bildürdi.

Elfidar xanim bu nöwet gerche Uyghurlarning tunji qétim mezkur féstiwalda körgezme échishi hésablansimu, emma meyli tamashabinlar meyli türkler we axbarat orunliri bolsun, hemmisining diqqitini tartqanliqi we mölcherdin yaxshi inkasqa érishkenlikini bayan qildi.

Washin'gton alahide rayonidiki Uyghur yash pa'aliyetchilerdin tahir imin bu qétimqi türk féstiwalida Uyghur medeniyet körgezmisining muweppeqiyetlik échilghanliqini, Uyghur yashlirining bu pursettin paydilinip körgezmini ziyaret qilghan 2000 din artuq kishige Uyghurlarning nöwettiki qiyin weziyiti hemde xitayning 3 milyon'gha qeder bigunah Uyghurni lagérlargha qamighanliqidek qilmishlirini anglatqanliqini bildürdi.

Uning bildürüshiche, Uyghurlar bilen hemkarliq ornitish heqqide söhbetleshken 200 dek kishi adrés tizimlikige imza qoyghan. Nurghun yerlik we xelq'araliq taratqular neq meydanda Uyghurlarni ziyaret qilghan. Omumen Uyghurlar achqan körgezme 17-nöwetlik washin'gton türk féstiwalidiki eng diqqet tartqan bir nuqtigha aylan'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.