Doktur muhittijan Uyghur sherqiy türkistan wexpining yene bir nöwetlik re'isi bolup saylandi

26-Dékabir yekshenbe küni merkizi istanbulgha jaylashqan sherqiy türkistan wexpining bashqurush hey'iti omumiy yighin achqan. Yighinning küntertipi boyiche, sherqiy türkistan wexpining yéngi nöwetlik saylimi ötküzülüp, re'is we idare hey'et rehberliri yéngidin saylap chiqilghan. Saylam netijisi sherqiy türkistan wexpining resmiy tor bétide élan qilin'ghan.

Igilishimizche, doktur muhittinjan Uyghur sherqiy türkistan wexpining yene bir nöwetlik re'islikige qayta saylan'ghan. Mu'awin re'islikke hafiz osman qaraqash, bash katipliqqa sema Uyghur bidak, bughaltirliqqa mehmet qeshqerli, maliye ishliri mes'ulluqigha muhemmet nur turpan saylan'ghan.

Biz sherqiy türkistan wexpining bu qétimliq saylami toghrisida tepsiliy melumatqa ige bolush üchün, mezkur wexpining re'isi doktur muhittinjan Uyghur bilen söhbet élip barduq. U sherqiy türkistan wexpining bu qétimliq saylamining démokratik bir shekilde muweppiqiyetlik élip bérilghanliqini bildürdi.

Muhittinjan Uyghur sherqiy türkistan wexipining xizmet-pilanliri toghrisida toxtilip ötti. U wexpining buningdin kéyinki xizmetliride xitayning Uyghurlargha qaratqan basturush siyasetliri we irqiy qirghinchiliqini türkiye xelqige, türkiye hökümet organlirigha we türkiyediki siyasiy partiyelerge anglitishni asasliq küntertipke qoyidighanliqini bildürdi.

Muhittinjan Uyghur yene türkiyede aliy mektepte oquwatqan Uyghur oqughuchilargha yardem qilishni dawamlashturidighanliqini, shuning bilen bir waqitta türkiyediki Uyghurlar duch kéliwatqan türlük qiyinchiliqlarni imkaniyet yar bergen da'iride hel qilishqa tirishchanliq körsitidighanliqini bildürdi.

Biz yene bu saylamgha qatnashqan sherqiy türkistan wexpining mutewelli hey'et ezasi doktor erkin ekrem bilenmu söhbet élip barduq.

Doktur erkin ekrem, sherqiy türkistan wexpining merhum eysa yüsüp aliptékin teripidin türkiyede eng baldur qurulghan sherqiy türkistan namidiki wexpe ikenlikini tekitlep ötti. U yene bu wexpining muhajirettiki sherqiy türkistan dawasida élip barghan xizmetliri, Uyghur oqughuchilarni uniwéristétlargha orunlashturup yétishturush, türkiyege kelgen Uyghurlarning iqamet ishlirini hel qilish dégendek her terepleme sahelerde muhim xizmetlerni qilip kelgenlikini eskertip ötti.

Doktur erkin ekrem, sherqiy türkistan wexpining köp sanda Uyghur oqughuchilarni türkiyening türlük uniwéristétlirida oqutup yétishtürgenlikini alahide tilgha aldi. Uning bildürüshiche, bu oqughuchilarning beziliri hazir türkiyening oxshimighan uniwérstétlirida oqutquchi bolup xizmet qilmaqtiken. U öziningmu sherqiy türkistan wexpining yardimi bilen türkiyede oqup yétishkenlikini we hazir uniwérsitétta oqutquchi we istratégiye mutexessisi bolup xizmet qiliwatqanliqini misal qilip körsetti.

Doktur erkin ekrem axirida sherqiy türkistan wexipning bu qétimqi saylimi toghrisida toxtaldi. U sherqiy türksitan wexpining yéngi saylan'ghan idare hey'et rehberlirining sherqiy türkistan dewasi üchün yéngi yol, yéngi usullar bilen xizmet bashlishini hemde bu jehette ünüm yaritishini ümid qilidighanliqini bildürdi.