Лагер қурбанлири йеқинлири от апити йүз бәргән районларға ярдәмгә барди

Лагер қурбанлири йеқинлири тәрипидин тәшкилләнгән "шәрқи түркистан үчүн анатолийә сәпири" паалийити 2-авғуст күни бурса шәһиридә башланғаниди.
Лагер қурбанлири йеқинлири бурсада елип берилған тәшвиқат паалийәтлири түгигәндин кийин, түркийәдики от апити йүз бериватқан районларға ярдәм бериш мәқситидә, бу районларға пидаий болуп беришни қарар қилған.
Бурсадики паалийәтлирини аяғлаштурған лагер қурбанлири йеқинлири 7-авғуст күни мула вилайитигә йетип келип, от апитидә өйлири хараб болған, маддий вә мәниви зиянға учриған йәрлик хәлқни зиярәт қилған.
Паалийәтчиләр мула вилайити көйҗәиз наһийәсиниң пинар, сазак, бәйоба қатарлиқ йезилириға берип, йәрлик хәлқиниң арқа сәп тәминат хизмитигә ярдәм бәргән вә йәрлик хәлққә керәклик җиддий буюмларни йәткүзүп бәргән.
"шәрқий түркистан үчүн анатолийә сәпири" паалийитиниң тәшкиллигүчилиридин уйғур кишилик һоқуқ паалийәтчиси җәвлан ширмәмәт әпәндим мәзкур паалийәтниң җәряни һәққидә тәпсилий мәлумат бәрди.

От апитигә учриған йәрлик түрк хәлқи вә мәзкур апәткә қарши туруш үчүн түркийәниң һәрқайси җайлиридин кәлгән пидаийлар уйғур паалийәтчилириниң ярдәмлири вә пидаийлиқ хизмәтлиридин қаттиқ тәсирләнгән. Пидаийлиқ хизмити җәрянида сүрәткә илинған видийолардин игилишимизчә, йәрлик хәлқ уйғур паалийәтчиләргә қаттиқ миннәтдарлиқ көрсәткән вә өзлириниң уйғур давасиға һәр вақит көңүл бөлидиғанлиқини ипадилигән.
Лагер қурбанлири йеқинлиридин мәғпирәт әмин ханим зияритимизни қобул қилип, пидаийлиқ хизмити җәрянида йәрлик түрк хәлқи тәрипидин қизғин күтүвелинғанлиқини, от апитидә зиянға учриған хәлқиниң уйғур паалийәтчиләрдин алаһидә хурсән болғанлиқини, райондики башқа пидаийларниң вә от өчүрүш хадимлириниң уйғур паалийәтчиләрниң хизмитидин интайин тәсирләнгәнликини ейтти.
Лагер қурбанлири йеқинлиридин алимҗан турди әпәндим зияритимизни қобул қилип, йәрлик хәлқниң өзлирини қизғин күтүвалғанлиқини, өзлириниң нөвәттә пидаийлиқ хизмитини түгитип коняға йетип кәлгәнликини, "шәрқий түркистан үчүн анатолийә сәпири" паалийитиниң иккинчи бекити коняда уйғур сиясий давасиға алақидар тәшвиқат паалийитини давамлаштуридиғанлиқини ейтти.
Түркийәниң мула, анталя, мармарис қатарлиқ районлирида кәң көләмлик от апити йүз бәргән болуп, әң йеңи мәлуматларға қариғанда, 12 күндин буян давамлишиватқан 223 орман от апитидин көпинчиси контрол астиға елинған. Бирақ, 6 чоң от апити һазирғичә давамлашмақтикән.
Мәзкур от апити түркийәдә йүз бәргән әң чоң от апәтлиридин бери болуп, түркийәниң һәрқайси җайлиридин кәлгән пидаийлар от өчүрүш вә арқа сәп тәминат хизмитигә ярдәмләшкән. Көзәткүчиләр, муһаҗирәттики уйғурларниң йәрлик хәлқ билән болған мунасивитини әң яхши сәвийәдә тутуп турушиниң, йәрлик җәмийәткә маслишиши вә йәрлик хәлқләрниң алдида яхши образ тиклишиниң уйғур давасиниң күчийишигә көп пайдилиқ икәнликини илгири сүрмәктә.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар