Түркийә 13 уйғурни сәуди әрәбистандин түркийәгә елип кәлди

Ихтиярий мухбиримиз әркин тарим
2020-04-15
Елхәт
Пикир
Share
Принт
Түркийә сақчилириниң һәҗгә маңғанлар келиш алдида айродромни қамаллап, уларни әнқәрә әтрапидики университетларға карантин қилишқа тәйярлиниватқан көрүнүш. 2020-Йили 15-март, түркийә.
Түркийә сақчилириниң һәҗгә маңғанлар келиш алдида айродромни қамаллап, уларни әнқәрә әтрапидики университетларға карантин қилишқа тәйярлиниватқан көрүнүш. 2020-Йили 15-март, түркийә.
AP

Сәуди әрәбистанда туруватқан 13 уйғур, түркийә тәрипидин өз пуқралири билән бирликтә түркийәгә елип келинди.

Бундин 5 ай бурун хитайниң вухән шәһиридә корона вируси оттуриға чиққандин кейинки 5 ай ичидә түркийә дуняниң һәр қайси җайлирида туруватқан көп санда түрк пуқрасини мәхсус айропилан әвәтип түркийәгә елип кәлди. Түркийә тунҗи болуп вухәндә оқуватқан 44 түрк оқуғучини мәхсус айропилан әвәтип түркийәгә елип кәлгәниди. Кейин явропа дөләтлири, америка вә әрәб дөләтлиридә туруватқан түркийә пуқралириниму елип кәлди. 14-Март күни мәхсус айропилан әвәтип сәуди әрәбистанда туруватқан 314 түрк билән 13 уйғурни елип кәлди. Түркийәниң самсун вилайитигә елип келингән кишиләрни дохтурлар тәкшүргәндин кейин, улар аптобус билән түркийәниң оттура райониға җайлашқан чорум шәһиригә апирилип оқуғучилар ятақханисида карантин астиға елинди. Истанбулдики шәрқий түркистан маарип вә һәмкарлиқ тәшкилати рәиси һидайәтулла оғузханниң ейтишичә, бундин 15 күн бурун сәуди әрәбистанда ишләватқан, қоллирида хитай паспорти бар 16 уйғур түркийәгә қайтип келиш үчүн илтимас қилған. Һидайәтулла оғузхан бу тәләпни түркийә көчмәнләр идариси билән түркийә ташқи ишлар министирлиқиға йәткүзүп, 13 уйғурниң түркийәгә қайтип келишини һәл қилған. Һидайәтулла оғузхан әпәнди бу тоғрилиқ мәлумат бәрди.

Сәуди әрәбистанниң мәккә шәһиридә турушлуқ уйғур зиялийси сираҗидин әпәнди бир ай бурун сәуди әрәбистанда корона вируси пәйда болғандин кейин айропиланлар тохтап қелип көплигән уйғурниң сәуди әрәбистанда қамилип қалғанлиқини, бәзилирини түркийә дөлитиниң елип кәткәнликини баян қилди.

Түркийәгә елип келингән бу уйғурларниң көпидә хитай паспорти бар болуп, улар әслидә түркийәдә иқамәт, йәни туруш рухсәтнамиси билән туруватқан кишиләр иди. Улар ишләш үчүн 2 ай бурун сәуди әрәбистанға барған. Әрәбистанға берип узун өтмәйла корона вируси ямрап кетип айропиланлар тохтап кәткәчкә сәуди әрәбистанда туруп қалған.

Шуларниң бири әлқәм әпәнди сәуди әрәбистанға берип узун өтмәй корона вируси оттуриға чиқип хизмәт қиливатқан иш йәрлири тақилип кетип ишсиз қалғанлиқи вә һәр җәһәттин қийин әһвалға йолуққанлиқини, ахири өзлиригә түркийәниң игә чиқип түркийәгә елип кәлгәнликини, шуңа түркийәгә рәһмәт ейтидиғанлиқини билдүрди.

Ашу уйғурларниң бири идрис әпәнди зияритимизни қобул қилип, өзиниң тизимға алдурушқа үлгүрәлмигән болсиму, тәвәккүл қилип айродромға барғанлиқини, исми елип кетилидиған кишиләрниң тизимликидә болмисиму, әмма түркийә хадимлириниң өзини айропиланға чиқарғанлиқини баян қилди.

Түркийә сәуди әрәбистандин елип кәлгән бу кишиләр, йәни ашу 13 уйғур вә башқилар чорумда 14 күн карантин астида тутуп турулғандин кейин дохтурлар тәкшүрүп, уларда корона вируси байқалмиса өйигә апирип қойидикән. Ундақта улар һазир туруватқан ятақниң шәрт-шараитлири қандақ? идрис әпәнди бу һәқтә мәлумат бәрди.

Биз игилигән мәлуматларға асасланған сәуди әрәбистан, мисир, әрәб бирләшмә хәлипилики қатарлиқ дөләтләрдә корона вируси түпәйли ишсиз қелип, башқа дөләткә кетәлмәй туруватқан уйғурлар көп икән.

Пикирләр (0)
Share
Толуқ бәт