Türkiye 13 Uyghurni se'udi erebistandin türkiyege élip keldi

Ixtiyariy muxbirimiz erkin tarim
2020-04-15
Élxet
Pikir
Share
Print
Türkiye saqchilirining hejge mangghanlar kélish aldida ayrodromni qamallap, ularni enqere etrapidiki uniwérsitétlargha karantin qilishqa teyyarliniwatqan körünüsh. 2020-Yili 15-mart, türkiye.
Türkiye saqchilirining hejge mangghanlar kélish aldida ayrodromni qamallap, ularni enqere etrapidiki uniwérsitétlargha karantin qilishqa teyyarliniwatqan körünüsh. 2020-Yili 15-mart, türkiye.
AP

Se'udi erebistanda turuwatqan 13 Uyghur, türkiye teripidin öz puqraliri bilen birlikte türkiyege élip kélindi.

Bundin 5 ay burun xitayning wuxen shehiride korona wirusi otturigha chiqqandin kéyinki 5 ay ichide türkiye dunyaning her qaysi jaylirida turuwatqan köp sanda türk puqrasini mexsus ayropilan ewetip türkiyege élip keldi. Türkiye tunji bolup wuxende oquwatqan 44 türk oqughuchini mexsus ayropilan ewetip türkiyege élip kelgenidi. Kéyin yawropa döletliri, amérika we ereb döletliride turuwatqan türkiye puqralirinimu élip keldi. 14-Mart küni mexsus ayropilan ewetip se'udi erebistanda turuwatqan 314 türk bilen 13 Uyghurni élip keldi. Türkiyening samsun wilayitige élip kélin'gen kishilerni doxturlar tekshürgendin kéyin, ular aptobus bilen türkiyening ottura rayonigha jaylashqan chorum shehirige apirilip oqughuchilar yataqxanisida karantin astigha élindi. Istanbuldiki sherqiy türkistan ma'arip we hemkarliq teshkilati re'isi hidayetulla oghuzxanning éytishiche, bundin 15 kün burun se'udi erebistanda ishlewatqan, qollirida xitay pasporti bar 16 Uyghur türkiyege qaytip kélish üchün iltimas qilghan. Hidayetulla oghuzxan bu telepni türkiye köchmenler idarisi bilen türkiye tashqi ishlar ministirliqigha yetküzüp, 13 Uyghurning türkiyege qaytip kélishini hel qilghan. Hidayetulla oghuzxan ependi bu toghriliq melumat berdi.

Se'udi erebistanning mekke shehiride turushluq Uyghur ziyaliysi sirajidin ependi bir ay burun se'udi erebistanda korona wirusi peyda bolghandin kéyin ayropilanlar toxtap qélip köpligen Uyghurning se'udi erebistanda qamilip qalghanliqini, bezilirini türkiye dölitining élip ketkenlikini bayan qildi.

Türkiyege élip kélin'gen bu Uyghurlarning köpide xitay pasporti bar bolup, ular eslide türkiyede iqamet, yeni turush ruxsetnamisi bilen turuwatqan kishiler idi. Ular ishlesh üchün 2 ay burun se'udi erebistan'gha barghan. Erebistan'gha bérip uzun ötmeyla korona wirusi yamrap kétip ayropilanlar toxtap ketkechke se'udi erebistanda turup qalghan.

Shularning biri elqem ependi se'udi erebistan'gha bérip uzun ötmey korona wirusi otturigha chiqip xizmet qiliwatqan ish yerliri taqilip kétip ishsiz qalghanliqi we her jehettin qiyin ehwalgha yoluqqanliqini, axiri özlirige türkiyening ige chiqip türkiyege élip kelgenlikini, shunga türkiyege rehmet éytidighanliqini bildürdi.

Ashu Uyghurlarning biri idris ependi ziyaritimizni qobul qilip, özining tizimgha aldurushqa ülgürelmigen bolsimu, tewekkül qilip ayrodromgha barghanliqini, ismi élip kétilidighan kishilerning tizimlikide bolmisimu, emma türkiye xadimlirining özini ayropilan'gha chiqarghanliqini bayan qildi.

Türkiye se'udi erebistandin élip kelgen bu kishiler, yeni ashu 13 Uyghur we bashqilar chorumda 14 kün karantin astida tutup turulghandin kéyin doxturlar tekshürüp, ularda korona wirusi bayqalmisa öyige apirip qoyidiken. Undaqta ular hazir turuwatqan yataqning shert-shara'itliri qandaq? idris ependi bu heqte melumat berdi.

Biz igiligen melumatlargha asaslan'ghan se'udi erebistan, misir, ereb birleshme xelipiliki qatarliq döletlerde korona wirusi tüpeyli ishsiz qélip, bashqa döletke kételmey turuwatqan Uyghurlar köp iken.

Toluq bet