Türk diniy alim muhemmed yildirim Uyghurlar duch kéliwatqan zulumgha süküt qilghanlarni tenqid qildi

Ixtiyariy muxbirimiz arslan
2021-10-29
Share
Türk diniy alim muhemmed yildirim Uyghurlar duch kéliwatqan zulumgha süküt qilghanlarni tenqid qildi Bir guruppa kishiler özlükidin teshkillinip, istanbulning beyazit meydanida ötküzgen namayishta türkiyede tonulghan dini alim muhemmed imin yildirim söz qilmaqta. 2021-Yili 27-öktebir, türkiye.
Muhammed Emin Yildirimning Facebook hésabatidin élin’ghan

10‏-Ayning 27-küni Uyghurlardin bir guruppa kishiler özlikidin teshkillinip, istanbulning eng awat orunliridin biri bolghan beyazit meydanigha jem boldi we qollirida ay-yultuzluq kök bayraqlarni kötürgen halda xitaygha qarshi namayish élip bardi.

Bu namayishqa türkiyede tunulghan dini alim muhemmed imin yildirimmu qatniship, söz qildi. U Uyghurlar mesilisige süküt qilghan shexslerni tenqid qildi we özining bu mesilisige qolidin kélidighan pütkül imkanlarni ishqa sélip qollap-quwwetleydighanliqini ipadilidi.

Namayish jeriyanida söz qilghan dini alim muhemmed imin yildirim ependi zulumgha süküt qiliwatqanlarni tenqiq qilip, mundaq dédi: "Epsuslinarliqi shuki, bügünki künde sherqiy türksitandiki azab-oqubetler tashqa aylan'ghan yürek we wijdanlarni heriketke ötküzmeywatidu. Héchkim bu peryadlarni anglashni xalimaywatidu, héchkim bu peryadlargha ortaq bolushni xalimaywatidu, héchkim ularning aqqan köz yashlirini toxtitishni xalimaywatidu. Bu bek échinishliq bir ehwal. Bu ehwal bizning özimizge özimiz qilghan haqarettur, xalas."

Muhemmed yildirim ependi sözide yene namayish qiliwatqan Uyghurlargha xitap qilip, mundaq dédi: "Bügünki künde siler chong bir jasaret körsitip, bir türküm qiyinchiliqlarni öz aldinglargha qoyup, intayin muhim bir chaqiriqni otturigha qoyiwatisiler. Tashqa aylan'ghan wijdanlarni heriketke ötküzüsh üchün türkiyege we dunya jama'itige awazinglarni anglitishqa tirishiwatisiler."

Muhemmed yildirim ependi sözide yene Uyghurlar uchrawatqan zulumni tilgha élip, mundaq dédi: "Silerning bu sadaliringlardek shereplik we pak sada yoqtur. Shuni isinglardin chiqarmanglarki, nechche yildin buyan uruq-tughqanliringlardin xewer alalmaywatsiler, eng yéqin tughqanliringlar bilen alaqilishalmaywatisiler, silerning yillardin buyan körüshelmeywatqan, xewer alalmaywatqan yéqinliringlar mewjut. U yerdiki insanlar lagérlargha qamaldi we éghir zulum astida qaldi. Kelgüsi ewladlar weyran boluwatidu, izzet-nomus ayagh-asti qiliniwatidu. Mesjitler, medrisiler, mazarliqlar chéqiliwatidu. Pütkül dunya bu zulumgha qarshi heriketke ötüshi kérek idi."

Muhemmed yildirim ependi dunya jama'iti we türkiye xelqining bu zulumgha süküt qiliwatqanliqini qattiq tenqid qilip, mundaq dédi: "Biz bu weten )türkiye( ning xelqi bolush süpitimiz bilen epsuslinarliqi bu mezlumlarning peryadlirini anglimasliqqa, körmeslikke séliwatimiz. Biraq shundaq bir heqiqet barki, biz bu mezlumlarning peryadlirigha qolaq sélip özimiz we wijdanimizni ortaq heriketke ötküzüp kéreklik qarshliqni otturigha qoymisaq, u nale-peryadlar zalimlarnila emes, belki bizge oxshash zulumgha süküt qilghanlarnimu qoshup halak qilidu. Zalimgha qarshiliq körsetmigen, mezlumgha qol uzatmighan, mezlumning köz yéshini toxtatmighanlarning hemmisi bu zulumgha shérik bolghan bolidu."

Muhemmed yildirim ependizulumgha süküt qilmasliq üchün namayishqa qatnishiwatqanliqini ipadilep, mundaq dédi: "Biz u zulumgha shérik bolmasliq üchün bügün silerning yéninglarda turiwatimiz, ishininglarki, qolumdin kelse, imkaniyitim yar berse, pütün ishlirimni tashlap siler bilen birge shehermu-sheher aylinip, bu zulumni xelq ammisigha jakarlaymen. Her zaman silerni qollaymen, her zaman siler üchün du'a qilimen!"

Igilinishiche, beyazit meydanida namayish qiliwatqan Uyghurlar bir qanche aydin buyan xitayning istanbuldiki konsolxanisi aldida namayish élip bériwatqan bolup, yéqindin buyan orun almashturup beyazit meydanida her heptide bir qétim, her charshenbe küni namayishni dawam qilmaqta.

Bu namayishchilar néme üchün orun almashturup, xitay konsolxanisi aldidin istanbulning eng awat orunliridin biri bolghan beyazit meydanigha yötkeldi, yötkilishke néme seweb boldi? biz bu heqte mezkur namayishni oyushturushta aktip rol oynap kéliwatqan Uyghur ziyaliysi doktur burhan ulughyol ependi bilen söhbet élip barduq.

Doktur burhan ependi bu namayishning ornini beyazit meydanigha yötkeshte asasliqi Uyghur mesilisini türk xelqige, bolupmu istanbulgha kelgen chet elliklerge anglitish meqset qilin'ghanliqini tekitlep ötti. U yene her heptide bir qétim, her charshenbe küni bu namayishni dawam qilidighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet