Türkiyening xitayda turushluq bash elchisi Uyghurlarning xitayning zémin pütünlikini qoghdishini telep qilghan

Türkiyening xitayda turushluq bash elchisi abduqadir emin önen türkiyediki Uyghurlarning xitayning zémin pütünliki we "Bir xitay prinsipi" ni qoghdishini, türkiyening xitay bilen bolghan munasiwetlirining téximu küchiyishige türtke bolushini telep qilghan.

Uning tekitlishiche, türkiye xitay bilen bolghan her jehettiki munasiwetlirini téxmu chongqurlashturidiken. U bu sözlerni 16-yanwar xitay-türkiye diplomatik munasiwet ornatqanliqining 50 yilliqi munasiwiti bilen türkiyening hökümet axbarati — anadolu agéntliqining ziyaritini qobul qilip, nöwettiki xitay-türkiye munasiwetlirige baha bergende qilghan.

U mundaq dégen: "Biz qérindashlirimizning, zémin pütünliki we 'bir xitay prinsipi' ni her pursette tekitlep kelgen xitay xelq jumhuriyiti bilen bolghan munasiwetimizning téximu küchiyishige hesse qoshushini ümid qilimiz." u yene türkiye puqrasi bolghan Uyghurlarning Uyghur élidiki uruq-tughqanlirigha da'ir teleplirini xelq'ara qanun we diplomatik qanallar bilen sürüshtürüp kéliwatqanliqi, bu mesilidiki "Sezgürliki we teleplirini alaqidar xitay orunlirigha her derijide yetküzüp kelgenliki we dawamliq yetküzüdighanliqi" ni bildürgen, emma uning netijisining qandaq bolghanliqini chüshendürmigen.

Abduqadir emin önen Uyghur élini ziyaret qilmasliq, bu rayondiki lagérlarda yétiwatqan türkiye puqraliqidiki Uyghurlarning aqiwitini sürüshtürmeslik bilen eyiblinip kelgen idi. U yuqiriqi sözlerni qilishning sel aldida, "Nikkéy asiya" géziti "Türkiyening Uyghurlarni xitay waksinisigha tégishish" bilen eyiblen'genliki, bezilerde xitay sinowak waksinisini kozér qilip, türkiyeni "Xitay-türkiye jinayetchi almasturush kélishimi" ni maqullashqa qistawatamdu, dégen guman qozghighanliqini ilgiri sürgen.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar