Xitay tashqi ishlar ministirining türkiye ziyariti Uyghurlarning qattiq qarshiliqigha uchridi

Ixtiyariy muxbirimiz azigh
2021.03.25
Share on WhatsApp
Share on WhatsApp
Xitay tashqi ishlar ministirining türkiye ziyariti Uyghurlarning qattiq qarshiliqigha uchridi Xitay tashqi ishlar ministiri wang yining türkiye ziyaritige naraziliq bildürüp qilin'ghan namayishtin körünüsh. 2021-Yili 25-mart, istanbul.
RFA/Azigh

25-Mart xitay tashqi ishlar ministiri wang yi enqerege yétip kelgen bolup, türkiyediki Uyghurlar istanbul we enqerede her xil pa'aliyetler arqiliq xitay hökümitige qattiq naraziliqini bildürgen.

2020-Yili 18-dékabirdin étibaren xitay istanbul konsulxanisining aldida “Millet nöwette” pa'aliyitini élip bériwatqan lagér qurbanliri yéqinliri pa'aliyitining 98-künide xitay tashqi ishlar ministirining türkiye ziyaritini eyiblep axbarat élan qilish yighini ötküzdi.

Yighin'gha türkiyediki Uyghur jama'iti, kishilik hoquq pa'aliyetchiliri we axbarat wasitiliri ishtirak qildi. “Millet nöwette” pa'aliyitide aktip rol oynawatqan lagér qurbanliri yéqinliridin jewlan shirmemet ependim we medine nazimi xanim ziyaritimizni qobul qilip pa'aliyet heqqide tepsiliy toxtaldi.

Xitay tashqi ishlar ministiri wang yining türkiye ziyaritige naraziliq bildürüp qilin'ghan namayishtin körünüsh. 2021-Yili 25-mart, istanbul.

Oxshash waqitta sherqi türkistan teshkilatlar birliki, dunya Uyghur qurultiyi, Uyghur akadémiyesi qatarliq 29 nopuzluq Uyghur teshkilatining awaz qoshushi bilen istanbul bayazit meydanida axbarat élan qilish yighini ötküzüldi. Yighin'gha türkiyediki Uyghur siyasiy we kishilik hoquq teshkilatlirining mes'ulliri, jama'et erbabliri we nopuzluq axbarat wasitiliri qatnashti.

Mezkur pa'aliyetke qatnashqan Uyghur akadémiyesining hey'et ezaliridin muhemmet éli ependim ziyaritimizni qobul qilip pa'aliyet heqqide tepsiliy melumat berdi.

Xitayning Uyghur élidiki kishilik hoquq depsendichiliki we étnik qirghinchiliq siyasiti gherb démokratik döletliri teripidin ortaq étirap qélinip kelmekte. Amérikaning awstraliye, yéngi zélandiye, kanada we yawropa ittipaqi bilen mas qedemde Uyghur qirghinchiliqi seweblik xitaygha émbargo yürgüzüshi we Uyghur mesiliside ittipaq ornitishi xitaygha qarshi keskin signal dep qariliwatqan bügünkidek künde, xitay tashqi ishlar ministirining türkiyeni ziyaret qilishi muhim siyasiy meqsetke ige iken.

Mutexessisler türkiye Uyghur siyasitide, mezkur ziyaret jeryanida halqiliq tallashqa duch kélidu dep qarimaqta.

Türkiye tashqi ishlar ministiri mewlut chawush'oghli tiwittir hésabida Uyghur mesilisidiki chüshenche we teleplirini xitayning munasiwetlik xadimlirigha yetküzgenlikini éytqan, biraq Uyghur mesilisi üstide qaysi jehetlerdin söhbetleshkenlikini we söhbetning jeryanini tilgha almighan.

Xitay ishliri mutexessis memettoxti atawulla wang yining türkiye ziyaritige qarshi orunlashturulghan naraziliq pa'aliyetlirining ehmiyiti we türkiyening Uyghur siyasitige bolghan tesiri heqqide köz qarashlirini bayan qildi.

Xitay-türkiye munasiwetlirining kölenggisi astida qéliwatqan Uyghur mesilisi gherbining keskin pozitsiyesi tüpeyli türkiye jem'iyitide qaytidin janlinishqa bashlighan bolup, közetküchiler türkiyening aldimizdiki künlerde keskin bir tallashqa duch kélidighanliqini éytip kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet