Türkiyediki bezi sheherlik parlaménttiki partiyeler bayanat élan qilip, xitayni qattiq eyiblidi

Ixtiyariy muxbirimiz erkin tarim
2021-05-26
Share
Türkiyediki bezi sheherlik parlaménttiki partiyeler bayanat élan qilip, xitayni qattiq eyiblidi Türkiyening chukurowa sheherlik parlaméntidiki jumhuriyet xelq partiyesi guruppisining mes'uli abeydullah qolju ependi yighinda sözlimekte. 2021-Yili may.
Social Media

Türkiyediki bezi sheherlik parlaméntlar we bezi tenterbiye mestaniliri uyushmiliri arqa-arqidin xitayning Uyghurlargha élip bériwatqan siyasitini qattiq eyiblep bayanat élan qildi. Ular mezkur bayanatta türkiye hökümitini "Bu heqte mes'uliyitini ada qilishqa, birleshken döletler teshkilatida bu mesilini otturigha qoyush" qa chaqirdi. Türkiyening chukurowa sheherlik parlaméntidiki jumhuriyet xelq partiyesi guruppisining mes'uli abeydullah qolju ependi, yaxshi partiyesining mes'uli newzat xiz ependi, milletchi heriket partiyesi özgür atesh ependi ortaq teyyarlighan bayanatni sheherlik parlaméntta oqughan. 25-Aprél küni élan qilin'ghan mezkur bayanatta xitayning Uyghurlargha élip bériwatqan insaniyetke qarshi siyasitini derhal toxtitishqa, bu mesilining birleshken döletler teshkilatida muhim mesile süpitide otturigha qoyulushi kéreklikini telep qilghan. Bayanatta munular déyilgen: "Xitay xelq jumhuriyeti 2016-yilidin tartip, Uyghur türkliri bashta barliq türkiy qérindashlirimizgha élip bériwatqan éghir zulum insaniyetke qarshi jinayettur. Epsuski bu jinayet künimizdimu dawam qilmaqta. Xitay térrorgha qarshi köreshni bahane qilip turup, milyonlighan Uyghurni lagérlargha tashlighan bolup, bu Uyghurlar insanliq qélipidin chiqqan mu'amilige duchar bolmaqta, Uyghur xanim-qizlar basqunchiliqqa uchrimaqta, tughmas qilip qoyulmaqta. Buni dunyadiki herqaysi döletler, ammiwi teshkilatlar, bolupmu türkiye hökümiti birleshken döletler teshkilatining küntertipige élip kélip derhal hel qilish yolini tépishi kérek".

Chukurowa sheherlik parlaménttiki 3 siyasiy partiye ortaq élan qilghan bayanat mundaq axirlashqan: "Biz jumhuriyet xelq partiyesi, yaxshi partiyesi we milletchi heriket partisi bolush süpitimiz bilen xitayning Uyghur qérindashlirimizgha élip bériwatqan bésim siyasitige qarshi turushqa dawam qilish bilen birlikte Uyghurlargha élip bériliwatqan zulum tügigüche ularning awazi bolushqa dawam qilimiz".

Buningdin bashqa izmir qarabaghlar sheherlik parlaménttiki jumhuriyet we iyi partiyesining parlamént ezaliri dunyaning herqaysi döletlirini, türkiye hökümitini Uyghurlar üchün heriketke ötüshke chaqirdi. Mezkur bayanatta Uyghur mesiliside türkiyening bashlamchiliq roli oynishi kérekliki, türkiyening birleshken döletler teshkilatida Uyghur mesilisini otturigha qoyushi kérekliki tekitlen'gen.

Bulardin sirt türkiyening béshiktash we fenerbaghche tenterbiye qulupliri mestanilirimu ijtima'iy taratqular arqiliq köz-qarashlirini bayan qilip, xitayning Uyghurlargha élip bériwatqan siyasitini qattiq eyiblidi we türkiye hökümitini Uyghurlargha ige chiqishqa chaqirdi.

Bu heqte ziyaritimizni qobul qilghan sherqiy türkistan wexpisining sabiq re'isi péshqedem siyasetchi hamutxan göktürk ependi türkiye hökümitini qollawatqan milletchi heriket partiyesining hazirghiche bu xil ortaq bayanatlarda orun almighanliqini, chukurowa sheherlik parlaménttiki öktichi partiyeler ortaq élan qilghan bayanatqa milletchi heriket partiyesiningmu qatnashqanliqini, buning zor ehmiyetke ige ikenlikini ilgiri sürdi.

Istanbul uniwérsitéti tarix oqutquchisi doktor ömer qul ependi bu heqtiki köz qarishini bayan qilip mundaq dédi: "Xitay élip bériwatqan irqiy qirghinchiliqqa qarshi türkiyediki ammiwi teshkilatlarning, siyasiy partiyelerning sheherlik parlamént ezalirining xitayni eyiblep bayanatlar élan qilishi, türkiyede Uyghur mesilisige ige chiqiwatqanlarning köpiyiwatqanliqining béshariti. Elwette buning hökümetkimu tesiri bolidu. Biz türkiyede téximu köp kishining Uyghurlargha ige chiqishini ümid qilimiz".

Sherqiy türkistan teshkilatlar birliki re'isi hidayetulla oghuzxan ependi türkiyediki her qaysi partiye ammiwi teshkilatlar hetta bezi tenterbiye quluplirining Uyghurlarni qollap ortaq bayanat élan qilishining türkiyede Uyghur mesilisidiki zor ilgirilesh ikenlikini otturigha qoydi.

Ötken hepte türkiyediki 73 adwokatlar idarisi Uyghurlarni qollap ortaq bayanat élan qilghanidi. Türkiyede 78 ming etrapida adwokat bar bolup, bu adwokatlar 81 adwokatlar idarisigha eza bolup wezipe öteydiken. Buning ichidin 73 adwokatliq idarisining Uyghurlarni qollap, xitayni eyiblep bayanat élan qilishi türkiyediki Uyghur dewasi üchün zor ilgirilesh iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet